ଜୟପୁର, ୯ା୧୧: ନିଜ ପ୍ରେମିକାଙ୍କୁ ଜୀବନସାଥୀ କରିବା ପାଇଁ ରାଜସ୍ଥାନର ଜଣେ ଶିକ୍ଷୟିତ୍ରୀ ନେଇଛନ୍ତି ଏକ ଭିନ୍ନ ଢଙ୍ଗର ନିଷ୍ପତ୍ତି। ପିଇଟି (ଫିଜିକାଲ ଏଜୁକେଶନ୍ ଟିଚର୍) ମୀରା ନିଜ ଲିଙ୍ଗ ପରିବର୍ତ୍ତନ କରି ପ୍ରେମିକା କଳ୍ପନାଙ୍କୁ ଜୀବନସାଥୀ ଭାବେ ଆପଣାଇଛନ୍ତି। ଏବେ ଆରଭ କୁନ୍ତଲ ନାମରେ ପରିଚିତି। ମୀରାଙ୍କ ମତରେ ପ୍ରେମରେ ପଡ଼ିଥିବା ମଣିଷ ପକ୍ଷେ କୌଣସି କାର୍ଯ୍ୟ ଅସମ୍ଭବ ନୁହେଁ।
ରାଜସ୍ଥାନ ଭରତପୁର ସ୍କୁଲରେ ପିଇଟି ଭାବେ କାର୍ଯ୍ୟ କରୁଥିବା ମୀରା ଓ ସେହି ସ୍କୁଲର ଛାତ୍ରୀ କଳ୍ପନାଙ୍କ ପ୍ରେମ କାହାଣୀ ଆରମ୍ଭ ହୋଇଥିଲା ବିଦ୍ୟାଳୟ ଖେଳପଡ଼ିଆରୁ। କଳ୍ପନା କବାଡ଼ି ଖେଳରେ ନିପୁଣ ହୋଇଥିବାବେଳେ ଶାରୀରିକ ଶିକ୍ଷା ତାଙ୍କୁ ନିହାତି ଭାବେ ଆବଶ୍ୟକ ପଡ଼ୁଥିଲା। ସେଥିପାଇଁ ସେ ମୀରାଙ୍କ ସହ ଅଧିକ ସମୟ ବିତାଉଥିଲେ। ଦିନ ବିତିବା ସାଙ୍ଗଙ୍କୁ ଦୁହିଁଙ୍କ ଭିତରେ ପ୍ରେମ ସମ୍ପର୍କ ଗଢ଼ିଉଠିଥିଲା। ପରବର୍ତ୍ତୀ ସମୟରେ ସେମାନେ ବାହା ହେବାପାଇଁ ନିଷ୍ପତ୍ତି ନେଲେ। କଳ୍ପନା କବାଡ଼ିରେ ନିଜ କ୍ୟାରିୟର୍କୁ ଆଗକୁ ନେବା ପାଇଁ ଯୋଜନା କରୁଥିବାବେଳେ ଆସନ୍ତା ଜାନୁୟାରୀରେ ଦୁବାଇରେ ହେବାକୁ ଥିବା ଇଣ୍ଟରନ୍ୟାଶନାଲ କବାଡ଼ି ଟୁର୍ନାମେଣ୍ଟରେ ସେ ଅଂଶଗ୍ରହଣ କରିବେ।
ଝିଅ ହୋଇ ଜନ୍ମ ହୋଇଥିବା ମୀରାଙ୍କର ବ୍ୟବହାର ଓ ହାବଭାବ ସବୁ ପୁଅ ପିଲାଙ୍କ ପରି। ସେ କେବେହେଲେ ଜଣେ ଝିଅ ହୋଇ ରହିବାକୁ ଚାହୁଁ ନ ଥିଲେ। ଲିଙ୍ଗ ପରିବର୍ତ୍ତନ ଚିନ୍ତା ବହୁବାର ତାଙ୍କ ମନରେ ଆସିଥିଲେ ମଧ୍ୟ ଏ ନେଇ ସେ ସାହସ ବାନ୍ଧି ପାରୁ ନ ଥିଲେ। କିନ୍ତୁ ଯେତେବେଳେ କଳ୍ପନା ତାଙ୍କ ଜୀବନକୁ ଆସିଲେ ସେତେବେଳେ ସେ ଏହି ଜଟିଳ ସର୍ଜରି କରିବା ପାଇଁ ନିଷ୍ପତ୍ତି ନେଲେ। ମୀରା ନିଜର ପ୍ରଥମ ସର୍ଜରି ୨୦୧୯ ଡିସେମ୍ବରରେ କରିଥିଲେ। ସର୍ଜରି ପାଇଁ ସେ କଳ୍ପନାଙ୍କ ପରାମର୍ଶ ଲୋଡ଼ିଥିବା ପ୍ରକାଶ କରିଛନ୍ତି। ମୀର ସମ୍ପୂର୍ଣ୍ଣ ଭାବେ ଆରଭ ପାଲଟିବା ପରେ ଗତ ରବିବାର ଦୁହେଁ ବିବାହ ବନ୍ଧନରେ ବାନ୍ଧି ହୋଇଛନ୍ତି। ବିବାହକୁ ନେଇ କଳ୍ପନା କୁହନ୍ତି, ମୀରା ଲିଙ୍ଗ ପରିବର୍ତ୍ତନ କରି ଆରଭ ହୋଇ ନ ଥିଲେ ମଧ୍ୟ ସେ ତାଙ୍କୁ ବିବାହ କରିଥାନ୍ତେ। ଉଭୟଙ୍କ ବିବାହରେ ସେମାନଙ୍କ ପରିବାର ବେଶ୍ ଖୁସି ଅଛନ୍ତି।
