ନୂଆଦିଲ୍ଲୀ,୨୧।୧: ୩ ନୂଆ ଚାଷୀ ଆଇନର କାର୍ଯ୍ୟକାରିତାକୁ ୧୮ ମାସ ପାଇଁ ସ୍ଥଗିତ ରଖିବାକୁ ସରକାରଙ୍କ ପକ୍ଷରୁ ଦିଆଯାଇଥିବା ପ୍ରସ୍ତାବକୁ ଗୁରୁବାର ପ୍ରତ୍ୟାଖ୍ୟାନ କରିଛନ୍ତି ଆନ୍ଦୋଳନରତ କୃଷକ ସଂଘ। ଆଇନର ପ୍ରତ୍ୟାହାର ଦାବିରେ କୃଷକାମାନେ ଅଢ଼ି ବସିଛନ୍ତି। ନୂଆ ଆଇନ ପ୍ରତ୍ୟାହାର ନ ହେବା ପର୍ଯ୍ୟନ୍ତ ସରକାରଙ୍କ କୌଣସି ପ୍ରସ୍ତାବକୁ ଗ୍ରହଣ କରାଯିବ ନାହିଁ। ଶୁକ୍ରବାର ହେବାକୁ ଥିବା ବୈଠକରେ ଆମର ଦାବି ଦୋହରାଇବୁ। ଆମେ ଆଇନର ପ୍ରତ୍ୟାହାର ଓ ଏମ୍ଏସ୍ପି ଉପରେ ଆଇନଗତ ଗ୍ୟାରେଣ୍ଟି ଚାହୁଁ ବୋଲି କୃଷକ ନେତା ଜୋଗିନ୍ଦର ଏସ୍ ଉଗ୍ରହାନ କହିଛନ୍ତି।
କୃଷକଙ୍କ ସହ ୧୦ମ ରାଉଣ୍ଡ ଆଲୋଚନାବେଳେ ସରକାର ଦେଇଥିଲେ ଏହି ପ୍ରସ୍ତାବ। ଆନ୍ଦୋଳନରତ କୃଷକଙ୍କ ସମସ୍ତ ଦାବି ଓ ନୂଆ ଆଇନକୁ ରିଭ୍ୟୁ କରିବା ଲାଗି ଏକ ସ୍ବତନ୍ତ୍ର ମିଳିତ କମିଟି ଗଠନ କରିବାକୁ ପ୍ରସ୍ତୁତ ଥିବା ସରକାର କହିଥିଲେ। ଏହି କମିଟିର ରିଭ୍ୟୁ ଶେଷ ନ ହେବା ପର୍ଯ୍ୟନ୍ତ ୩ ଚାଷୀ ଆଇନକୁ ୧୮ ମାସ ଲାଗି ସ୍ଥଗିତ ରଖିବାକୁ ସରକାର ପ୍ରସ୍ତାବ ଦେଇଥିଲେ।
