ଭୁବନେଶ୍ୱର, ୩୦।୫(ବ୍ୟୁରୋ): ଏବେ ରାଜ୍ୟରେ କରୋନା ସଂକ୍ରମଣ ହ୍ରାସ ପାଉଛି। ଲକ୍ଡାଉନ୍ ଯୋଗୁ ସଂକ୍ରମଣ ଅଧିକ ହେଲା ନାହିଁ। ତେଣୁ ଆଉ କିଛିଦିନ ଲକ୍ଡାଉନ୍ କରିବା ପାଇଁ ରାଜ୍ୟ ସରକାରଙ୍କୁ ପରାମର୍ଶ ଦେଇଛନ୍ତି ସ୍ବାସ୍ଥ୍ୟ ବିଶେଷଜ୍ଞ। ଏ ନେଇ ସ୍ବାସ୍ଥ୍ୟ ବିଶେଷଜ୍ଞ ଡା. ନିରୋଜ ମିଶ୍ର କହିଛନ୍ତି, ରାଜ୍ୟରେ ସଂକ୍ରମଣ ପିକ୍ ଅତିକ୍ରମ କରିସାରିଲାଣି। ଲକ୍ଡାଉନ୍ ଠିକ୍ ସମୟରେ ହୋଇଥିବାରୁ ଟିପିକାଲ ପିକ୍ ହେଲାନାହିଁ। ବର୍ତ୍ତମାନ ସଂକ୍ରମଣ ହାର ହ୍ରାସ ପାଇଛି। ପିକ୍ବେଳେ ସଂକ୍ରମଣ ହାର ୨୬ ପ୍ରତିଶତ ଥିବାବେଳେ ଏବେ ୧୪ ପ୍ରତିଶତ ରହିଛି। ଆଗକୁ ଆହୁରି କମିବ। ତେବେ ବର୍ତ୍ତମାନ ଯେଉଁଭଳି ଭାବେ କଟକଣା ରହିଛି ତାହା ଜାରି ରଖିବାକୁ ପଡ଼ିବ ବୋଲି ସେ କହିଛନ୍ତି। ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲ୍ୟୁଏଚ୍ଓ) ନିର୍ଦ୍ଦେଶାବଳୀ ଅନୁସାରେ, ସଂକ୍ରମଣ ହାର ୫ ପ୍ରତିଶତକୁ ନ ଆସିବା ପର୍ଯ୍ୟନ୍ତ କଟକଣା କୋହଳ କରିବା ଉଚିତ ନୁହେଁ। ଆଉ ଦୁଇ ସପ୍ତାହ ଅନ୍ତତଃ ଲକ୍ଡାଉନ କରାଯାଉ। ତା’ପରେ ସ୍ଥିତିକୁ ଦେଖି କଟକଣା ହଟେଇବାକୁ ପଡ଼ିବ। ସେହିଭଳି ଆସନ୍ତା ତିନି ଚାରି ମାସରେ ବୃହତ୍ ଭାବରେ ଟିକାକରଣ କରାଗଲେ ତୃତୀୟ ଲହର ଆସିବ ନାହିଁ। ଯଦି ଆସେ ତେବେ ଏହାର ପ୍ରଭାବ ପଡ଼ିବନି ବୋଲି ଡା. ମିଶ୍ର କହିଛନ୍ତି।
ବାତ୍ୟା ପରଠାରୁ ରାଜ୍ୟରେ ଆକ୍ରାନ୍ତ ସଂଖ୍ୟା କମ୍ ରହୁଛି। କମ୍ ଟେଷ୍ଟିଂ ଯୋଗୁ କମ୍ ସଂକ୍ରମିତ ଚିହ୍ନଟ ହେଉଥିବା କୁହାଯାଉଛି। ପୂର୍ବରୁ ୧୦ହଜାର ଉପରେ ଚିହ୍ନଟ ହେଉଥିବାବେଳେ ୩ଦିନ ହେବ ଏହା ତଳକୁ ରହୁଛି। କିନ୍ତୁ ମୃତ୍ୟୁ ସଂଖ୍ୟା କମିବାର ନାଁ ଧରୁନି। ଗତ ୨୪ଘଣ୍ଟାରେ ମଧ୍ୟ ୭,୧୮୮ ଆକ୍ରାନ୍ତ ଚିହ୍ନଟ ହୋଇଥିବାବେଳେ ୩୫ ଆକ୍ରାନ୍ତଙ୍କ ମୃତ୍ୟୁ ଘଟିଛି। ନୂଆ ଆକ୍ରାନ୍ତଙ୍କ ମଧ୍ୟରେ ଖୋର୍ଦ୍ଧା ଜିଲାରୁ ସର୍ବାଧିକ ୧,୧୩୪ଜଣ ରହିଥିବାବେଳେ କଟକରୁ ୬୯୦, ଅନୁଗୋଳ ୫୧୫, ପୁରୀ ୪୫୭, ଯାଜପୁର ୪୦୬, ମୟୂରଭଞ୍ଜ ୩୨୦, ବରଗଡ଼ ୨୭୧, ବୌଦ୍ଧ ୨୫୭, ଢେଙ୍କାନାଳ ୨୫୫, ନୟାଗଡ଼ ୨୪୨, ନବରଙ୍ଗପୁର ୨୧୬ ଓ କୋରାପୁଟରୁ ୨୦୨ଜଣ ରହିଛନ୍ତି। ରାଜ୍ୟର ବାକିସବୁ ଜିଲାରେ ଦୁଇଶହଠାରୁ କମ୍ ଆକ୍ରାନ୍ତ ଚିହ୍ନଟ ହୋଇଛନ୍ତି। ଫଳରେ ମୋଟ ସଂକ୍ରମିତଙ୍କ ସଂଖ୍ୟା ୭,୪୭,୧୪୩ରେ ପହଞ୍ଚତ୍ଛି। ସେହିଭଳି ୩୫ଜଣ ମୃତକଙ୍କ ମଧ୍ୟରେ ଅନୁଗୋଳରୁ ସର୍ବାଧିକ ୫ଜଣ ଥିବାବେଳେ ରାୟଗଡ଼ା ଓ କଳାହାଣ୍ଡିରୁ ୪ଜଣ ଲେଖାଏ, ସୁନ୍ଦରଗଡ଼, ଝାରସୁଗୁଡ଼ା, ଖୋର୍ଦ୍ଧା ଓ ନବରଙ୍ଗପୁରରୁ ୩ଜଣ ଲେଖାଏ, ବୌଦ୍ଧ, ଜଗତ୍ସିଂହପୁର ଓ କୋରାପୁଟରୁ ୨ଜଣ ଲେଖାଏ, କଟକ, ମାଲକାନଗିରି, ସମ୍ବଲପୁର ଓ ସୁବର୍ଣ୍ଣପୁରରୁ ଜଣେ ଲେଖାଏ ରହିଛନ୍ତି। ଏମାନଙ୍କୁ ମିଶାଇ କରୋନାଜନିତ ମୃତ୍ୟୁ ସଂଖ୍ୟା ୨,୬୮୬କୁ ବୃଦ୍ଧି ପାଇଛି।
ଅନ୍ୟପକ୍ଷରେ ଶନିବାର ଆଉ ୧୧,୫୧୩ଜଣ ଆକ୍ରାନ୍ତ ସୁସ୍ଥ ହୋଇଥିବାରୁ ଆରୋଗ୍ୟ ସଂଖ୍ୟା ୬,୫୮,୬୪୬କୁ ବୃଦ୍ଧି ପାଇଛି। ବର୍ତ୍ତମାନ ରାଜ୍ୟରେ ୮୫,୭୫୮ଜଣ ସକ୍ରିୟ ରୋଗୀ ରହିଛନ୍ତି। ସକ୍ରିୟ ରୋଗୀ କମିବା ପରେ ନୂଆପଡ଼ା ଜିଲା ୟେଲୋ ଜୋନ୍ରୁ ଗ୍ରୀନ୍ ଜୋନ୍କୁ ଚାଲିଯାଇଛି। ଏହି ଜିଲାରେ ଏବେ ସର୍ବନିମ୍ନ ୪୭୩ଜଣ ସକ୍ରିୟ ରୋଗୀ ରହିଛନ୍ତି। ଦ୍ୱିତୀୟ ଲହର ଆରମ୍ଭରୁ ନୂଆପଡ଼ା ସମେତ ଛତିଶଗଡ଼ର ସୀମାନ୍ତ ଜିଲାରେ ଦୈନିକ ସଂକ୍ରମଣ ସର୍ବାଧିକ ରହୁଥିଲା। ରାଜ୍ୟ ସରକାର ସୀମା ସିଲ୍ କରିବାକୁ ବାଧ୍ୟ ହୋଇଥିଲେ। ଏବେ କିନ୍ତୁ ଏସବୁ ସ୍ଥାନରେ କମ୍ ସଂକ୍ରମଣ ଚିହ୍ନଟ ହୋଉଛନ୍ତି। ତେବେ ଖୋର୍ଦ୍ଧା ଜିଲାରେ ସର୍ବାଧିକ ୧୨,୨୯୮ଜଣ ସକ୍ରିୟ ରୋଗୀ ରହିଛନ୍ତି।
