କର୍ଲାମୁଣ୍ଡା,୩।୨(ଡି.ଏନ.ଏ.): ମଣ୍ଡିରେ ଧାନ ବିକ୍ରି କରିବା ୭୨ ଘଣ୍ଟା ଭିତରେ ଚାଷୀଙ୍କ ଆକାଉଣ୍ଟକୁ ଟଙ୍କା ଜମା କରାଯିବା ନିୟମ ରହିଛି। ହେଲେ ଚାଷୀମାନେ ସମୟ ସୀମା ଭିତରେ ପ୍ରାପ୍ୟ ରାଶି ପାଇପାରୁ ନ ଥିବା ଅଭିଯୋଗ ହେଉଛି। କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକର ଚାଷୀମାନେ ଏପରି ଅଭିଯୋଗ କରିଛନ୍ତି। ଅଭିଯୋଗ ମତେ ଏହି ବ୍ଲକର ସଦର ପ୍ରାଥମିକ କୃଷି ସମବାୟ ସମିତି ଜରିଆରେ ରିଞ୍ଜା ସବମଣ୍ଡିରେ ଚାଷୀ ଧନପତି ସାହୁ ଡିସେମ୍ବର ୬ ତାରିଖରେ ୫୭.୩୭ କୁଇଣ୍ଟାଲ, ଚାଷୀ ଚିନ୍ତାମଣି ସାହୁ ଡିସେମ୍ବର ୨୩ରେ ୩୨.୮୭ କୁଇଣ୍ଟାଲ, ସ. ମାଲପଡା ମଣ୍ଡିରେ ଚାଷୀ ସୁରେନ୍ଦ୍ର ସାହୁ ଡିସେମ୍ବର ୯ ତାରିଖରେ ୩୦.୨୧ କୁଇଣ୍ଟାଲ, ଚାଷୀ କନିଷ୍ଠ ରଣା ଡିସେମ୍ବର ୩୦ ତାରିଖରେ ୩୮.୭୬ କୁଇଣ୍ଟାଲ, କର୍ଲାମୁଣ୍ଡା ମଣ୍ଡିରେ ଚାଷୀ ଶକୁନ୍ତଳା ସାହୁ ଡିସେମ୍ବର ୨୭ ତାରିଖରେ ୩୧.୧୬ କୁଇଣ୍ଟାଲ, ଚାଷୀ ଉମାକାନ୍ତ ଭୋଇ ଡିସେମ୍ବର ୧୩ ତାରିଖରେ ୭୫ କୁଇଣ୍ଟାଲ ଧାନ ବିକ୍ରି କରିଥିଲେ। କିନ୍ତୁ ବର୍ତ୍ତମାନ ସୁଦ୍ଧା ଟଙ୍କା ପାଇ ନ ଥିବା ଜଣାପଡ଼ିଛି। ଏ ନେଇ ଯୋଗାଣ ଅଧିକାରୀ ସନ୍ତାକାର ପଧାନଙ୍କୁ ପଚାରିବାରୁ ଆମ ହାତରେ କିଛି ନାହିଁ ବୋଲି କହିଥିଲେ। ଅନ୍ୟପଟେ ପ୍ରାଥମିକ କୃଷି ସମବାୟ ସମିତି ସମ୍ପାଦକ ଭବାନୀ ଶଙ୍କର ସାହୁଙ୍କୁ ପଚାରିବାରୁ ଆମେ ପ୍ରଶାସନ ନିକଟରେ ସୂଚନା ଦେଇସାରିଛୁ ବୋଲି କହିଛନ୍ତି। ଏ ଦିଗରେ ପଦକ୍ଷେପ ନେବାକୁ ଚାଷୀମାନେ ଅନୁରୋଧ କରିଛନ୍ତି।
