ପାରଳାଖେମୁଣ୍ଡି (ଗିରିଧାରୀ ପରିଚ୍ଛା), ୧୮ା୬: ଗଜପତି ଜିଲାର ଅଧାରୁ ଅଧିକ ଚାଷୀ ଆନ୍ଧ୍ରପ୍ରଦେଶର ଧାନ ବିହନ ଉପରେ ନିର୍ଭର କରୁଛନ୍ତି। ପ୍ରତ୍ୟେକ ବର୍ଷ ଓଡ଼ିଶା ପକ୍ଷରୁ ଯେତିକି ବିହନ ଯୋଗାଯାଉଛି ତାହା ଆବଶ୍ୟକତାର ଅଧା ହୋଇଥିବା ବେଳେ ଓଡ଼ିଶାର ଧାନ ବିହନରେ ଶତ ପ୍ରତିଶତ ଶୁଦ୍ଧତା ରହୁ ନ ଥିବା ଅନେକ ଚାଷୀ ଅଭିଯୋଗ କରୁଛନ୍ତି। ଅନ୍ୟପକ୍ଷରେ ବାହାର ରାଜ୍ୟର ଘରୋଇ ବିହନ କିଣୁଥିବାରୁ ଜିଲାର ଚାଷୀମାନେ ସବସିଡ ପାଇବାରୁ ବଞ୍ଚିତ ହେଉଥିବା ଦେଖିବାକୁ ମିଳୁଛି।
ଚଳିତ ଖରିଫ ଋତୁରେ ଗଜପତି ଜିଲାରେ ମୋଟ ୨୯ ହଜାର ହେକ୍ଟର ଜମିରେ ଧାନ ଚାଷ ହେବ। ଆଉ କିଛି ଦିନ ପରେ ମୌସୁମୀ ଆସିବା ପରେ ଚାଷୀମାନେ ଧାନ ତଳି ପକାଇବା ସହ ଧାନ ବୁଣି ଚାଷ କାର୍ଯ୍ୟ ଆରମ୍ଭ କରିବେ। ସେହିକ୍ରମରେ ଚାଷୀଙ୍କୁ ସବସିଡରେ ଧାନ ବିହନ ଯୋଗାଇବା ପାଇଁ ଓଡ଼ିଶା ସରକାରଙ୍କ ପକ୍ଷରୁ ବ୍ୟବସ୍ଥା ହୋଇଛି। ଗଜପତି ଜିଲାରେ ୧୫ ହଜାରରୁ ଅଧିକ ପଞ୍ଜୀକୃତ ଚାଷୀ ରହିଛନ୍ତି। ଚଳିତବର୍ଷ ରାଜ୍ୟ ବିହନ ନିଗମ ଲିମିଟେଡ ପକ୍ଷରୁ ଏହି ଜିଲାର ଚାଷୀଙ୍କ ପାଇଁ ୭ ହଜାର କୁଇଣ୍ଟାଲ ବିହନ ଯୋଗାଇବାକୁ ଯୋଜନା ହୋଇଛି। ଏଥିପାଇଁ ଜିଲାର ବିଭିନ୍ନ ସହର ଓ ବ୍ଲକରେ ଥିବା ୫୦ଟି ପ୍ରାଥମିକ କୃଷି ସେବା ସମବାୟ ସମିତି ଓ ୩୪ଟି ଘରୋଇ ବିହନ ବିକ୍ରୟ କେନ୍ଦ୍ରରେ ପ୍ରାଥମିକ ପର୍ଯ୍ୟାୟରେ ୩୮୦୦ କୁଇଣ୍ଟାଲ ବିହନ ଉପଲବ୍ଧ କରାଯାଇଥିବା ବେଳେ ୩୩୬୩ କୁଇଣ୍ଟାଲ ବିହନ ଗୋଦାମରେ ମହଜୁଦ ରହିଛି । ନିଗମ ପକ୍ଷରୁ ଓଡ଼ିଶାର ଚାଷୀଙ୍କୁ ସ୍ବର୍ଣ୍ଣ ସବ-୧, ପୂଜା, ଏମଟିୟୁ-୧୦୭୫, ଏମଟିୟୁ-୧୦୬୪, ଏମଟିୟୁ-୨୫୩୭, ଏମଟିୟୁ-୧୦୬୭, ଏମଟିୟୁ-୭୦୨୯, ଆରଜିଏଲ-୨୫୩୭ ଭଳି ବିଭିନ୍ନ କିସମର ବିହନ ଯୋଗାଯାଉଛି। ପଞ୍ଜିକୃତ ଚାଷୀମାନେ ନିକଟସ୍ଥ ବିହନ ବିକ୍ରୟ କେନ୍ଦ୍ରକୁ ଯାଇ ୧ କୁଇଣ୍ଟାଲ ଧାନ ବିହନ ପିଛା ୩୬୫୦ ଟଙ୍କା ପଇଠ କରି ବିହନ କିଣୁଛନ୍ତି। ପରବର୍ତ୍ତୀ ସମୟରେ ଚାଷୀଙ୍କୁ ବ୍ୟାଙ୍କ ଆକାଉଣ୍ଟକୁ ୧୫୦୦ ନତୁବା ୧୨୫୦ ଟଙ୍କା ସବସିଡ ଆସୁଛି। ତେବେ ଓଡିଶା ସରକାରଙ୍କ ପକ୍ଷରୁ ଉପରୋକ୍ତ କିସମର ବିହନ ଯୋଗାଯାଉଥିଲେ ମଧ୍ୟ ଓଡ଼ିଶାର ବିହନରେ ଶତ ପ୍ରତିଶତ ଶୁଦ୍ଧତା ରହୁନଥିବା ଅଭିଯୋଗ କରିଛନ୍ତି ଚାଷୀ। ଫଳରେ ଚାଷୀମାନେ ଆନ୍ଧ୍ରପ୍ରଦେଶର ବିଭିନ୍ନ ଘରୋଇ କମ୍ପାନୀ ପକ୍ଷରୁ ପ୍ରସ୍ତୁତ ହାଇବ୍ରିଡ ବିହନ ଉପରେ ନିର୍ଭର କରୁଛନ୍ତି। କୃଷକ ନେତା ସୂର୍ଯ୍ୟନାରାୟଣ ପଟ୍ଟନାୟକଙ୍କ ଅଭିଯୋଗ ପ୍ରକାରେ ଗଜପତି ଜିଲାରେ ପାଖାପାଖି ୧୬ ହଜାର ଚାଷୀ ରହିଥିବା ଏହି ଚାଷୀଙ୍କ ପାଇଁ ୧୫ ହଜାର କୁଇଣ୍ଟାଲ ଧାନ ବିହନ ଆବଶ୍ୟକ ହୋଇଥାଏ। ହେଲେ ରାଜ୍ୟ ସରକାର ଏହି ଜିଲା ପାଇଁ ମାତ୍ର ୭ ହଜାର କୁଇଣ୍ଟାଲ ବିହନ ଯୋଗାଉଥିବାରୁ ତାହା ଯଥେଷ୍ଟ ନୁହେଁ। ଫଳରେ ଏହି ଜିଲାର ଚାଷୀମାନେ ଆନ୍ଧ୍ରପ୍ରଦେଶର ବିହନ ଉପରେ ନିର୍ଭର କରିବାକୁ ବାଧ୍ୟ ହୋଇଥାନ୍ତି। ସେହିପରି ଓଡ଼ିଶା ସରକାରଙ୍କ ପକ୍ଷରୁ ଯୋଗାଣ ହେଉଥିବା ବିହନ ବୁଣିବା ଦ୍ବାରା ସେଥିରେ ବାଳୁଙ୍ଗା ସହ ଆନ୍ୟାନ୍ୟ ସମସ୍ୟା ଦେଖା ଦେଉଥିବାରୁ ଚାଷୀମାନେ ସବସିଡ ଟଙ୍କାକୁ ଛାଡି ଆନ୍ଧ୍ରର ଘରୋଇ କମ୍ପାନୀ ପକ୍ଷରୁ ପ୍ରସ୍ତୁତ ବିହନ ଉପରେ ଭରସା କରୁଛନ୍ତି ବୋଲି ଶ୍ରୀ ପଟ୍ଟନାୟକ କହିଛନ୍ତି । ଏହା ଦ୍ବାରା ଅନେକ ପଞ୍ଜିକୃତ ଚାଷୀ ରାଜ୍ୟ ସରକାରଙ୍କ ସବସିଡ ଟଙ୍କା ପାଇବାରୁ ବଞ୍ଚିତ ହେଉଛନ୍ତି। ତେଣୁ ରାଜ୍ୟ ସରକାର ୧୦୦ ପ୍ରତିଶତ ଶୁଦ୍ଧତା ଥିବା ବିହନ ଯୋଗାଣ କରନ୍ତୁ ବୋଲି ସେ ଦାବି କରିଛନ୍ତି। ଏ ସମ୍ପର୍କରେ ଜିଲା ମୁଖ୍ୟ କୃଷି ଅଧିକାରୀ ଆଇରେନିୟସ ପ୍ରଧାନଙ୍କୁ ପଚରାଯିବାରେ ଯେ କହିଛନ୍ତି, ଜିଲାର ଅଧିକାଂଶ ଚାଷୀ ସରକାରଙ୍କ ପକ୍ଷରୁ ଯୋଗାଣ ହେଉଥିବା ବିହନ ବ୍ୟବହାର କରୁଥିବା ବେଳେ କିଛି ଚାଷୀ ନିଜ ଦ୍ବାରା ସଂରକ୍ଷିତ ବିହନ ବ୍ୟବହାର କରୁଛନ୍ତି। ଯେହେତୁ ସୀମାନ୍ତ ଅଞ୍ଚଳ, ତେଣୁ ଅଳ୍ପ କିଛି ଚାଷୀ ନିଜ ସୁବିଧା ଓ ଇଚ୍ଛା ମୁତାବକ ଆନ୍ଧ୍ରର ଘରୋଇ କମ୍ପାନୀ ଦ୍ବାରା ପ୍ରସ୍ତୁତ ଧାନ ବିହନ ବ୍ୟବହାର କରୁଥାଇପାରନ୍ତି।
