ନୂଆଦିଲ୍ଲୀ,୧୪।୧: ପାକିସ୍ତାନକୁ ଚେତାବନୀ ଦେଇଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ। ଦେଶ ପିଓକେକୁ ବ୍ୟବହାର କରି ଆତଙ୍କବାଦ ବୃଦ୍ଧି ଲାଗି ଚେଷ୍ଟା କରାଯାଉଛି। ସେଠାରେ ଆତଙ୍କବାଦୀଙ୍କ ପାଇଁ ତାଲିମ ଶିବିର ଚାଲିଛି। ସୀମା ସଂଲଗ୍ନ ଅଞ୍ଚଳରେ ଲଞ୍ଚ ପ୍ୟାଡ୍ ନିର୍ମାଣ କରାଯାଇଛି। ଏ ବିଷୟରେ ନିଶ୍ଚିତ ସୂଚନା ମିଳିଛି। ଭାରତ ସରକାର ସବୁକିଛି ଜାଣୁଛନ୍ତି। ପାକିସ୍ତାନକୁ ଏହି ରୋଗକୁ ମୂଳୋତ୍ପାଟନ କରିବାକୁ ପଡିବ ନଚେତ୍ ଡଟ୍ ଡଟ୍ ଡଟ୍ ବୋଲି ସେ କହିଛନ୍ତି।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମଙ୍ଗଳବାର ଜମ୍ମୁ ଓ କାଶ୍ମୀରରେ ପହଞ୍ଚିଛନ୍ତି। ସେ ଅଖନୁର ସେକ୍ଟରର ଟାଣ୍ଡା ଆର୍ଟିଲାରୀ ବ୍ରିଗେଡରେ ୯ମ ସଶସ୍ତ୍ର ବାହିନୀ ପୂର୍ବତନ ସୈନିକ ଦିବସ ରାଲିକୁ ସମ୍ବୋଧିତ କରିଥିଲେ। ଏହି ସମୟରେ, ସେ ଜମ୍ମୁ-କାଶ୍ମୀର ଏବଂ ଦିଲ୍ଲୀର ଲୋକଙ୍କ ମଧ୍ୟରେ ଦୂରତା ହ୍ରାସ କରିବା ପାଇଁ କେନ୍ଦ୍ର ଶାସିତ ପ୍ରଦେଶ ମୁଖ୍ୟମନ୍ତ୍ରୀ ଓମର ଅବଦୁଲ୍ଲାଙ୍କ ପ୍ରୟାସକୁ ପ୍ରଶଂସା କରିଥିଲେ।
ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ, ଭାଜପା ସରକାର ଦିଲ୍ଲୀ ଏବଂ ଜମ୍ମୁ-କଶ୍ମୀର ସହିତ ସମାନ ବ୍ୟବହାର କରେ। ପୂର୍ବ ସରକାରମାନେ କଶ୍ମୀର ପ୍ରତି ଭିନ୍ନ ଭାବରେ ବ୍ୟବହାର କରିଥିଲେ। ଏହାର ପରିଣାମ ସ୍ବରୂପ ଏହି ଅଞ୍ଚଳର ଆମର ଭାଇ ଭଉଣୀମାନେ ଦିଲ୍ଲୀ ସହିତ ଯେପରି ଯୋଡ଼ି ହେବା କଥା, ସେପରି ହୋଇ ପାରିଲେ ନାହିଁ। ମୁଁ ଅତୀତକୁ ଯିବାକୁ ଚାହୁଁନାହିଁ କାରଣ ଆମ ସରକାରଙ୍କ ସବୁଠାରୁ ବଡ଼ ସଫଳତା ହେଉଛି ଯେ ଆମେ କାଶ୍ମୀରର ହୃଦୟ ଏବଂ ଦେଶର ଅନ୍ୟ ସମସ୍ତ ଅଞ୍ଚଳ ମଧ୍ୟରେ ଦୂରତା ହ୍ରାସ କରିବା ପାଇଁ କାମ କରୁଛୁ। ଏବେ ବି ଥିବା ଛୋଟ ବ୍ୟବଧାନକୁ ପୂରଣ କରିବା ପାଇଁ ସଠିକ ପଦକ୍ଷେପ ନେବା ପାଇଁ ମୁଁ ମୁଖ୍ୟମନ୍ତ୍ରୀ ଓମର ଅବଦୁଲ୍ଲାଙ୍କୁ ଅଭିନନ୍ଦନ ଜଣାଉଛି। ଏହି ସମୟରେ ରାଜନାଥ ସିଂହ ପାକିସ୍ତାନୀ ନେତା ଅନୱରୁଲ ହକ୍ଙ୍କ ଭାରତ ବିରୋଧରେ ଦେଇଥିବା ମନ୍ତବ୍ୟର ମଧ୍ୟ ସମାଲୋଚନା କରିଥିଲେ। ପିଓକେ ବିନା ଜାମ୍ମୁ ଓ କଶ୍ମୀର ଅସମ୍ପୂର୍ଣ୍ଣ ବୋଲି ସେ କହିଛନ୍ତି।
