ପାଟନା, ୧୫।୯: ଆଗକୁ ବିହାରରେ ବିଧାନସଭା ନିର୍ବାଚନ ହେବ। ଏନେଇ ରାଜ୍ୟରେ ରାଜନୈତିକ ସ୍ଥିତି ବେଶ୍ ଚଳଚଞ୍ଚଳ ହେବାରେ ଲାଗିଛି। ଜେଡିୟୁ ଅଧ୍ୟକ୍ଷ ତଥା ମୁଖ୍ୟମନ୍ତ୍ରୀ ନୀତୀଶ କୁମାର ରାଜ୍ୟର ବିକାଶ ପାଇଁ କହୁ କାର୍ଯ୍ୟ କରିଥିବା କହୁଛନ୍ତି। ତେବେ ବିଧାନସଭା ନିର୍ବାଚନ ଲଢ଼ିବାରେ ତାଙ୍କ ମନରେ ଭାରି ଭୟ ରହିଥିବା ନେଇ ରାଜନୈତିକ ମହଲରେ ବେଶ୍ ଚର୍ଚ୍ଚା ହେଉଛି। ନୀତୀଶ ୬ ଥର ରାଜ୍ୟର ମୁଖ୍ୟମନ୍ତ୍ରୀ ହୋଇଛନ୍ତି। ତେବେ ଗତ ୧୬ ବର୍ଷ ଧରି ସେ ବିଧାନସଭା ନିର୍ବାଚନ ଲଢ଼ି ନାହାନ୍ତି। ବିଧାନ ପରିଷଦ ସଦସ୍ୟଭାବେ ସେ ୨୦୦୪ରୁ ବର୍ତ୍ତମାନ ପର୍ଯ୍ୟନ୍ତ ରହିଆସିଛନ୍ତି। ୧୯୮୫ରେ ପ୍ରଥମଥର ସେ ହରନୌମ ବିଧାନସଭା ଆସନରୁ ବିଜୟୀ ହୋଇ ବିଧାୟକ ହୋଇଥିଲେ। ଏହାପରେ ସେ ୧୯୯୧, ୧୯୯୬, ୧୯୯୮,୧୯୯୯ ଏବଂ ୨୦୦୪ ଲୋକ ସଭା ନିର୍ବାଚନରେ ବିଜୟୀ ମଧ୍ୟ ହୋଇଛନ୍ତି। ଶେଷଥର ପାଇଁ ୨୦୦୪ରେ ସେ ନାଳନ୍ଦା ଲୋକ ସଭା ଆସନରୁ ବିଜୟୀ ହୋଇଥିଲେ। ତେବେ ଏହାପରେ ସେ ଲୋକ ସଭା ଅବା ବିଧାନସଭା କୌଣସି ନିର୍ବାଚନ ଲଢ଼ି ନାହାନ୍ତି। ରାଜ୍ୟର ଜନତା ତାଙ୍କୁ କେତେ ପସନ୍ଦ କରୁଛନ୍ତି ତାହା ପ୍ରାୟତଃ ଭୋଟ ଦ୍ୱାରା ଜଣାପଡ଼ିଥାଏ। ମାତ୍ର ନୀତୀଶ ଏଥିରୁ ଓହରି ବିଧାନପରିଷଦରୁ ନିର୍ବାଚିତ ହେବାକୁ ସୁରକ୍ଷିତ ମଣୁଥିବା ଚର୍ଚ୍ଚା ହେଉଛି। ୨୦୦୦ରେ ମାର୍ଚ୍ଚ ୩ରେ ସେ ବିହାରର ମୁଖ୍ୟମନ୍ତ୍ରୀ ହୋଇଥିଲେ ତେବେ ୭ ଦିନ ପରେ ମାର୍ଚ୍ଚ ୧୦ରେ ପଦରୁ ଇସ୍ତଫା ଦେଇଥିଲେ। ଏହାପରେ ସେ ୨୦୦୫ ନଭେମ୍ବର ୨୪ରୁ ୨୦୧୦ ନଭେମ୍ବର ୨୪, ୨୦୧୦ ନଭେମ୍ବର ୨୫ରୁ ୨୦୧୪ ମେ ୧୯, ୨୦୧୫ ଫେବୃୟାରୀ ୨୨ରୁ ୨୦୧୫ ନଭେମ୍ବର ୧୯, ୨୦୧୫ ନଭେମ୍ବର ୨୦ରୁ ୨୦୧୭ ଜୁଲାଇ ୨୬ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ହୋଇଥିଲେ। ପରେ ୨୦୧୭ ଜୁଲାଇ ୨୭ରୁ ବର୍ତ୍ତମାନ ପର୍ଯ୍ୟନ୍ତ ସେ ରାଜ୍ୟର ଶାସନ ଡୋରି ଧରିଛନ୍ତି।
