ଜଗତ୍ସିଂହପୁର ଅଫିସ, ୨୨ା୧୦: ବଙ୍ଗେପସାଗରରେ ସୃଷ୍ଟ ଲଘୁଚାପଜନିତ ସମ୍ଭାବ୍ୟ ବାତ୍ୟାର ମୁକାବିଲା ନେଇ ଶୁକ୍ରବାର ଜଗତ୍ସିଂହପୁର ଜିଲା ପ୍ରଶାସନ ପକ୍ଷରୁ ଓସ୍ୱାନ ଭିଡିଓ କନ୍ଫରେନ୍ସିଂ ଜରିଆରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ଜିଲାପାଳ ପାରୁଲ ପଟୱାରୀ ପୌରୋହିତ୍ୟ କରି କି ପ୍ରକାର ସତର୍କତା ଓ ପ୍ରସ୍ତୁତି କରିବାକୁ ପଡିବ ସେ ସମ୍ପର୍କରେ ଆଲୋଚନା କରିଥିଲେ । ବିଶେଷକରି ବିଡିଓ, ତହସିଲଦାର, କ୍ଷେତ୍ରୀୟ ଅଧିକାରୀ ଓ ଜିଲାସ୍ତରୀୟ ଅଧିକାରୀମାନଙ୍କୁ ପୂର୍ଣ୍ଣ ଭାବେ ପ୍ରସ୍ତୁତ ରହିବାକୁ ନିର୍ଦ୍ଦେଶ ଦେଇଥିଲେ। ଜିଲାପାଳ କହିଥିଲେ, ଓଡ଼ିଶାରେ ବାତ୍ୟା ଲ୍ୟାଣ୍ଡଫଲ କରିବ ନାହିଁ ବୋଲି ଭାରତୀୟ ପାଣିପାଗ ବିଭାଗ ସୂଚନା ଦେଇଛି। କିନ୍ତୁ ଏହା ପ୍ରଭାବରେ ଅଧିକ ବର୍ଷା ହେବ। ତେଣୁ ଜିଲା ଜରୁରୀ ବିଭାଗ ସମେତ ସମସ୍ତ ବ୍ଲକ, ତହସିଲ, କ୍ଷେତ୍ରୀୟ ଅଧିକାରୀଙ୍କ କାର୍ଯ୍ୟାଳୟରେ ନିୟନ୍ତ୍ରଣ କକ୍ଷ ଚାଲୁ ରହିବ। ତା’ପୂର୍ବରୁ କର୍ତ୍ତବ୍ୟରେ ଥିବା ଅଧିକାରୀ ଓ କର୍ମଚାରୀମାନଙ୍କ ଡ୍ୟୁଟି ଚାର୍ଟ ଜିଲା କାର୍ଯ୍ୟାଳୟକୁ ପ୍ରେରଣ କରିବାକୁ ହେବ। ଡିଜିଟାଲ ମୋବାଇଲ ରେଡିଓ କମ୍ୟୁନିକେଶନ୍ ସ୍ଥାପନ ହେବ। ତଳିଆ ଅଞ୍ଚଳରେ ପାଣି ଜମି ରହିବା ସମ୍ଭାବନା ଅଧିକ। ସେ ଦୃଷ୍ଟିରୁ ଆବଶ୍ୟକସ୍ଥଳେ ଜନସାଧାରଣଙ୍କୁ ବହୁମୁଖୀ ବାତ୍ୟା, ବନ୍ୟା ଆଶ୍ରୟସ୍ଥଳ, ବିଦ୍ୟାଳୟ ଓ ସରକାରୀ କୋଠାଗୁଡିକୁ ସ୍ଥାନାନ୍ତର କରିବା ଜରୁରୀ। ବିଶେଷକରି ବୃଦ୍ଧା, ବୃଦ୍ଧ, ଭିନ୍ନକ୍ଷମ, ମହିଳା ଓ ଶିଶୁଙ୍କୁ ଅଗ୍ରାଧିକାର ଭିତ୍ତିରେ ସ୍ଥାନାନ୍ତର କରିବାକୁ ପଡିବ। ସମସ୍ତ ସ୍ଥାୟୀ ଓ ଅସ୍ଥାୟୀ ଆଶ୍ରୟସ୍ଥଳୀକୁ ଚିହ୍ନଟ କରି ଜିଓ ଟ୍ୟାଗ୍ କରିବାକୁ ହେବ। ଏଥିସହ ଆଶ୍ରୟସ୍ଥଳୀ ଦାୟିତ୍ୱରେ ୨ଜଣ ପୁରୁଷ ଓ ଜଣେ ମହିଳା କର୍ମଚାରୀ (ଆଶା, ଅଙ୍ଗନୱାଡି କର୍ମୀ, ଶିକ୍ଷୟିତ୍ରୀ, ମହିଳା କନ୍ଷ୍ଟେବଳ କିମ୍ବା ହୋମଗାର୍ଡ) ରହିବେ। ସମସ୍ତ ଆଶ୍ରୟସ୍ଥଳୀକୁ ସ୍ଥାନୀୟ ବିଡିଓ, ତହସିଲଦାର ତଦାରଖ କରିବେ। କୌଣସି ସ୍ଥାନରେ ଯେପରି ପାନୀୟ ଜଳ, ଟଏଲେଟ୍, ଜେନେରେଟର, ଟାୱାର ଲାଇଟ୍, ମେକାନିକାଲ କଟର ଏବଂ ଅନ୍ୟାନ୍ୟ ସାମଗ୍ରୀର ସମସ୍ୟା ରହିବ ନାହିଁ। ବିଭିନ୍ନ ବିଭାଗର କାର୍ଯ୍ୟାଳୟ ଓ ସ୍ବାସ୍ଥ୍ୟ ବିଭାଗରେ ଜେନେରେଟର ଓ ଇନ୍ଧନ ବ୍ୟବସ୍ଥା ଆଗୁଆ କରିବାକୁ ପଡିବ। ଯେଉଁ ଗର୍ଭବତୀ ମହିଳାଙ୍କ ପ୍ରସବ ସମୟ ହୋଇ ଯାଇଥିବ ସେମାନଙ୍କୁ ଚିଠି କରି ଚିକିତ୍ସା କେନ୍ଦ୍ରକୁ ସ୍ଥାନାନ୍ତର ପାଇଁ ଜିଲା ମୁଖ୍ୟ ଚିକିତ୍ସା ଅଧିକାରୀ ପଦକ୍ଷେପ ନେବେ। ଦିନେ ଦୁଇଦିନ ମଧ୍ୟରେ ସମ୍ଭାବ୍ୟ ପରିସ୍ଥିତି ସମ୍ପର୍କରେ ସୂଚନା ଆସିଯିବ। ଜିଲାର ଜନସାଧାରଣ କୌଣସି ପ୍ରକାର ଆତଙ୍କିତ ନ ହେବାକୁ ଜିଲାପାଳ ପରାମର୍ଶ ଦେଇଛନ୍ତି। ଶନିବାର ସୁଦ୍ଧା ସମୁଦ୍ର ମଧ୍ୟକୁ ଯେପରି କୌଣସି ମତ୍ସ୍ୟଜୀବୀ ନ ଯାଆନ୍ତି ସେ ସମ୍ପର୍କରେ ନିଶ୍ଚିତ କରିବାକୁ ଜିଲା ମତ୍ସ୍ୟ ଅଧିକାରୀ ସୁନିଶ୍ଚିତ କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ବୈଠକରେ ଅତିରିକ୍ତ ଜିଲାପାଳ ସଚିଦାନନ୍ଦ ସାହୁ, ଚିନ୍ମୟୀ ବିଶ୍ୱାଳ, ପାରାଦୀପ ଅତିରିକ୍ତ ଜିଲାପାଳ କାହ୍ନୁ ଚରଣ ଧୀର, ଉପଜିଲାପାଳ ଧର୍ମେନ୍ଦ୍ର ମଲ୍ଲିକଙ୍କ ସମେତ ସମସ୍ତ ବିଡିଓ, ତହସିଲଦାର ଓ କ୍ଷେତ୍ରୀୟ ଅଧିକାରୀ ପ୍ରମୁଖ ଉପସ୍ଥିତ ରହି ଆଲୋଚନାରେ ଭାଗ ନେଇଥିଲେ ।
