ଭୁବନେଶ୍ୱର,୯।୧୨(ବ୍ୟୁରୋ):ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ପକ୍ଷରୁ ରାଜଧାନୀରେ ସରକାରୀ ଜମି ଜବରଦଖଲ ଉଚ୍ଛେଦ କରାଯାଉଛି। ହେଲେ ବିରୋଧ ଯୋଗୁ ଉଚ୍ଛେଦ ବାଧାପ୍ରାପ୍ତ ହେଉଛି। ଗୁରୁବାର ଏନ୍ଫୋର୍ସମେଣ୍ଟ ସ୍କ୍ବାଡ୍ ୧, ୨, ୩ ଏବଂ ୪ ବିମାନବନ୍ଦର ଓ କ୍ୟାପିଟାଲ ଥାନା ଅଧୀନରୁ ବ୍ୟାପକ ଜବରଦଖଲ ହଟାଇଥିଲେ। ହେଲେ ୟୁନିଟ-୬ସ୍ଥିତ ଗଙ୍ଗନଗର ଅଞ୍ଚଳରେ ଥିବା ପୁମାସ ଇଣ୍ଟରନ୍ୟାଶନାଲ ଜୁଡୋ ଟ୍ରେନିଂ ସେଣ୍ଟରକୁ ଭାଙ୍ଗିବା ସମୟରେ କଂଗ୍ରେସ ନେତା ତଥା ଆଇନ୍ଜୀବୀ ଶିବାନନ୍ଦ ରାୟ ବିରୋଧ କରିଥିଲେ। ପ୍ରବଳ ବିରୋଧ ସହିତ ୫ଦିନ ସମୟ ମଧ୍ୟରେ ସେଣ୍ଟର ଭାଙ୍ଗିବାକୁ ଅଣ୍ଡରଟେକିଂ ଲେଖିବା ପରେ ଉଚ୍ଛେଦ ବନ୍ଦ ରହିଥିଲା। ବିଡିଏ ପକ୍ଷରୁ ଏନଫୋର୍ସମେଣ୍ଟ ଅଫିସର ପ୍ରମୋଦ କୁମାର ପାତ୍ର, ଜନସମ୍ପର୍କ ଅଧିକାରୀ ଶୁଭ୍ରାଂଶୁ ଶେଖର ମହାନ୍ତି, ଜିଏ ବିଭାଗ ଅତିରିକ୍ତ ନିର୍ଦ୍ଦେଶକ ଅମିୟ କୁମାର ଦାଶ, ଖଣ୍ଡଗିରି ଥାନାଧିକାରୀ ମଧୁସୂଦନ ଭୋଇଙ୍କ ସମେତ ଏକ ପ୍ଲାଟୁନ୍ ପୋଲିସ୍ ଫୋର୍ସ ଉପସ୍ଥିତ ଥିଲେ।
ଅପରପକ୍ଷେ ଭୀମପୁର ମୌଜାର ରାଜସ୍ବ ବିଭାଗ ଅଧୀନ ପ୍ଲଟ ନଂ. ୫୬ରୁ ଜବରଦଖଲ ଉଚ୍ଛେଦ କରାଯାଇଛି। ସଂପୃକ୍ତ ଅଞ୍ଚଳରୁ ପ୍ରାୟ ୨ହଜାର ବର୍ଗଫୁଟ ସରକାରୀ ଜମି ଜବରଦଖଲ ମୁକ୍ତ ହୋଇଛି। ସେହିପରି ସ୍ବାର୍ଡ଼ ୯, ୧୦, ୧୧ ଓ ୧୨ ପକ୍ଷରୁ ଆଚାର୍ଯ୍ୟ ବିହାରରୁ ଜୟଦେବ ବିହାର ଛକ ପର୍ଯ୍ୟନ୍ତ ଉଚ୍ଛେଦ କରାଯାଇଛି। ଲକ୍ଷ୍ମୀସାଗର, ଝାରପଡ଼ା, ବାପୁଜୀନଗର, କଳ୍ପନା ଛକସ୍ଥିତି ଫଳ ଭେଣ୍ଡିଂ ଜୋନ୍, ବମିଖାଲ ଆଦି ଅଞ୍ଚଳରେ ଖାଦ୍ୟ ନିରାପତ୍ତା, ପରିମଳ ରକ୍ଷା ଯାଞ୍ଚ ପାଇଁ ବିଭିନ୍ନ ଦୋକାନ, ବଜାର ଏବଂ ହୋଟେଲରେ ଚଢ଼ାଉ କରାଯାଇଥିଲା। ଏହି କ୍ରମରେ ୧୦ କେଜି ପଲିଥିନ୍ ଜବତ କରାଯିବା ସହ ମୋଟ ୨୮ ହଜାର ୫୦୦ ଟଙ୍କା ଜରିମାନା ଆଦାୟ କରାଯାଇଥିଲା। ସ୍କ୍ବାଡ୍ ନମ୍ବର ୧୩, ୧୪, ୧୫ ଓ ୧୬ କଳିଙ୍ଗ ଷ୍ଟୁଡ଼ିଓ ଛକରୁ ପଟାସ ଛକ ମଧ୍ୟରେ ଗଢ଼ିଉଠିଥିବା ବେଆଇନ୍ ନିର୍ମାଣକୁ ମାଟିରେ ମିଶାଇଥିଲେ। ଅନ୍ୟପଟେ ସ୍କ୍ବାଡ୍ ନମ୍ବର ୫, ୬, ୭ ଓ ୮ ରଘୁନାଥପୁର, କିଟ୍ ରୋଡ୍, ପ୍ରଶାନ୍ତି ବିହାର ଅଞ୍ଚଳରେ ଥିବା ରାସ୍ତାକଡ଼ରୁ ଜବରଦଖଲ ହଟାଇଥିଲେ। ତେବେ ପରିମଳ କ୍ଷେତ୍ରରେ ଖିଲାପ କାରଣରୁ କେତେଜଣ ବ୍ୟବସାୟୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି। ଏହି କ୍ରମରେ ମୋଟ ୮ହଜାର ଟଙ୍କା ଜରିମାନା ଆଦାୟ କରାଯାଇଥିଲା।
