ଚେନ୍ନାଇ, ୭ା୨- ଏଠାରେ ଚାଲିଥିବା ପ୍ରଥମ କ୍ରିକେଟ ଟେଷ୍ଟ ମ୍ୟାଚ୍ ସମ୍ପୂର୍ଣ୍ଣ ରୂପେ ଇଂଲଣ୍ଡ ନିୟନ୍ତ୍ରଣରେ ରହିଛି। ଭ୍ରମଣକାରୀ ଦଳ ପ୍ରଥମ ଇନିଂସରେ ୫୭୮ ରନ୍ରେ ଅଲଆଉଟ୍ ହେବା ପରେ ଅନଭିଜ୍ଞ ସ୍ପିନର ଡୋମିନିକ୍ ବେସ୍ ଭାରତୀୟ ଦଳ ପାଇଁ ଘାତକ ସାବ୍ୟସ୍ତ ହୋଇଛନ୍ତି। ୩ୟ ଦିବସ ଶେଷ ସୁଦ୍ଧା ଟିମ୍ ଇଣ୍ଡିଆ ୬ ଉଇକେଟ ହରାଇ ୨୫୭ ରନ୍ କରିବାକୁ ସକ୍ଷମ ହୋଇଛି।
ଅସମାପ୍ତ ପ୍ରଥମ ଇନିଂସ ସ୍କୋର(୫୫୫/୮)ରୁ ବ୍ୟାଟିଂ ଆରମ୍ଭ କରିଥିବା ଇଂଲଣ୍ଡ ବଳକା ଦୁଇ ଉଇକେଟରେ ମାତ୍ର ୨୩ ରନ୍ ଯୋଡ଼ି ପାରିଥିଲା। ଫଳରେ ୫୭୮ ରନ୍ରେ ସୀମିତ ରହିଥିବା ଭ୍ରମଣକାରୀ ଇଂଲଣ୍ଡ। ରବିଚନ୍ଦ୍ରନ ଅଶ୍ୱିନ ଓ ଯଶପ୍ରୀତ ବୁମରା ହାତେଇଥିଲେ ଗୋଟିଏ ଲେଖାଏ ଉଇକେଟ। ଏହାପରେ ବ୍ୟାଟିଂ କରିଥିବା ଟିମ୍ ଇଣ୍ଡିଆ ପ୍ରଥମ ୧୦ ଓଭର ମଧ୍ୟରେ ହିଁ ଦୁଇ ଓପନର ରୋହିତ ଶର୍ମା (୬) ଓ ଶୁବମାନ ଗିଲ (୨୯)ଙ୍କ ଉଇକେଟ ହରାଇଥିଲା। ଦୁହିଁଙ୍କ ଉଇକେଟ ନେଇଥିଲେ ଜୋଫ୍ରା ଆର୍ଚ୍ଚର। ସେମାନଙ୍କ ପରେ ଅଧିନାୟକ ବିରାଟ କୋହଲି (୧୧) ଓ ଉପ ଅଧିନାୟକ ଅଜିଙ୍କ୍ୟ ରାହାନେ (୧) ଆଗ ପଛ ହୋଇ ପ୍ୟାଭେଲିଅନ ଫେରିଥିଲେ। ଏହାପରେ ଚେତ୍ତେଶ୍ୱର ପୂଜାରା ଓ ଋଷଭ ପନ୍ତ ଚତୁର୍ଥ ଉଇକେଟ ପାଇଁ ଦଳୀୟ ସ୍କୋରରେ ଯୋଡ଼ି ଥିଲେ ୧୧୯ ରନ୍। ଧୈର୍ଯ୍ୟର ସହ ଖେଳୁଥିବା ପୂଜାରା (୭୩) ଆଉଟ୍ ହେବା ପରେ ମାତ୍ର ୯ ରନ୍ରେ ଶତକ ହାତଛାଡ଼ କରିଥିଲେ ପନ୍ତ (୯୧)। ଏହାପରେ ଓ୍ବାଶିଂଟନ ସୁନ୍ଦର (୩୩*) ଓ ଅଶ୍ୱିନ (୮*) ବ୍ୟାଟିଂ କରି ପ୍ରତିପକ୍ଷ ବୋଲରଙ୍କୁ ଦେଇ ନ ଥିଲେ ଉଇକେଟ ନେବାର ସୁଯୋଗ। ଫଳରେ ତୃତୀୟ ଦିନ ସୁଦ୍ଧା ଭାରତ ୬ ଉଇକେଟ ହରାଇ ୧୫୭ ରନ୍ କରିଛି। ଦଳ ହାତରେ ୪ ଉଇକେଟ ବାକି ଥିବାବେଳେ ଇଂନିସ ଅଗ୍ରଣୀ ପାଇଁ ଆହୁରି ୩୨୧ ରନ ଦରକାର। ଇଂଲଣ୍ଡ ପାଇଁ ଆର୍ଚ୍ଚର ୨ ଓ ଡୋମିନିକ ବେସ ୪ ଉଇକେଟ ନେଇଛନ୍ତି।
