ନୂଆଦିଲ୍ଲୀ, ୨୬।୭- ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ-୨୦୨୦) ଆସନ୍ତା ସେପ୍ଟେମ୍ବର ୧୯ରୁ ଆରମ୍ଭ ହେବ ବୋଲି ଏହାର ଗଭର୍ନିଂ କାଉନ୍ସିଲ ଚେୟାରମ୍ୟାନ ବ୍ରିଜେଶ ପଟେଲ ଘୋଷଣା କରିଛନ୍ତି। ଫଳରେ ଏହାକୁ ନେଇ ତତ୍ପରତା ପ୍ରକାଶ ପାଇଛି। ତେବେ ଇଂଲଣ୍ଡ ଓ ଅଷ୍ଟ୍ରେଲିଆ ଖେଳାଳିମାନେ ଏହି ଲିଗ୍ର ପ୍ରଥମ ସପ୍ତାହରେ ଖେଳିବା ସମ୍ଭାବନା କମ୍ ବୋଲି ନଜରକୁ ଆସିଛି। କାରଣ ଅଷ୍ଟ୍ରେଲିଆ ଦଳର ଇଂଲଣ୍ଡ ଗସ୍ତ ସେପ୍ଟେମ୍ବର ୧୬ ପର୍ଯ୍ୟନ୍ତ ଚାଲିବ। ଇଂଲଣ୍ଡ-ଅଷ୍ଟ୍ରେଲିଆ ତୃତୀୟ ଦିନିକିଆ ଓଲ୍ଡ ଟ୍ରାଫୋଡରେ ସେପ୍ଟେମ୍ବର ୧୬ରେ ଖେଳାଯିବ। ତେଣୁ ଏହି ଦୁଇ ଦଳର ଖେଳାଳି ସେହି ଦିନ କିମ୍ବା ପରଦିନ ଲଣ୍ଡନରୁ ଦୁବାଇ ବିମାନଯାତ୍ରା କରିବେ। ସେମାନେ ୟୁଏଇରେ ପହଞ୍ଚତ୍ବାପରେ ସ୍ଥାନୀୟ ସରକାରଙ୍କ ନିର୍ଦ୍ଦେଶାବଳି ଅନୁସାରେ କୋଭଡ-୧୯ ଟେଷ୍ଟ ଦେବେ। ରିପୋର୍ଟ ନେଗେଟିଭ୍ ଆସିବା ପରେ ଯାଇ ଖେଳାଳି ୟୁଏଇ ସରକାରଙ୍କ ଆଇସୋଲେଶନ ଜୋନ୍ରୁ ବାହାରକୁ ଆସିପାରିବେ। ଏହି ପ୍ରକ୍ରିୟା ପାଇଁ ୪୮ରୁ ୭୨ ଘଣ୍ଟା ଲାଗିବ। ଏହା ବ୍ୟତୀତ ଆଇପିଏଲ ୨୦୨୦ ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ଧାର୍ଯ୍ୟ କରିଥିବା ଏସଓପିକୁ ଖେଳାଳି ଓ ଫ୍ରାଞ୍ଚାଇଜ୍କୁ ଅନୁସରଣ କରିବାକୁ ପଡ଼ିବ। ଏହି ସବୁ ପ୍ରକ୍ରୟା ସରିବା ପାଇଁ ୭ରୁ ୧୦ ଦିନ ସମୟ ଲାଗିଯିବ। ଏହା ପରେଯାଇ ଇଂଲଣ୍ଡ ଓ ଅଷ୍ଟ୍ରେଲିଆ ଖେଳାଳିମାନେ ସେମାନଙ୍କ ଫ୍ରାଞ୍ଚାଇଜ୍ ଦଳରେ ଯୋଗ ଦେଇ ପାରିବେ। ତେଣୁ ସେମାନେ ପ୍ରଥମ ସପ୍ତାହ ମିସ୍ କରିବା ଏକପ୍ରକାର ନିଶ୍ଚିତ। ବିସିସିଆଇ ଓ ଆଇପିଏଲ ଗଭର୍ନିଂ କାଉନ୍ସିଲ ଖୁବ୍ ଶୀଘ୍ର ଫ୍ରାଞ୍ଚାଇଜ୍, ଖେଳାଳି ଓ ଅଂଶୀଦାର ଗୁଡ଼ିକ ପାଇଁ ଏସଓପି ଜାରି କରିବାକୁ ଯାଉଛି। ଏହାକୁ କଡ଼ାକଡ଼ି ପାଳନ କରାଯିବ। ବ୍ୟୟବହୁଳ ଆଇପିଏଲରେ ଅଷ୍ଟ୍ରେଲିଆର ୧୭ ଓ ଇଂଲଣ୍ଡର ୧୧ ଖେଳାଳି ଖେଳିବାକୁ ଚୁକ୍ତିବଦ୍ଧ ହୋଇଛନ୍ତି। ଏମାନଙ୍କ ମଧ୍ୟରେ ଷ୍ଟିଭ୍ ସ୍ମିଥ, ଡେଭିଡ ଓ୍ବାର୍ନର, ପ୍ୟାଟ୍ କୁମିନ୍ସ, ବେନ୍ ଷ୍ଟୋକ୍ସ, ଜୋଫ୍ରା ଆର୍ଚରଙ୍କ ପରି ନାମୀ ଖେଳାଳି ଅଛନ୍ତି।
