ଶ୍ରୀନଗର,୩୧।୧୨ : ଜମ୍ମୁ-କଶ୍ମୀରରେ ୨୦୨୨ ବର୍ଷରେ ୯୦ରୁ ଅଧିକ ସର୍ଚ୍ଚ ଅପରେଶନରେ ୧୭୨ ଆତଙ୍କବାଦୀଙ୍କୁ ଏନକାଉଣ୍ଟର କରାଯାଇଛି। ସେଥିମଧ୍ୟରେ ୪୨ ବିଦେଶୀ ଆତଙ୍କବାଦୀ ରହିଛନ୍ତି। ଜମ୍ମୁ-କଶ୍ମୀର ପୋଲିସ ପକ୍ଷରୁ ଶନିବାର ଏହି ସୂଚନା ପ୍ରଦାନ କରାଯାଇଛି। ଆତଙ୍କବାଦୀଙ୍କ ସଂଖ୍ୟା କମିବା ସହିତ ଜମ୍ମୁ-କଶ୍ମୀରରେ ଯୁବବର୍ଗ ସଂଗଠନରେ ସାମିଲ ହେବା କାର୍ଯ୍ୟରେ ୩୭ ପ୍ରତିଶତ କମିଛି।
ଗୋଟିଏ ବର୍ଷରେ ଜମ୍ମୁ-କଶ୍ମୀରରେ ୯୩ଟି ଆତଙ୍କବାଦୀଙ୍କ ବିରୋଧୀ ଅଭିଯାନରେ ୧୦୮ ଲଶ୍କର-ଇ-ତୋଏବା ଆତଙ୍କବାଦୀ, ୩୫ ଜୈଶ୍-ଇ-ମହମ୍ମଦ ଆତଙ୍କବାଦୀ, ୨୨ ହିଜବୁଲ ମୁଜାହିଦ୍ଦିନ, ଅଲ ବଦରର ୪, ଅଂସାର ଗଞ୍ଜାଓ୍ବତ-ଉଲ୍-ହିନ୍ଦ୍ର ୩ ଆତଙ୍କବାଦୀଙ୍କୁ ଏନକାଉଣ୍ଟର କରାଯାଇଛି।
ସର୍ଚ୍ଚ ଅପରେଶନ ସମୟରେ ୧୪ ପୋଲିସ ସହିତ ମୋଟ ୨୬ ଯବାନ ଶହୀଦ ହୋଇଛନ୍ତି। ଆତଙ୍କବାଦୀମାନେ ୨୯ ସାଧାରଣ ଲୋକଙ୍କୁ ହତ୍ୟା କରିଛନ୍ତି। ୧୦୦ ଜଣ ଯୁବବର୍ଗ ବିଭିନ୍ନ ଆତଙ୍କବାଦୀ ସଂଗଠନରେ ସାମିଲ ହୋଇଥିବାବେଳେ ଏଥିରେ ୩୭ ପ୍ରତିଶତ ହ୍ରାସ ପରିଲକ୍ଷିତ ହୋଇଛି।
ସର୍ବାଧିକ ୭୪ ଜଣ ଲଶ୍କର-ଇ-ତୋଏବାରେ ସାମିଲ ହୋଇଥିବାବେଳେ ୬୫ ଜଣଙ୍କର ଏନକାଉଣ୍ଟର କରାଯାଇଛି। ୧୭ ଜଣଙ୍କୁ ଗିରଫ କରାଯାଇଥିବାବେଳେ ୧୮ ଜଣ ଏବେ ବି ସକ୍ରିୟ ରହିଛନ୍ତି। ସେହିପରି ସର୍ଚ୍ଚ ଅପରେଶନ ସମୟରେ ୩୬୦ ଅସ୍ତ୍ରଶସ୍ତ୍ର ଜବତ କରାଯାଇଛି।
