ବାଲେଶ୍ୱର ଅଫିସ, ୧୧।୬ ନବଜାତ ଶିଶୁର ମୃତ୍ୟୁକୁ ନେଇ ଶୁକ୍ରବାର ବାଲେଶ୍ୱର ଜିଲା ମୁଖ୍ୟ ଚିକିତ୍ସାଳୟରେ ଉତ୍ତେଜନା ଦେଖାଦେଇଛି। ଡାକ୍ତରଖାନା ଅଧିକାରୀ ଓ ପୋଲିସ ପହଞ୍ଚତ୍ ଲୋକଙ୍କୁ ବୁଝାଶୁଝା କରିବା ପରେ ଉତ୍ତେଜନା ଥମିଥିଲା। ଚିକିତ୍ସାରେ ଅବହେଳା ଓ ଡାକ୍ତରଙ୍କ ଅନୁପସ୍ଥିତିରେ ନର୍ସଙ୍କ ଦ୍ୱାରା ପ୍ରସବ କରାଯାଇଥିବାରୁ ନବଜାତକର ମୃତ୍ୟୁ ହୋଇଥିବା ମୃତ ଶିଶୁର ବାପା ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି।
ସୋର ବ୍ଲକ ସରଶଙ୍ଖ ଗ୍ରାମର ଦିବ୍ୟଜ୍ୟୋତି ଓଝାଙ୍କ ସ୍ତ୍ରୀଙ୍କ ପ୍ରସବଜନିତ ଯନ୍ତ୍ରଣା ହେବାରୁ ଗୁରୁବାର ତାଙ୍କୁ ସୋର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ସେଠାରେ ଗର୍ଭଯନ୍ତ୍ରଣା ଅଧିକ ହେବାରୁ ଡାକ୍ତର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଥିଲେ। ରାତି ପ୍ରାୟ ୨ଟା ବେଳେ ପରିବାର ଲୋକେ ପ୍ରସୂତିଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଥିଲେ। ରାତି ସାରା ପ୍ରସୂତି କକ୍ଷରେ ସେ ଯନ୍ତ୍ରଣାରେ ଛଟପଟ ହେଉଥିବା ବେଳେ ଡ୍ୟୁଟିରେ ଥିବା ନର୍ସମାନେ ଡାକ୍ତର ନ ଥିବା କହି ଅପେକ୍ଷା କରିବାକୁ କହିଥିଲେ। ଡାକ୍ତର ଆସିଲେ ରୋଗୀଙ୍କୁ ଦେଖି ଚିକିତ୍ସା କରିବା ସହ ପ୍ରସବ କରାଯିବ ବୋଲି ପରିବାର ଲୋକଙ୍କୁ ଆଶ୍ୱାସନା ଦେଇଥିଲେ। ଅପରପକ୍ଷେ ବିନା ଅସ୍ତ୍ରୋପଚାରରେ ପ୍ରସବ କରାଇଦେବାକୁ କହି ତାଙ୍କ ପରିବାର ଲୋକଙ୍କୁ ଟଙ୍କା ମାଗିଥିଲେ। ପରିବାର ଲୋକେ ଏଥିରେ ରାଜି ହୋଇଥିବା ବେଳେ ନର୍ସମାନେ ପ୍ରସବ କରାଇବା ପାଇଁ ଉଦ୍ୟମ କରିଥିଲେ। ଶୁକ୍ରବାର ସକାଳ ସାଢେ ୭ଟାରେ ଏକ ଶିଶୁପୁତ୍ର ଜନ୍ମ ହୋଇଥିଲା। ମାତ୍ର କିଛି ସମୟ ପରେ ଶିଶୁଟିର ମୃତ୍ୟୁ ହୋଇଯାଇଥିଲା। ଅନ୍ୟପଟେ ନବଜାତ ଶିଶୁର ବେକରେ ଆଘାତ ଲାଗି କଳା ପଡ଼ିଥିବା ଦେଖି ନର୍ସମାନେ ଠିକ୍ ଭାବେ ପ୍ରସବ କରାଇ ନ ଥିବା ପରିବାର ଲୋକେ ଅଭିଯୋଗ କରି ମେଡ଼ିକାଲ ପରିସରରେ ପାଟିତୁଣ୍ଡ କରିଥିଲେ। ପ୍ରାୟ ୨ଘଣ୍ଟା ଧରି ଉତ୍ତେଜନା ଲାଗି ରହିଥିଲା। ଘଟଣାସ୍ଥଳରେ ମେଡ଼ିକାଲ ଅଧିକାରୀ ଓ ଟାଉନ ଥାନା ପୋଲିସ ପହଞ୍ଚତ୍ ଲୋକଙ୍କୁ ବୁଝାଶୁଝା କରିବା ପରେ ପରିସ୍ଥିତି ନିୟନ୍ତ୍ରଣାଧୀନ ହୋଇଥିଲା। ଏନେଇ ଫକୀରମୋହନ ମେଡ଼ିକାଲ କଲେଜ ପ୍ରଶାସନିକ ଅଧିକାରୀ ମନୋରମା ଭୂୟାଁ କହନ୍ତି, ନବଜାତକର ମୃତ୍ୟୁ ଘଟଣା ଅତ୍ୟନ୍ତ ଦୁଃଖଦାୟକ। କିନ୍ତୁ ସୋର ଡାକ୍ତରଖାନାରୁ ଯେତେବେଳେ ତାଙ୍କୁ ଅଣାଯାଇଥିଲା, ସେତେବେଳେ ଶିଶୁର ଅବସ୍ଥା ସଙ୍କଟାପନ୍ନ ଥିଲା। ସମୟନୁସାରେ ପ୍ରସୂତି କକ୍ଷରେ ଥିବା ଡାକ୍ତର ଏବଂ ନର୍ସମାନେ ଯଥାସମ୍ଭବ ଚେଷ୍ଟା କରି ପ୍ରସବ କରାଇଥିଲେ ମଧ୍ୟ ପରେ ତା’ର ମୃତ୍ୟୁ ହୋଇଯାଇଥିଲା।
