ଭୁବନେଶ୍ୱର,୨୨।୭(ସ୍ପୋଟର୍ସ ବ୍ୟୁରୋ): ପୁରୀର କୁମ୍ଭପଡ଼ାରେ ରହୁଥିବା ଶାଶ୍ୱତ ରଞ୍ଜନ ସାହୁ ଏକ ସ୍ବତନ୍ତ୍ର ଉପାୟରେ ଅଲିମ୍ପିକ୍ସ ଲୋଗୋ ତିଆରି କରିଛନ୍ତି। ଶୁକ୍ରବାରଠାରୁ ଟୋକିଓରେ ଅଲିମ୍ପିକ୍ସ ଆରମ୍ଭ ହେବାକୁ ଯାଉଥିବା ବେଳେ ସେ ଦିଆସିଲି କାଠିରେ ଅଲିମ୍ପିକ୍ସ ଲୋଗୋ ତିଆରି କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି। ୯୩୦ଟି କାଠିରେ ଏହି ଲୋଗୋ ତିଆରି କରିବାକୁ ତାଙ୍କୁ ଗୋଟିଏ ଦିନ ସମୟ ଲାଗିଥିଲା। ଏହି ଲୋଗୋ ମାଧ୍ୟମରେ ସେ ଭାରତୀୟ ଆଥ୍ଲେଟଙ୍କୁ ସଫଳତା ପାଇଁ ଶୁଭେଚ୍ଛା ଜଣାଇଛନ୍ତି। ଏହି କ୍ରମରେ ସେ କେନ୍ଦ୍ର କ୍ରୀଡ଼ା ମନ୍ତ୍ରଣାଳୟ ଦ୍ୱାରା ଆରମ୍ଭ କରାଯାଇଥିବା ‘#ଚିୟର4ଇଣ୍ଡିଆ’ ଅଭିଯାନକୁ ସମର୍ଥନ କରିଛନ୍ତି। ୫ଟି ରଙ୍ଗର ରିଙ୍ଗ୍କୁ ନେଇ ଅଲିମ୍ପିକ୍ ସିମ୍ବଲ ବା ଲୋଗୋ ତିଆରି ହୋଇଛି। ନୀଳ, ହଳଦିଆ, କଳା, ସବୁଜ ଓ ନାଲି ରଙ୍ଗର ରିଙ୍ଗ୍ ବାମରୁ ଡାହାଣ ଆଡକୁ ରହିଛି। ବିଶ୍ୱର ୫ଟି ମହାଦେଶର ଆଥ୍ଲେଟ ଅଲିମ୍ପିକ୍ସ ମାଧ୍ୟମରେ ଏକାଠି ହୋଇଥାନ୍ତି ଓ ଏହାକୁ ସୂଚାଇବା ପାଇଁ ଅଲିମ୍ପିକ ଲୋଗୋର ବ୍ୟବହାର ହୋଇଥାଏ।
