ବାରିପଦା ଅଫିସ,୨୩ା୭- ଶ୍ରାବଣ ମାସ ସରିବାକୁ ବସିଥିବା ବେଳେ ବର୍ଷାର ଦେଖା ନାହିଁ। ପ୍ରତିଦିନ ବର୍ଷା ଉଠାଇଛି ହେଲେ ବର୍ଷୁ ନାହିଁ। ସ୍ବଳ୍ପ ବର୍ଷା ଯୋଗୁ ମୟୂରଭଞ୍ଜ ଜିଲାର ଅଧିକାଂଶ ବ୍ଲକରେ ଚାଷ କାର୍ଯ୍ୟ ଆଗେଇ ପାରୁନି। ବାରିପଦା ବ୍ଲକ ବୁଢିଖମାରୀ ଗ୍ରାମର ଅଧିକାଂଶ ଜମି ବର୍ଷା ଅଭାବରୁ ଫାଟି ଆଁ କରିଥିବା ଦେଖିବାକୁ ମିଳିଛି।
ଜିଲାରେ ଜୁଲାଇ ମାସର ବର୍ତ୍ତମାନ ସୁଦ୍ଧା ୨୬ଟି ବ୍ଲକରେ ୩୭୪୮.୨ ମି.ମି. ବର୍ଷା ହୋଇଛି। ଶ୍ୟାମାଖୁଣ୍ଟାରେ ୧୩୫ ମି.ମି., ବଡ଼ସାହି ୧୭୪ ମି.ମି., ବେତନଟୀ୧୯୭ ମି.ମି., ମୋରଡ଼ା୧୯୧ ମି.ମି., ରାସଗୋବିନ୍ଦପୁର ୧୪୭.୨୦ ମି.ମି., କୁଳିଅଣା ୨୦୨.୨୦ ମି.ମି., ସାରସକଣା ୨୪୩.୪୦ ମି.ମି., ଶୁଳିଆପଦା ୧୫୦.୯୦ ମି.ମି., ବାଙ୍ଗିରିପୋଷି ୧୧୬.୨୦ ମି.ମି., ବାରିପଦାରେ ୧୫୮ ମି.ମି.,ଖୁଣ୍ଟା ୧୪୦.୭୦ ମି.ମି., ଗୋପବନ୍ଧୁନଗର ୧୪୦.୭୦ ମି.ମି., ଉଦଳା ୮୦.୮୦ ମି.ମି., କପ୍ତିପଦା ୧୫୬ ମି.ମି., ବିଶୋଇ ୨୦୨ ମି.ମି., ବିଜତଳା ୧୪୦ ମି.ମି., ରାଇରଙ୍ଗପୁର ୨୧୮ ମି.ମି., କୁସୁମି ୩୬ ମି.ମି., ଜାମଦା ୧୪୨ ମି.ମି., ବହଳଦା ୨୧୨ ମି.ମି., ତିରିଂ ୯୯.୬୦ ମି.ମି., ଯଶିପୁର ୧୪୦ ମି.ମି., କରଞ୍ଜିଆ ୬୦ ମି.ମି., ଠାକୁରମୁଣ୍ଡା ୧୩୬.୫୦ ମି.ମି., ଶୁକୃଳି ୬୪ ମି.ମି. ଓ ରରୁଁଆ ବ୍ଲକରେ ୬୫ ମି.ମି.ବର୍ଷା ହୋଇଛି। ପ୍ରତି ବ୍ଲକରେ ହାରାହାରି ୧୪୪.୧୬ ମି.ମି. ବର୍ଷା ହୋଇଛି। ଗତ ବର୍ଷ ଜୁଲାଇ ମାସରେ ଜିଲାରେ ୫୬୫୨.୩୪ ମି.ମି. ବର୍ଷା ହୋଇଥିଲା। ଯାହାକି ହାରାହାରି ୨୧୭.୪୦ ମି.ମି. ଥିଲା। ବୁଢିଖମାରୀ ଗ୍ରାମର ଚାଷୀ ରବୀନ୍ଦ୍ର ମହାନ୍ତ କୁହନ୍ତି ବର୍ଷା ନ ହେବାରୁ ଜମି ଫାଟି ଆଁ କରିଛି। କିଛିଦିନ ଭିତରେ ବର୍ଷା ନ ହେଲେ ତଳି ଶୁଖି ମରିଯିବ।
ଚଳିତ ଖରିଫ ଋତୁରେ ଜିଲାରେ ୪ ଲକ୍ଷ ୩୭ ହଜାର ହେକ୍ଟର ଜମିରେ ଚାଷ କରାଯାଇଛି। ସେଥିମଧ୍ୟରୁ ୧ ଲକ୍ଷ ୮୬ ହଜାର ୬୩ ହେକ୍ଟର ଉଚ୍ଚ ଜମି, ୧ ଲକ୍ଷ ୨୪ ହଜାର ୫୫୩ ହେକ୍ଟର ମଧ୍ୟମ ଏବଂ ୧ ଲକ୍ଷ ୨୬ ହଜାର ୩୮୪ ହେକ୍ଟର ଖାଲୁଆ ଜମି ରହିଛି। ଏହି ସବୁ ଜମିରେ ୧୨୮୦୦ କୁଇଣ୍ଟାଲ ବିହନ ବୁଣାଯାଇ ଚାଷ କାର୍ଯ୍ୟ କରାଯାଇଛି। ରାସାୟନିକ ସାର ୪୪୫୦୦ ମେଟ୍ରିକ ଟନ୍ର ଆବଶ୍ୟକତା ରହିଛି। ନିଅଣ୍ଟିଆ ବର୍ଷା ଯୋଗୁ ଚାଷ କାର୍ଯ୍ୟ ଆଗେଇବା ନେଇ ଆଶଙ୍କା ପ୍ରକାଶ ପାଇଛି। ଏସଂକ୍ରାନ୍ତରେ ଜିଲା ମୁଖ୍ୟ କୃଷି ଅଧିକାରୀ ଦାମୋଦର ସେଠୀଙ୍କୁ ପଚାରିବାରୁ ପାଣିପାଗ ଠିକ୍ ନ ହେଲେ ବିଭାଗ କ’ଣ କରିପାରିବ ବୋଲି କହିଛନ୍ତି। କାଳିଆ ଯୋଜନାରେ ମିଳିଥିବା ଟଙ୍କାରେ ଚାଷୀ ପମ୍ପସେଟ୍ କିଣି ନିକଟସ୍ଥ ନାଳରୁ ଜମିରେ ପାଣି ମଡ଼ାଇବା ପାଇଁ ସେ କହିଛନ୍ତି। ବିଭାଗ ପକ୍ଷରୁ ଚାଷୀମାନଙ୍କୁ ପମ୍ପସେଟ୍ କିଣାରେ ୫୦ ପ୍ରତିଶତ ରିହାତି ମିଳୁଥିବାରୁ ଚାଷୀମାନେ ଏହାର ଫାଇଦା ନେଇ ଚାଷ କାର୍ଯ୍ୟ କରିବା ପାଇଁ ସେ କହିଥିଲେ।
