ଜାମସେଦପୁର, ୨୫।୮: ଝାଡ଼ଖଣ୍ଡର ଜାମସେଦପୁରସ୍ଥିତ ସିଦ୍ଗୋଡା ପ୍ରଫେଶନାଲ କଲେଜ କୋଭିଡ୍ କେୟାର ସେଣ୍ଟରରେ ଡ୍ୟୁଟିରେ ଥିବା ଜଣେ ମହିଳା ପୋଲିସ କନ୍ଷ୍ଟେବଳ ବଳାତ୍କାର ଶିକାର ହୋଇଛନ୍ତି। ମହିଳାଙ୍କ ସାଥୀ କନ୍ଷ୍ଟେବଳ ତାଙ୍କୁ ବଳାତ୍କାର କରିଥିବା ଜଣାପଡ଼ିଛି। ମହିଳା କନ୍ଷ୍ଟେବଳ ଜଣଙ୍କ ଥାନାରେ ଅଭିଯୋଗ କରିବା ପରେ ଅଭିଯୁକ୍ତ ସିପାହୀ ଅନିଲ ସିଂଙ୍କୁ ଗିରଫ କରାଯାଇଛି। ଅନିଲ ସେହି କୋଭିଡ୍ କେୟାର ସେଣ୍ଟରର ଡ୍ୟୁଟିରେ ଥିଲେ। ଅପରପକ୍ଷରେ ମହିଳା କନ୍ଷ୍ଟେବଳଜଣଙ୍କ ଜଣେ କରୋନା ଆକ୍ରାନ୍ତ ମହିଳା ଅଭିଯୁକ୍ତଙ୍କ ସୁରକ୍ଷା ଦାୟିତ୍ୱରେ ସେଠାରେ ରହିଥିଲେ। ଘଟଣାଦିନ ସନ୍ଧ୍ୟାରେ ଅନିଲା ମହିଳା କନ୍ଷ୍ଟେବଳଙ୍କ ନିକଟକୁ ଯାଇ କଥାବାର୍ତ୍ତା ହୋଇଥିଲେ। ଏହାପରେ ‘ଏହି ରୁମ୍ ଜୀବାଣୁ ମୁକ୍ତ ନୁହେଁ, ଉପରେ ଭଲ ରୁମ୍ ଥିବା କହି’ ମହିଳା କନ୍ଷ୍ଟେବଳଙ୍କୁ ଅନିଲ ଉପର ମହଲାରେ ଥିବା ଏକ ରୁମ୍କୁ ନେଇଯାଇଥିଲେ। ସେଠାରେ ଅନିଲ ବଳପୂର୍ବକ ତାଙ୍କୁ ବଳାତ୍କାର କରିଥିବା ପୋଲିସ ନିକଟରେ ମହିଳା କନ୍ଷ୍ଟେବଳଜଣଙ୍କ ଅଭିଯୋଗ କରିଛନ୍ତି। ଏହି ଘଟଣାରେ ପୋଲିସ ଅନିଲଙ୍କୁ ଗିରଫ କରିଛି। ଏଠାରେ ପ୍ରକାଶଯୋଗ୍ୟ, ମହିଳାଙ୍କ ସ୍ବାମୀ ଏଏସ୍ଆଇ ଥିଲେ। ଡ୍ୟୁଟିରେ ଥିବାବେଳେ ତାଙ୍କ ସ୍ବାମୀଙ୍କର ମୃତ୍ୟୁ ହେବାକୁ ତାଙ୍କୁ କନ୍ଷ୍ଟେବଳ ଚାକିରି ମିଳିଥିଲା।
