ମହାକାଳପଡ଼ା,୧୮।୧(ଡି.ଏନ.ଏ.): କେନ୍ଦ୍ର ଓ ରାଜ୍ୟ ସରକାର ଗ୍ରାମାଞ୍ଚଳ ଶିଶୁଙ୍କ କୁପୋଷଣ, ମୃତ୍ୟୁହାର ହ୍ରାସ, ଗର୍ଭବତୀ ଓ ପ୍ରସୂତି ମହିଳାଙ୍କ ଗର୍ଭସ୍ଥ ଶିଶୁର ବିକାଶ ପାଇଁ ପୁଷ୍ଟିକର ଭିଟାମିନ୍ ଖାଦ୍ୟ ଯୋଗାଇ ଦେଉଛନ୍ତି। ତେବେ କୋମଳମତି ଶିଶୁମାନଙ୍କୁ ପୁଷ୍ଟିକର ଖାଦ୍ୟ ଅଣ୍ଡା ଦେବା ବଦଳରେ ବଣଭୋଜି ବାସିତରକାରି ମଙ୍ଗଳବାର ଦିଆଯାଇଛି। ଏଭଳି ଅଭିଯୋଗ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଖରିନାସୀ ପଞ୍ଚାୟତ ହରିଆବାଙ୍କ ଅଙ୍ଗନୱାଡ଼ି କେନ୍ଦ୍ରର ଶିଶୁ ଓ ଅଭିଭାବକମାନେ ଆଣିଛନ୍ତି। ଏଠାରେ ଶିଶୁମାନେ ନିକଟସ୍ଥ ଏକ କ୍ଲବ୍ ଘରେ ପାଠ ପଢୁଛନ୍ତି।
ମିଳିଥିବା ସୂଚନା ଅନୁସାରେ, ଏହି ଅଙ୍ଗନଓ୍ବାଡି କେନ୍ଦ୍ରରେ ୩୦ରୁ ଅଧିକ ଶିଶୁ ପାଠ ପଢୁଛନ୍ତି। ମଙ୍ଗଳବାର ଶିଶୁମାନଙ୍କୁ ଅଣ୍ଡା ତରକାରି ଦେବା ପାଇଁ ନିୟମ ଥିଲା ବେଳେ ଅଙ୍ଗନୱାଡ଼ି କର୍ମୀ ରିନାବାଳା ସ୍ବାଇଁ ବଣଭୋଜିରୁ ବଳି ପଡିଥିବା ବାସି ମିକ୍ଚର ତରକାରି ଖାଇବାକୁ ଦେଇଛନ୍ତି। ଏହି ବାସି ତରକାରି ଖାଇ କେତେଜଣ ଶିଶୁଙ୍କ ଆମ୍ବିଳା ହାକୁଟି ହେଉଥିବା ଅଭିଭାବକ କଳ୍ପନା ଜେନା, ଲକ୍ଷ୍ମୀ ପାତ୍ର, ରେଣୁବାଳା ଜେନା, ଝିଲି ରାୟ, ରିତିକ ମିର୍ଦ୍ଧା, ରାଧା ମଣ୍ଡଳ, ପୂର୍ଣ୍ଣିମା ଜେନା ଓ ସବିତା ଜେନା ଅଭିଯୋଗ କରିଛନ୍ତି। ଅଭିଭାବକ ମିନତି ଜେନା କହିଛନ୍ତି, ଶିଶୁମାନେ ବାସି ତରକାରି ଖାଇବା ଦ୍ୱାରା ଜୀବନ ପ୍ରତି ବିପଦ ଅଛି। ଅଭିଭାବକମାନେ ଶିଶୁମାନଙ୍କ ଭାଗ୍ୟ ଅଙ୍ଗନୱାଡ଼ି କେନ୍ଦ୍ରର କର୍ମୀଙ୍କ ହାତରେ ଛାଡିଛନ୍ତି। ସୁଷମ ଖାଦ୍ୟ ବଦଳରେ ବାସି ଆମ୍ବିଳା ତରକାରି ଖାଇବାକୁ ଦିଆଯାଇଥିବାରୁ ଶିଶୁମାନଙ୍କ ଅଭିଭାବକମାନେ ସେମାନଙ୍କୁ ଘରକୁ ନେଇଯାଇଥିଲେ। ଅଭିଭାବକମାନେ ଏ ନେଇ ଅସନ୍ତୋଷ ବ୍ୟକ୍ତ କରିବା ସହ ସ୍ଥାନୀୟ ୱାର୍ଡସଭ୍ୟ ଅସୀମା ମିର୍ଦ୍ଧାଙ୍କୁ ଜଣାଇଥିଲେ। ତେବେ ସଭ୍ୟା ମିର୍ଦ୍ଧା ସମ୍ପୃକ୍ତ ଅଙ୍ଗନୱାଡ଼ି କେନ୍ଦ୍ରର କର୍ମୀ ସ୍ବାଇଁଙ୍କୁ ପଚାରିବାରୁ ପ୍ରଥମେ ଏହାକୁ ସେ ଅସ୍ବୀକାର କରିଥିଲେ ମଧ୍ୟ ପରେ ବାସିତରକାରି ଶିଶୁମାନଙ୍କୁ ଖାଇବାକୁ ଦେଇଥିବା ସ୍ବୀକାର କରିଥିଲେ। ତୃଣମୂଳସ୍ତରରେ ଏହିସବୁ ନିୟମକୁ ଅଣଦେଖା କରାଯାଇଛି ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ଜୋର ଧରିଛି। ଏହି ଘଟଣାକୁ ନେଇ ହରିଆବାଙ୍କ ଅଙ୍ଗନଓ୍ବାଡି କେନ୍ଦ୍ରରେ ପଢୁଥିବା ଶିଶୁମାନଙ୍କ ଅଭିଭାବକମାନେ ପ୍ରତିବାଦ କରିବା ସହ ଫୋନ ଯୋଗେ ବିଭାଗୀୟ ଉଚ୍ଚ ଅଧିକାରୀଙ୍କୁ ଅଭିଯୋଗ କରିଛନ୍ତି। ଏ ସମ୍ପର୍କରେ ସିଡିପିଓ କବିତା ମଲିକଙ୍କୁ ପଚାରିବାରେ ଘଟଣା ସମ୍ପର୍କରେ ଲିଖିତ ଅଭିଯୋଗ ମିଳିଲେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
