ନୂଆପଡ଼ା,୨ା୭ (ମକାରୁ ବେମାଲ):ନୂଆପଡ଼ା ଜିଲାରେ ରବି ମଣ୍ଡି ଧାନ ଉଠାଣ ଅବଧି ଜୁନ ୩୦ ରହିଥିଲା। ଜିଲାର ବିଭିନ୍ନ ମଣ୍ଡିରେ ପଡି ରହିଥିବା ଧାନକୁ ଦେଖି ରାଜ୍ୟ ସରକାର ଆଉ ୩ ଦିନ ଅବଧି ବଢାଇଛନ୍ତି ା ଜୁଲାଇ ୩ ପର୍ଯ୍ୟନ୍ତ ରବି ଧାନ କ୍ରୟ କରାଯିବ ବୋଲି ଜିଲା ପ୍ରଶାସନ ପକ୍ଷରୁ ସୂଚନା ମିଳିଛି। ଆଉ ଦୁଇ ଦିନ ମଧ୍ୟରେ ସମସ୍ତ ପଞ୍ଜୀକୃତ ଚାଷୀଙ୍କ ଧାନ କ୍ରୟ କରାଯିବା ନେଇ ଚାଷୀ ଆଶଙ୍କାରେ କରିଛନ୍ତି। ଜିଲାର ୫୧ଟି ମଣ୍ଡିରେ ପାଖାପାଖି ୨ ଲକ୍ଷରୁ ଊର୍ଦ୍ଧ୍ୱ ବସ୍ତା ଧାନ ପଡି ରହିଛି ା ଜିଲାର ୧୮ ହଜାର ୩୮୬ ଜଣ ଚାଷୀଙ୍କ ମଧ୍ୟରୁ ମଙ୍ଗଳବାର ସନ୍ଧ୍ୟା ସୁଦ୍ଧା ୧୧ ହଜାର ୧୧୦ ଜଣ ଚାଷୀଙ୍କ ୫,୬୪,୮୩.୫୦ କୁଇଣ୍ଟାଲ ଧାନ କ୍ରୟ କରାଯାଇଛି ା ୨ ଓ ୩ ତାରିଖ ଭିତରେ ୭ ହଜାର ୨୭୬ ଜଣ ଚାଷୀଙ୍କ ଧାନ କିପରି ଉଠିବ ସେ ନେଇ ଚାଷୀ ସନ୍ଦେହରେ ଅଛନ୍ତି ା ଜିଲାରେ ବର୍ତ୍ତମାନ ଦକ୍ଷିଣ-ପଶ୍ଚିମ ମୌସୁମୀ ବାୟୁ ସକ୍ରିୟ ହୋଇ ସ୍ଥାନେ ସ୍ଥାନେ ବର୍ଷା ଲାଗି ରହିଛି ା ଖୋଲା ଆକାଶ ତଳେ ଥିବା ଧାନ ବର୍ଷାରେ ଭିଜି ଗଜା ହେବାକୁ ବସିଲାଣି ା ନୂଆପଡା ସଦର ବ୍ଲକ ଖଟମନଭେରା ମଣ୍ଡିରେ ୨୨ ହଜାରରୁ ଅଧିକ ଓ ଗୋଡଫୁଲା ମଣ୍ଡିରେ ୫ ହଜାରରୁ ଅଧିକ ବସ୍ତା ଧାନ ପଡିରହିଛି। ତାରପୋଲିନ ଆଭାବ ଯୋଗୁ ବର୍ଷାରେ ଧାନ ଭିଜିବାରେ ଲାଗିଛି ା ଜିଲାରେ ୨୬ଟି ପ୍ରାଥମିକ କୃଷି ସମବାୟ ସମିତିରୁ ୫୧ଟିରେ ଧାନ କ୍ରୟ ଚାଳିଛି ା ପ୍ରଥମରୁ ସମସ୍ତ ମଣ୍ଡିରେ ଠିକ୍ ଭାବେ ଧାନ ଉଠାଣ ହୋଇଥିଲେ ଏଭଳି ସ୍ଥିତି ଭୋଗିବାକୁ ପଡି ନ ଥାନ୍ତା ଓ ଜିଲା ପ୍ରଶାସନର ଅପାରଗତା ଯୋଗୁ ଆଜି କ୍ଷତି ସହିବାକୁ ପଡୁଛି ବୋଲି ଚାଷୀ ଅଭିଯୋଗ କରିଛନ୍ତି। ଜିଲାରେ ରବି ମଣ୍ଡିରେ ସାଢେ ୭ଲକ୍ଷ କୁଇଣ୍ଟାଲ କ୍ରୟ କରିବା ପାଇଁ ଲକ୍ଷ୍ୟ ରହିଥିବା ବେଳେ ଦେଢ ମାସରେ ସାଢେ ୫ କୁଇଣ୍ଟାଲ କ୍ରୟ କରିଛନ୍ତି। ଦୁଇ ଦିନରେ ୨ ଲକ୍ଷ କୁଇଣ୍ଟାଲ ଧାନ ପ୍ରଶାସନ କିଭଳି କ୍ରୟ କରିବ ବୋଲି ଚାଷୀମାନେ ପ୍ରଶ୍ନ କରିଛନ୍ତି। ଏ ସଂକ୍ରାନ୍ତରେ ଜିଲା ସମବାୟ ଉପନିବନ୍ଧକ ଶିବ ପ୍ରସାଦ ସ୍ବାଇଁଙ୍କୁ ପଚାରିବାରୁ ବହୁ ଶୀଘ୍ର ସମସ୍ତ ଚାଷୀଙ୍କ ଧାନ ଉଠାଇବା ପାଇଁ ଚେଷ୍ଟା କରୁଛୁ। ଚାଷୀମାନେ ଭୟଭୀତ ନ ହୋଇ କୌଣସି ଭୁଲ ପଦକ୍ଷେପ ନ ନିଅନ୍ତୁ ବୋଲି ସେ କହିଛନ୍ତି।
Dharitri – Odisha’s No.1 Odia Daily
