ନାଉଗାଁ,୨୪ା୧୨(ସ୍ବ.ପ୍ର): ନାଉଗାଁ ବ୍ଲକ ଜାମୁଗାଁ ପଞ୍ଚାୟତ ଅନ୍ତର୍ଗତ ୩ ରାଜସ୍ବ ଗାଁର ଧାନ କ୍ରୟ ପାଇଁ ଏକ ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି)କୁ ନିର୍ଦ୍ଦେଶ ଦିଆଯାଇଛି। ଏହାକୁ ଚାଷୀମାନେ ବିରୋଧ କରିଛନ୍ତି। ଏ ନେଇ ସେମାନେ ଗୁରୁବାର ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ଏହାର ନକଲ ଜିଲା ଯୋଗାଣ ବିଭାଗ ଅଧିକାରୀ, ମୋ ସରକାରର ମୁଖ୍ୟ, କୃଷି ସଚିବଙ୍କ ନିକଟକୁ ପଠାଯାଇଛି। ଏହି ପଞ୍ଚାୟତର ଚକୁଳିପଡା, ନନ୍ଦିଗ୍ରାମ, ଶୁଣ୍ଠଳ ଗଁାର ୧୦୦ରୁ ଊର୍ଦ୍ଧ୍ୱ ଚାଷୀ ପୂର୍ବରୁ ଖରିଫ, ରବି ଧାନ ବିକ୍ରି ପାଇଁ ତିରୁଣା ସମବାୟ ସମିତି ଉପରେ ନିର୍ଭର କରୁଥିଲେ। ମାତ୍ର ଚଳିତବର୍ଷ ଉକ୍ତ ସମିତି ବଦଳରେ ବାବା ନନ୍ଦମଣି ଏସ୍ଏଚ୍ଜିକୁ ଧାନ କ୍ରୟ ପାଇଁ ନିର୍ଦ୍ଦେଶ ଦିଆଯାଇଛି। ଏହାଦ୍ୱାରା ସମିତି ରୁଗ୍ଣ ହୋଇଗଲେ ମିଳୁଥିବା ଋଣ, ରାସାୟନିକ ସାର ଆଦି ମିଳିବାରେ ଅସୁବିଧା ହେବ। ଏ ନେଇ ଚାଷୀଙ୍କ ମତାମତ ନିଆଯାଇ ଧାନ କେଉଁଠାରେ ବିକ୍ର୍ରି କରାଯିବ ତାହା ନିରୂପଣ କରାଯାଉ ବୋଲି ଚାଷୀମାନେ ଦାବି କରିଛନ୍ତି।
