ଭୁବନେଶ୍ୱର, ୧୦।୧୨ (ବ୍ୟୁରୋ): ରାଜଧାନୀରେ ବାରମ୍ବାର ବସୁଛି କଙ୍ଗାରୁ କୋର୍ଟ। ସର୍ବ ସମ୍ମୁଖରେ ଘଟୁଛି ଅମାନୁଷିକ କାଣ୍ଡ। ହେଲେ କମିଶନରେଟ ପୋଲିସ କିଛି ଜାଣିପାରୁନି। ସୋସିଆଲ ମିଡିଆରେ ଘଟଣା ଭାଇରାଲ ହେବା ପରେ ଚେତା ପଶୁଛି। ପୂର୍ବରୁ ଏକାଧିକ ଘଟଣା ଘଟିଥିବାବେଳେ ଏବେ ଖଣ୍ଡଗିରି ଥାନା ଅନ୍ତର୍ଗତ ବରମୁଣ୍ଡା ଗ୍ରାମରେ ଆଉଏକ ସ୍ପର୍ଶକାତର ଘଟଣାକୁ ନେଇ ଚର୍ଚ୍ଚା ଜୋର୍ ଧରିଛି। କମେଣ୍ଟମରାକୁ ଗ୍ରାମସଭାରେ ବାପା ଓ ୨ ନାବାଳକ ପୁଅକୁ ଶତାଧିକ ଲୋକଙ୍କ ଆଗରେ ଆଣ୍ଠେଇବା ସହ ନିର୍ଯାତନା ଦିଆଯାଇଛି। ଏଥିସହର ଏହାର ଭିଡିଓକୁ ମଧ୍ୟ ସୋସିଆଲ ମିଡିଆରେ ଭାଇରାଲ କରାଯାଇଛି। ତେବେ ଏମାନଙ୍କ ମଧ୍ୟରୁ ଜଣେ ନାବାଳକ ଲୋକ ଲଜ୍ଜା ସହି ନ ପାରି ଫିନାଇଲ ପିଇ ଆତ୍ମହତ୍ୟା ଉଦ୍ୟମ କରିଛନ୍ତି। ଚିକିତ୍ସା ପରେ ନାବାଳକ ଜଣକ ସୁସ୍ଥ ଥିବା ସୂଚନା ମିଳିଛି। ଅଭିଯୋଗକ୍ରମେ ପୋଲିସ ଏକ ମାମଲା ମାମଲା (ନଂ.୫୯୦/୨୦୨୧) ରୁଜୁ କରି ଶୁକ୍ରବାର କାର୍ଯ୍ୟାନୁଷ୍ଠାନ ନେଇଛି। ଘଟଣା ସମ୍ପୃକ୍ତ ଅଭିଯୁକ୍ତଙ୍କ ମଧ୍ୟରୁ ବାପା ଓ ପୁଅଙ୍କୁ ପୋଲିସ ଗିରଫ କରାଯାଇଛି। ସେମାନେ ହେଲେ ବରମୁଣ୍ଡା ଗ୍ରାମର ଦିଲୀପ ପ୍ରଧାନ ଓ ତାଙ୍କ ବାପା ରମେଶ ପ୍ରଧାନ। ସମ୍ପୃକ୍ତ ଥିବା ଅନ୍ୟ ଅଭିଯୁକ୍ତମାନେ ଗିରଫ ଭୟରେ ଫେରାର ଥିବା ଜଣାପଡିଛି। ଥାନାଧିକାରୀ ଦୟାନିଧି ନାୟକ କହିଛନ୍ତି, ଏଥିରେ ଯେଉଁମାନଙ୍କ ସମ୍ପୃକ୍ତି ରହିଛି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସୂଚନା ଅନୁଯାୟୀ, ବରମୁଣ୍ଡା ଗ୍ରାମରେ ରହୁଥିବା ନାବଳକଦ୍ୱୟ ସ୍କୁଲରେ ପଢ଼ୁଥିବା ଜଣେ ନାବାଳିକା ଛାତ୍ରୀଙ୍କୁ କିଛିଦିନ ହେଲା କମେଣ୍ଟ ମାରୁଥିଲେ। ଏହାକୁ ନେଇ ପୂର୍ବରୁ ସେମାନଙ୍କ ମଧ୍ୟରେ ବଚସା ହେବା ସହ ଝଗଡ଼ା ହୋଇଥିଲା। ହେଲେ ନାବାଳକ ଦ୍ୱୟ କମେଣ୍ଟ ମାରିବା ବନ୍ଦ ନ କରିବାରୁ ଅଭିଯୁକ୍ତ ଯୁବକ ଦିଲୀପ ସୋସିଆଲ ମିଡିଆରେ ଗୁରୁବାର ଏକ ଭିଡିଓ ଛାଡ଼ି ପାଲାମଣ୍ଡପକୁ ଗ୍ରାମବାସୀଙ୍କୁ ଡାକିଥିଲେ। ସେଠାରେ ଶତାଧିକ ଲୋକ ରୁଣ୍ଡ ହୋଇଥିଲେ। ରାତି ପ୍ରାୟ ୯ଟାରେ ଆଉକିଛି ଯୁବକ ଯାଇ ନାବାଳକଦ୍ୱୟଙ୍କୁ ସେଠାକୁ ଡାକିଥିଲେ। କିଛି ସମୟ ପରେ ନାବାଳକଙ୍କ ବାପା ଓ ବଡ଼ବାପା ମଧ୍ୟ ସେଠାରେ ପହଞ୍ଚତ୍ଥିଲେ। ସେଠାରେ ସଭା ବସିଥିଲା। ଗ୍ରାମବାସୀମାନେ ସେମାନଙ୍କୁ ଆଣ୍ଠେଇବା ସହ ତଳେ ଛେପ ପକାଇ ନାକ ଘଷାଇଥିଲେ। ଧକ୍କା ମାରିବା ସହ କାନ ଧରାଇ ଉଠ୍ ବସ୍ କରାଯାଇଥିଲା। ଏହାପରେ ନାବାଳକଙ୍କ ବାପାଙ୍କଠାରୁ ମୁଚାଲିକା ଲେଖାଇ ନେଇଥିଲେ। ଅଭିଯୋଗ ହେବା ପରେ ପୋଲିସ ତଦନ୍ତ ଆରମ୍ଭ କରିଥିଲା।
