ଭୁବନେଶ୍ୱର,୧୬ା୧୧(ବ୍ୟୁରୋ): ଇନ୍ଫୋସିଟି ଥାନା ଅନ୍ତର୍ଗତ ତପସ୍ବିନୀ କଲୋନୀରେ ଜଣେ ନାବାଳକଙ୍କୁ ଏକ ପୋଷା କୁକୁର କାମୁଡିବା ଘଟଣାକୁ ନେଇ ଉତ୍ତେଜନା ସୃଷ୍ଟି ହୋଇଛି। କୁକୁରଟିକୁ କଲୋନୀରୁ ବାହାର କରିବା ପାଇଁ ବାସିନ୍ଦା ଅଡି ବସିଥିବାବେଳେ ମାଲିକ କିନ୍ତୁ ଛାଡିବାକୁ ନାରାଜ। ଫଳରେ ଗୋଟିଏପଟେ କଲୋନୀ ବାସିନ୍ଦାଙ୍କ ସହ ଆହତ ଶିଶୁର ପରିବାର ଅନ୍ୟପଟେ କୁକୁର ମାଲିକ ଓ ପଶୁପ୍ରେମୀ ମୁହଁାମୁହିଁ ହୋଇଥିଲେ। ଦୀର୍ଘସମୟ ଧରି ଯୁକ୍ତିତର୍କ, କଥା କଟାକଟି ଓ ଛକାପଞ୍ଝା ଲାଗି ରହିଥିଲାବେଳେ କଲୋନୀବାସୀଙ୍କ ତୀବ୍ର ବିରୋଧ ଯୋଗୁ ପଶୁପ୍ରେମୀ ପୂରବୀ ପାତ୍ର ହଟହଟା ହୋଇଥିଲେ। ଶେଷରେ ପୋଲିସର ହସ୍ତକ୍ଷେପ ପରେ କୁକୁରଟିକୁ ଡଗ୍ କେୟାର ସେଣ୍ଟରକୁ ପଠାଯାଇଛି। ଅପରପକ୍ଷରେ କୁକୁରକୁ ପାଖରେ ରଖିବା ପାଇଁ ମାଲିକ କୋର୍ଟରେ ଆବେଦନ କରିଛନ୍ତି। କୋର୍ଟଙ୍କ ନିଷ୍ପତ୍ତି ଆସିବା ପର୍ଯ୍ୟନ୍ତ କୁକୁର କଲୋନୀଙ୍କୁ ନ ଆସି ଉକ୍ତ ସେଣ୍ଟରରେ ରହିବ ବୋଲି ଜଣାପଡିଛି। ଏହି ଘଟଣାକୁ ନେଇ ରାଜଧାନୀ ସମେତ ସୋସିଆଲ ମିଡିଆରେ ଚର୍ଚ୍ଚା ଲାଗି ରହିଛି।
ସୂଚନାନୁସାରେ, ତପସ୍ବିନୀ କଲୋନୀରେ ଋତୁରାଜ ଖଟୋଇ, ସ୍ତ୍ରୀ ଶୁଚିସ୍ମିତା ଓ ପୁଅ ଅର୍ଜୁନ ରୁହନ୍ତି। ଉକ୍ତ କଲୋନୀରେ ରହୁଥିବା ଶ୍ରାବଣୀ ପଟ୍ଟନାୟକ ୪ବର୍ଷ ହେବ ଏକ କୁକୁର ପାଳିଛନ୍ତି। ଉକ୍ତ କୁକୁରଟି ପୂର୍ବରୁ ଅନେକ ଲୋକଙ୍କୁ କାମୁଡିବା ଅଭିଯୋଗ ହୋଇଥିଲା। କଲୋନୀବାସୀ ଉକ୍ତ କୁକୁରଟି କଲୋନୀରେ ନ ରଖିବାକୁ ଦାବି କରି ଆସୁଥିଲେ ମଧ୍ୟ ମାଲିକ କିଛି ଶୁଣୁ ନ ଥିଲେ। ଫଳରେ ଏହାକୁ ନେଇ କଲୋନୀବାସୀଙ୍କ ସହ ଶ୍ରାବଣୀଙ୍କର ବହୁଥର ପାଟିତୁଣ୍ଡ ହୋଇଥିଲା। ଗତ ୬ତାରିଖରେ ଅର୍ଜୁନ ସାଇକେଲ ଚଲାଉଥିବାବେଳେ ସେହି କୁକୁର ତାଙ୍କୁ କାମୁଡି ଦେଇଥିଲା। ତାଙ୍କୁ ଗୁରୁତର ଅବସ୍ଥାରେ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ତାଙ୍କ ଗୋଡ଼ରେ ୧୨ଟି ଷ୍ଟିଚ୍ ପଡିଥିଲା। ଏହି ଘଟଣା ପରେ କଲୋନୀରେ ଭୟର ବାତାବରଣ ଦେଖାଯାଇଥିଲା। ଆହତ ଶିଶୁର ମା ଶୁଚିସ୍ମିତା ଥାନାରେ ଏକ ଲିଖିତ ଅଭିଯୋଗ କରିଥିଲେ। ପୋଲିସ ମାମଲା ରୁଜୁ କରିବା ସହ ଶ୍ରାବଣୀଙ୍କ ଘରକୁ ଯାଇ କୁକୁରଟି ଅନ୍ୟ କେଉଁଠି ଛାଡିଦେବାକୁ କହିଥିଲେ ମଧ୍ୟ ସେ ଶୁଣି ନ ଥିଲେ। ଆହତ ଶିଶୁର ପରିବାର ଓ କଲୋନୀବାସୀ ପୁଣି ଥରେ ଥାନାକୁ ଯାଇ କଲୋନୀରୁ କୁକୁର ବାହାର କରିବାକୁ ଦାବି କରିଥିଲେ।
ପୋଲିସ ପୁଣି ଶ୍ରାବଣୀଙ୍କ ଘରକୁ ଯାଇ କୁକୁରକୁ ଡଗ୍ କେୟାର ସେଣ୍ଟରରେ ଛାଡ଼ି ଦେବାକୁ କହିଥିଲେ। ହେଲେ ସେ ନିଜ ଜିଦ୍ରେ ଅଟଳ ରହିବାରୁ କଲୋନୀବାସୀ ତାତି ଯାଇଥିଲେ। ଦୀର୍ଘ ସମୟ ଧରି ଉତ୍ତେଜନା ଓ ବିରୋଧ ପରେ ଶେଷରେ କୁକୁରକୁ ଡଗ୍ କେୟାର ସେଣ୍ଟରକୁ ପଠାଇ ଦିଆଯାଇଥିବାରୁ କଲୋନୀବାସୀ ଏକ ପ୍ରକାର ଆଶ୍ୱସ୍ତି ଅନୁଭବ କରିଛନ୍ତି। ଆହତ ଶିଶୁର ବାପା ଋତୁରାଜ ଖଟୋଇ କହିଛନ୍ତି, କୁକୁର କାମୁଡ଼ିବା ପରଠାରୁ ପ୍ରତିଦିନ ମୋ ଛୁଆ କାନ୍ଦୁଛି, ଡରୁଛି। ମୋ ପିଲାକୁ ଟ୍ରମା କରିଛି, ଅନ୍ୟକେତେଜଣଙ୍କୁ କାମୁଡିଛି। ସେଇଟା ମାଲିକଙ୍କୁ ଦେଖାଯାଉନି। କୌଣସି ପରିସ୍ଥିତିରେ ବି ଉକ୍ତ କୁକୁରଟିକୁ କଲୋନୀରେ ରଖାଇ ଦିଆଯିବନି ବୋଲି ସେ କହିଛନ୍ତି।
