ଅହମଦାବାଦ,୧୦।୩ (ପି.ଟି.): ଭାରତ ବିପକ୍ଷରେ ଚତୁର୍ଥ ଟେଷ୍ଟ ଖେଳିବା ଅବସରରେ ଇଂଲଣ୍ଡ ଖେଳାଳିମାନେ ଓଜନ ହରାଇଥିଲେ ବୋଲି ଅଲରାଉଣ୍ଡର ବେନ୍ ଷ୍ଟୋକ୍ସ କହିଛନ୍ତି। ମ୍ୟାଚ୍ ପୂର୍ବରୁ ଆମ ଖେଳାଳିମାନଙ୍କ ପାକସ୍ଥଳୀରେ ସମସ୍ୟା ଦେଖାଦେଇଥିଲା ବୋଲି ସେ କହିଛନ୍ତି।
ଏହି ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ଇଂଲଣ୍ଡ ୧-୩ ବ୍ୟବଧାନରେ ପରାସ୍ତ ହୋଇଥିଲା। ଚତୁର୍ଥ ଟେଷ୍ଟରେ ଇଂଲଣ୍ଡ ଏକ ଇନିଂସ ଓ ୨୫ ରନରେ ପରାସ୍ତ ହୋଇଥିଲା। ଅହମଦାବାଦରେ ୪୧ ଡିଗ୍ରୀ ତାପମାତ୍ରରେ ଖେଳିବା ଆମ ପାଇଁ ଏକ ବଡ଼ ଚ୍ୟାଲେଞ୍ଜ ଥିଲା। ଆମ ଦଳରେ କେତେଜଣ ସଦସ୍ୟ ଅସୁସ୍ଥ ହୋଇପଡିଥିଲେ ବୋଲି ଷ୍ଟୋକ୍ସ ‘ଡେଲି ମିରର’କୁ ସାକ୍ଷାତକାର ଦେବା ଅବସରରେ କହିଛନ୍ତି।
ଗୋଟିଏ ସପ୍ତାହରେ ଡମ୍ ସିବ୍ଲି ୪ କେ.ଜି., ଜିମ୍ମି ଆଣ୍ଡରସନ ୩ କେ.ଜି. ଓ ମୁଁ ୫ କେ.ଜି. ଓଜନ ହରାଇଛୁ। ସେହିପିର ଜ୍ୟାକ୍ ଲିଚ୍ ପ୍ରତ୍ୟେକ ବୋଲିଂ ସ୍ପେଲ୍ ପରେ ପ୍ୟାଭିଲିୟନ ଫେରି ଟଏଲେଟ୍ ଯାଉଥିଲେ । ତେବେ ପରାଜୟ ପାଇଁ ଏହି ଘଟଣାକୁ ଦାୟୀ କରୁନାହିଁ। ଭାରତୀୟ ଉଇକେଟକିପର ବ୍ୟାଟ୍ସମ୍ୟାନ ରିଷଭ ପନ୍ତ ଚମତ୍କାର ଖେଳିଥିଲେ। ଇଂଲଣ୍ଡକୁ ଜିତାଇବା ପାଇଁ ଆମେ ଯଥାସମ୍ଭବ ପ୍ରୟାସ କରିଥିଲୁ। ଏବେ ପ୍ରଦର୍ଶନରେ କିଭଳି ଉନ୍ନତି ଆଣିବୁ ସେ ନେଇ ପ୍ରୟାସ କରିବୁ ବୋଲି ଷ୍ଟୋକ୍ସ କହିଛନ୍ତି। ଦଳରେ ଏକାଧିକ ଖେଳାଳି ପ୍ରଥମଥର ପାଇଁ ଭାରତ ଗସ୍ତ କରିଥିଲେ। ଅର୍ଥାତ ଭାରତରେ ଖେଳିବାର ଅଭିଜ୍ଞତା ଏମାନଙ୍କ ପାଖରେ ନ ଥିଲା। ତେବେ ଏହା କ୍ରିକେଟର ଅଂଶବିଶେଷ। ଓଲି ପୋପ୍, ଜ୍ୟାକ କ୍ରଲି ଓ ଡୋମ ସିବ୍ଲିଙ୍କ ଭଳି ଯୁବ ଖେଳାଳି ଏହି ସିରିଜରେ ଉତ୍ସାହଜନକ ପ୍ରଦର୍ଶନ କରିଥିଲେ। ଏହି ପରାଜୟକୁ ପଛରେ ପକାଇ ଆଗକୁ ବଢିବାକୁ ହେବ ବୋଲି ଷ୍ଟୋକ୍ସ କହିଛନ୍ତି। ଏବେ ଇଂଲଣ୍ଡ ଓ ଭାରତ ଏକ ୫ ମ୍ୟାଚ୍ ବିଶିଷ୍ଟ ଟି୨୦ ସିରିଜ ଖେଳିବେ। ୧୨ ତାରିଖ ଶୁକ୍ରବାର ପ୍ରଥମ ଟି୨୦ ମ୍ୟାଚ୍ ଖେଳାଯିବ।
