ଲଣ୍ଡନ,୭।୭: ୟୁରୋକପ୍ର ପ୍ରଥମ ସେମିଫାଇନାଲ ମୁକାବିଲାରେ ଦୁଇ ଫୁଟବଲ ପାଓ୍ବାର ହାଉସ୍ ଇଟାଲୀ ଓ ସ୍ପେନ ମୁହାଁମୁହିଁ ହେବେ। ବୁଧବାର ସ୍ଥାନୀୟ ଓ୍ବିମ୍ବଲି ଷ୍ଟାଡିୟମରେ ଆୟୋଜନ ହେବାକୁ ଥିବା ୟୁରୋକପ୍ ଫୁଟବଲ ଟୁର୍ନାମେଣ୍ଟର ଏହି ମ୍ୟାଚ୍ ଉପରେ ସମସ୍ତଙ୍କ ନଜର ରହିଛି। କ୍ୱାର୍ଟର ଫାଇନାଲରେ ସ୍ପେନ୍ ପେନାଲ୍ଟି ଜରିଆରେ ୩-୧ ଗୋଲରେ ସୁଇଜରଲାଣ୍ଡକୁ ହରାଇ ସେମିକୁ ଉଠିଥିଲା। ସେହିପରି ଇଟାଲୀ ୨-୧ ଗୋଲରେ ଶକ୍ତିଶାଳୀ ତଥା ଅନ୍ୟତମ ଫେଭରାଇଟ ଦଳ ବେଲଜିୟମକୁ ହରାଇ ସେମିରେ ପ୍ରବେଶ କରିଥିଲା। ସବୁ ଦୃଷ୍ଟିକୋଣରୁ ଉଭୟ ଦଳ ସମାନ ଭାବେ ଶକ୍ତିଶାଳୀ ମନେ ହେଉଛନ୍ତି। ଡିଫେନ୍ସ, ଆଟାକରେ ଇଟାଲୀ ବେଶ ଦୃଢ ମନେହେଉଛି। ଦଳରେ ମଧ୍ୟ ସନ୍ତୁଳନ ରହିଛି। ଏ ନେଇ ସ୍ପେନ କୋଚ୍ ଲୁଇସ୍ ଏନ୍ରିକ ଅବଗତ ରହିଛନ୍ତି। ୧୯୯୪ ବିଶ୍ୱକପ୍ କ୍ୱାର୍ଟର ଫାଇନାଲରେ ଇଟାଲୀ ୧-୦ ଗୋଲରେ ସ୍ପେନ୍କୁ ହରାଇଥିଲା। ସେତେବେଳେ ଏନ୍ରିକ ସ୍ପେନ୍ ଦଳର ସଦସ୍ୟ ଥିଲେ। ତେଣୁ ଏନ୍ରିକ ଏହାର ମଧୁର ପ୍ରତିଶୋଧ ନେବାକୁ ପ୍ରୟାସ କରିବେ। ୨୦୦୮ ପର୍ଯ୍ୟନ୍ତ ଗତ ୮୮ ବର୍ଷ ମଧ୍ୟରେ ସ୍ପେନ୍ କେବେ ବି ଇଟାଲୀକୁ ହରାଇ ନାହିଁ। ୨୦୦୮ରେ ସ୍ପେନ୍ ୟୁରୋକପ୍ କ୍ୱାର୍ଟର ଫାଇନାଲରେ ଇଟାଲୀକୁ ହରାଇଥିଲା ଓ ପରେ ଫାଇନାଲରେ ବିଜୟୀ ହୋଇ ୪୪ ବର୍ଷ ପରେ ଟାଇଟଲ ଜିତିଥିଲା। ଏହାର ୪ ବର୍ଷ ପରେ ୨୦୧୨ରେ ସ୍ପେନ୍ ପୁଣିଥରେ ଇଟାଲୀକୁ ୟୁରୋକପ୍ରେ ୪-୦ରେ ହରାଇ ଇତିହାସ ସୃଷ୍ଟି କରିଥିଲା।
ଟୁର୍ନାମେଣ୍ଟରେ ସ୍ପେନ୍ର ହାରହାରି ବୟସ ୨୪.୧ ରହିଛି। ଦଳରେ ଯୁବ ଖେଳାଳି ଅଧିକ ରହିଛନ୍ତି। କିନ୍ତୁ ଦଳରେ ଅଭିଜ୍ଞତା କମ୍ ରହିଛି ବୋଲି ସେ ସ୍ବୀକାର କରିଛନ୍ତି। ୧୯୬୮ରେ ଇଟାଲୀ ୟୁରୋକପ୍ ଟାଇଟଲ ଜିତିଥିଲା। ସେହିପରି ୨୦୦୦ ଓ ୨୦୧୨ରେ ଇଟାଲୀ ଫାଇନାଲରେ ପରାସ୍ତ ହୋଇ ରନର୍ସଅପ ବିବେଚିତ ହୋଇଥିଲା। ଗତ ୧୪ଟି ମୁକାବିଲାରେ ଇଟାଲୀଠାରୁ ସ୍ପେନ୍ ମାତ୍ର ୨ଟି ମ୍ୟାଚ୍ରେ ପରାସ୍ତ ହୋଇଛି। ଇଟାଲୀର ଡିଫେନ୍ସ ଓ ଆଟାକ ମଧ୍ୟ ଉଚ୍ଚକୋଟୀର ରହିଛି। ଏହି ମୁକାବିଲା ବେଶ୍ ରୋମାଞ୍ଚକ ତଥା ସଂଘର୍ଷପୂର୍ଣ୍ଣ ହେବ ବୋଲି ଆଶା କରାଯାଉଛି।
