ଭୁବନେଶ୍ୱର,୬।୧୨(ବ୍ୟୁରୋ): ଚଳିତ ବର୍ଷ ଓଡ଼ିଶାର ଚାଷ ଓ ଚାଷୀଙ୍କ ପାଇଁ କୌଣସି ଦୃଷ୍ଟିରୁ ଶୁଭଙ୍କର ହୋଇପାରିନାହିଁ। ଚାଷ କାର୍ଯ୍ୟ ଆରମ୍ଭରୁ ମୌସୁମୀର ଅନିୟମିତତା ଯୋଗୁ ତଳି ପୋଡିଗଲା। ତା’ ପରେ କେଣ୍ଡାରେ ଫସଲ ଧରିବା ସମୟରେ ଅଦିନିଆ ବର୍ଷା ଫସଲକୁ କ୍ଷତି ପହଞ୍ଚାଇଲା। ଏବେ ବାତ୍ୟା ‘ଜୱାଦ’ ଭୟରେ କେଉଁଠି ଚାଷୀ ଫସଲକୁ ଆଗୁଆ ଅମଳ କଲେ, ତ ଆଉ କେଉଁଠି ସମୟ ଅଭାବରୁ ଫସଲକୁ ସେମିତି ଭଗବାନଙ୍କ ଭରସାରେ ଛାଡିଦେଲେ। ହେଲେ ବାତ୍ୟା ଟଳିଥିଲେ ମଧ୍ୟ ଏଥିଜନିତ ବର୍ଷା ବାକିତକ ଫସଲ ମଧ୍ୟ ନଷ୍ଟ କରିଦେବାକୁ ବସିଛି। ବର୍ଷା ପାଣିରେ ପାଚିଲା ଧାନ ଶୋଇ ରହିଥିବାବେଳେ କ୍ଷେତକୁ ଦେଖି ଚାଷୀର ମନୋବଳ ଭାଙ୍ଗି ଯାଇଛି। ଏପରିସ୍ଥିତିରେ କୃଷି ବିଶେଷଜ୍ଞମାନେ ଚାଷୀଙ୍କୁ ବର୍ଷା କମିବାର ସୂଚନା ଦେବା ସହ ଜମିରୁ ଜଳ ନିଷ୍କାସନ ପାଇଁ ପରାମର୍ଶ ଦେଇଛନ୍ତି।
ରବିବାର ହୋଇଥିବା ପ୍ରବଳ ବର୍ଷାରେ ଜଗତ୍ସିଂପୁର, ନୟାଗଡ, ଗଞ୍ଜାମ, ପୁରୀ, କେନ୍ଦ୍ରାପଡା, ଭଦ୍ରକ, ବାଲେଶ୍ୱର ଆଦି ଜିଲାଗୁଡିକରେ ଧାନ ଫସଲ କ୍ଷତିଗ୍ରସ୍ତ ହୋଇଥିବାରୁ ଚାଷୀ ମୁଣ୍ଡରେ ହାତ ଦେଇ ବସିଛି। ପୁରୀ ଜିଲା କାଦୁଆ ପଞ୍ଚାୟତ ଭଟ୍ଟପୁର ଗ୍ରାମର ଚାଷୀ ସୁରେନ୍ଦ୍ର କୁମାର ନାୟକ କୁହନ୍ତି, ସେ ନିଜର ପ୍ରାୟ ୭ ଏକର ଜମିରେ ପୂଜା ଓ କନକ ପ୍ରଜାତିର ମସୁରି ଧାନ ଚାଷ କରିଥିଲେ। ଗତ ଅଦିନିଆ ବର୍ଷାରେ ଜମିରେ ପାଣି ଜମି ରହିବାରୁ ପ୍ରାୟ ୩ ଏକରର ଫସଲ ନଷ୍ଟ ହୋଇଥିଲା। ବାକି ଫସଲର ଅମଳ ପାଖେଇ ଆସୁଥିବାବେଳେ ବର୍ତ୍ତମାନର ବର୍ଷାରେ ତାହା ବୁଡ଼ି ରହିଛି। ସେହିପରି ଗାଁର ପ୍ରାୟ ୧୦୦ ଏକରରୁ ଅଧିକ ଚାଷ ଜମି ରହିଥିବାବେଳେ ୮୫ ଏକରରୁ ଊର୍ଦ୍ଧ୍ୱ ଜମିରେ ଚାଷୀମାନେ ଧାନ ଚାଷ ହୋଇଥିଲା। ବର୍ଷା ଯୋଗୁ ସବୁ ଚାଷୀ କ୍ଷତିରେ ପଡିବେ। ଏଣୁ ଆସନ୍ତା ଖରିଫ ପସଲ ପାଇଁ ମାଗଣାରେ ଚାରା କିମ୍ବା ବିହନ ଓ କ୍ଷତିପୂରଣ ପ୍ରଦାନ କରିବାକୁ ସେ ଦାବି କରିଛନ୍ତି।
ପାଣିପାଗ ବିଶେଷଜ୍ଞ ଉମାଶଙ୍କର ଦାଶ କହିଛନ୍ତି, ଆଗକୁ ଆଉ ସେହିଭଳି ବର୍ଷାର ସମ୍ଭାବନା ନାହିଁ। ସୋମବାର ଦକ୍ଷିଣ ଓଡିଶାରେ ବର୍ଷାର ସମ୍ଭାବନା ନ ଥିବାବେଳେ ଉତ୍ତର ଓ ଉପକୂଳ ଓଡିଶାରେ ସାମାନ୍ୟ ବର୍ଷା ହୋଇପାରେ। ଏହା ଚାଷୀଙ୍କ ପାଇଁ ଟିକିଏ ଆଶ୍ୱସ୍ତିକର ଖବର ହୋଇଥିବାବେଳେ ଯେଉଁ ଯେଉଁ ଜିଲାଗୁଡିକରେ ବାତ୍ୟା କାରଣରୁ ପ୍ରବଳରୁ ଅତି ପ୍ରବଳ ବର୍ଷା ହୋଇଛି, ସେଠାରେ ଧାନ ଗଛ ଭୂଇଁରେ ଶୋଇଯାଇଛି। ଏଣୁ ସେହି ଅଞ୍ଚଳଗୁଡିକରେ ଫସଲ କ୍ଷତିଗ୍ରସ୍ତ ହୋଇଛି ବୋଲି ସେ କହିଛନ୍ତି। କୃଷି ବିଶେଷଜ୍ଞ ତୁଷାର ରଞ୍ଜନ ମହନ୍ତି କହିଛନ୍ତି, ବାତ୍ୟା ସମ୍ଭାବନାକୁ ଦୃଷ୍ଟିରେ ରଖି ଚାଷୀଙ୍କୁ ବାତ୍ୟା ପୂର୍ବରୁ ୮୫ ପ୍ରତିଶତରୁ ଅଧିକ ପାଚିଯାଇଥିବା ଫସଲକୁ ଅମଳ କରିବାକୁ ପରାମର୍ଶ ଦିଆଯାଇଥିଲା। ଆଗକୁ ବର୍ଷା କମିବ ବୋଲି ପାଣିପାଗ ବିଭାଗ ଆକଳନ କରିଥିବାରୁ ଅମଳ ହୋଇପାରି ନ ଥିବା ଫସଲକୁ ଠିଆ କରି ରଖିବା ସହ ଯଥାଶୀଘ୍ର ଜମିରୁ ଜଳ ନିଷ୍କାସନ କରନ୍ତୁ। ଏଥିସହ ଜମି ଆଦର୍ର ଥିବାରୁ ଆଗାମୀ ରବି ଋତୁ ପାଇଁ ପ୍ରସ୍ତୁତ ହେବା ପାଇଁ ଚାଷୀଙ୍କୁ ସେ ଆହ୍ବାନ ଦେଇଛନ୍ତି।
