କାଇଭ,୧୫।୨: ୟୁକ୍ରେନ-ରୁଷ ତିକ୍ତତା ଏବେ ବୃଦ୍ଧି ପାଉଥିବା ବେଳେ ଯୁଦ୍ଧ ଆଶଙ୍କା ଘନେଇବାରେ ଲାଗିଛି। ଇତିମଧ୍ୟରେ ୟୁକ୍ରେନର ରାଜଧାନୀ କାଇଭରେ ଥିବା ଭାରତୀୟ ଦୂତାବାସ ଭାରତୀୟ ନାଗରିକଙ୍କୁ ବିଶେଷ କରି ଛାତ୍ରମାନଙ୍କୁ ସାମୟିକ ଭାବେ ଦେଶ ଛାଡିବାକୁ ପରାମର୍ଶ ଦେଇଛି। ମଙ୍ଗଳବାର ଦୂତାବାସ ପକ୍ଷରୁ ଏକ ଆଡ଼ଭାଇଜରି ଜାରି କରାଯାଇଛି। ଯେଉଁଥିରେ ଉଲ୍ଲେଖ କରାଯାଇଛି ଯେ, ୟୁକ୍ରେନରେ ବର୍ତ୍ତମାନର ଅନିଶ୍ଚିତତା ପରିସ୍ଥିତିକୁ ଦୃଷ୍ଟିରେ ରଖି ଭାରତ ସରକାର ସମସ୍ତ ନାଗରିକଙ୍କୁ, ବିଶେଷକରି ଛାତ୍ରମାନଙ୍କୁ ୟୁକ୍ରେନ ଛାଡି ଦେଶକୁ ଫେରିଯିବାକୁ ପରାମର୍ଶ ଦେଇଛନ୍ତି। କେବଳ ସେତିକି ନୁହେଁ ଉକ୍ତ ଚିଠିରେ କରାଯାଇଛି ଯେ, ୟୁକ୍ରେନରେ ଥିବା ଭାରତୀୟ ନାଗରିକମାନେ କୌଣସି କାମ ନ ଥିଲେ ଘରୁ ବାହାରକୁ ଯାଆନ୍ତୁ ନାହିଁ କିମ୍ବା ଆବଶ୍ୟକ ନ ଥିଲେ ନାଗରିକମାନେ ୟୁକ୍ରେନ ଯାତ୍ରା ମଧ୍ୟ କରନ୍ତୁ ନାହିଁ। ଏଥିସହ ଭାରତୀୟ ନାଗରିକଙ୍କୁ ୟୁକ୍ରେନରେ ସେମାନଙ୍କ ଉପସ୍ଥିତି ବିଷୟରେ ଦୂତାବାସକୁ ଜଣାଇବାକୁ ଅନୁରୋଧ କରାଯାଇଛି। ଯାହାଦ୍ୱାରା ଆବଶ୍ୟକସ୍ଥଳେ ସେମାନଙ୍କ ନିକଟକୁ ସାହାଯ୍ୟ ପହଞ୍ଚାଯାଇପାରିବ। ସୂଚନା ମୁତାବକ ଏହାପୂର୍ବରୁ ଗତ ଜାନୁଆରୀରେ ୟୁକ୍ରେନରେ ଥିବା ଭାରତୀୟ ଦୂତାବାସ ଏକ ଫର୍ମ ଜାରି କରିଥିଲା। ଏହି ଫର୍ମରେ ସମସ୍ତ ଭାରତୀୟ ନାଗରିକଙ୍କୁ ଜାନୁୟାରୀ ୩୧ସୁଦ୍ଧା ସେମାନଙ୍କ ତଥ୍ୟ ପୂରଣ କରିବାକୁ ଏକ ଆବେଦନ କରାଯାଇଥିଲା। ଯାହାଦ୍ୱାରା ଭାରତୀୟମାନଙ୍କୁ ଆବଶ୍ୟକ ସୂଚନା ଏବଂ ସହାୟତା ଯୋଗାଇଦିଆଯାଇପାରିବ।