ଲଣ୍ଡନ,୨୧।୯: ସୁରକ୍ଷାଗତ କାରଣ ଦର୍ଶାଇ ପାକିସ୍ତାନରୁ ନ୍ୟୁଜିଲାଣ୍ଡ ଫେରିବାର ୩ ଦିନ ପରେ ପାକିସ୍ତାନ କ୍ରିକେଟ ବୋର୍ଡ(ପିସିବି)କୁ ଆଉ ଏକ ଶକ୍ତ ଧକ୍କା ଲାଗିଛି। ପରବର୍ତ୍ତୀ ମାସରେ ଇଂଲଣ୍ଡର ଉଭୟ ପୁରୁଷ ଓ ମହିଳା ଦଳ ପାକିସ୍ତାନ ଗସ୍ତରେ ଆସି ଅନ୍ତର୍ଜାତୀୟ ସିରିଜ୍ ଖେଳିଥାନ୍ତେ। କିନ୍ତୁ ଏହି ଗସ୍ତକୁ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ବାତିଲ କରିବା ପରେ ସମ୍ପୂର୍ଣ୍ଣ ସଙ୍କଟରେ ପଡ଼ିଯାଇଛି ପାକିସ୍ତାନ କ୍ରିକେଟ।
ଆସନ୍ତା ଅକ୍ଟୋବର ୧୩ ଓ ୧୪ ତାରିଖରେ ରାଓ୍ବଲପିଣ୍ଡିଠାରେ ପାକିସ୍ତାନ ଓ ଇଂଲଣ୍ଡ ମଧ୍ୟରେ ଦୁଇଟି ଟି୨୦ ଅନ୍ତର୍ଜାତୀୟ ମ୍ୟାଚ୍ ଖେଳାଯିବାର ଥିଲା। ସେହିଭଳି ଇଂଲଣ୍ଡର ମହିଳା ଦଳ ୧୭ରୁ ୨୧ ତାରିଖ ମଧ୍ୟରେ ଘରୋଇ ଦଳ ସହ ୩ ଦିନିକିଆ ମ୍ୟାଚ୍ ଖେଳିଥାନ୍ତେ। ଉଭୟ ସିରିଜ୍ରୁ ଇସିବି ସୋମବାର ଓହରିଯିବାକୁ ନିଷ୍ପତ୍ତି ନେଇଛି।
ଇସିବିର ଏଭଳି ନିଷ୍ପତ୍ତିରେ ପୂରା ଭାଙ୍ଗିପଡ଼ିଛନ୍ତି ପିସିବିର ନୂଆ ସଭାପତି ରମିଜ ରାଜା। ”ଇଂଲଣ୍ଡ ତା’ର ଚୁକ୍ତିରୁ ଓହରିବା ଯାଇଥିବାରୁ ଦୁଃଖିତ। ସବୁଠୁ ଅଧିକ ଆବଶ୍ୟକ ଥିବା ବେଳେ କ୍ରିକେଟ ଜଗତ ବିଫଳ ହୋଇଛି। ଏହା ପାକିସ୍ତାନ ଦଳ ପାଇଁ ଏକ ଆହ୍ବନ। ବିଶ୍ୱର ଶ୍ରେଷ୍ଠ ଭଳି ଆମକୁ ଖେଳିବାକୁ ପଡ଼ିବ, ଯେମିତି ପାକିସ୍ତାନ ସହ ଖେଳିବା ପାଇଁ ବିନା କୌଣସି ବାହାନାରେ ଅନ୍ୟ ଦଳମାନେ ଧାଡ଼ି କରି ଛିଡ଼ାହେବେ“ ବୋଲି ରମିଜ ଟୁଇଟ୍ କରିଛନ୍ତି।
