ସେପ୍ଟିକ ଟାଙ୍କି ସଫା କରିବାର ଆଉ ଟେନ୍ସନ ରହିବ ନାହିଁ, କାରଣ ଆଇଆଇଟି ମାଡ୍ରାସର ଗବେଷକମାନେ ଏବେ ବିକାଶ କରିଛନ୍ତି ଏକ ନୂତନ ରୋବୋ ଯାହା କମ୍ ସମୟରେ ସେପ୍ଟିକ ଟାଙ୍କି ସଫା କରିଦେଉଛି। ଏହାକୁ ନିକଟରେ ପରୀକ୍ଷା କରାଯାଇଛି। ତାମିଲନାଡୁ ଓ ମହାରାଷ୍ଟ୍ର ସରକାର ମଧ୍ୟ ଏହାକୁ କାର୍ଯ୍ୟରେ ଲାଗାଇବା ଲାଗି ବିଚାର କରୁଛନ୍ତି। ପ୍ରାଧ୍ୟାପକ ପ୍ରଭୁ ରାଜଗୋପାଳଙ୍କ ନେତୃତ୍ୱରେ ଗବେଷକ ଟିମ ଏହି ରୋବୋ ନିର୍ମାଣ କରିଛନ୍ତି। ଏହାର ନାମ ରଖାଯାଇଛି ହୋମୋସେପ୍। ଏହା ଟାଙ୍କି ମଧ୍ୟରେ କଠିନ ମଳକୁ ତରଳ ଆକାର କରି ବାହାରକୁ ନେଇଆସୁଛି। ଗବେଷକମାନେ ନିର୍ମାଣ କରିଥିବା ପ୍ରଥମ ଦୁଇଟି ରୋବୋକୁ ସଫେଇ ସମୟରେ ମୃତ୍ୟୁ ଘଟିଥିବା ଦୁଇ ଜଣ କର୍ମଚାରୀଙ୍କ ସ୍ତ୍ରୀକୁ ଦିଆଯାଇଛି। ହୋମୋସେପ ପୂର୍ବରୁ ଗବେଷକମାନେ ସେପୋୟ-ରୋବୋ ନିର୍ମାଣ କରିଥିଲେ। କିନ୍ତୁ ତା’କାର୍ଯ୍ୟରେ ସଫେଇ କର୍ମଚାରୀମାନେ ସନ୍ତୁଷ୍ଟ ନ ହେବାରୁ ଏଭଳି ନୂତନ ରୋବୋ ନିର୍ମାଣ କରାଯାଇଛି ଓ ଏହାଦ୍ୱାରା ପାରମ୍ପରିକ ସଫେଇଜନିତ ମୃତ୍ୟୁ ଆଉ ହେବନି ବୋଲି କହନ୍ତି ପ୍ରଫେସର ରାଜଗୋପାଳ। ସଫେଇ କର୍ମଚାରୀ ଆନ୍ଦୋଳନ(ଏସ୍କେଏ)ର ଏକ ଟିମ୍ ଗବେଷକମାନଙ୍କୁ ସହଯୋଗ କରୁଛନ୍ତି। ଦୁଇଟି ରୋବୋ ବଣ୍ଟନ କରିବା ପରେ ଏବେ ଆଉ ୮ଟିର ନିର୍ମାଣ କାର୍ଯ୍ୟ ଜାରି ରହିଛି।
