ପୁରୀ ଅଫିସ,୮।୭: ଶ୍ରୀମନ୍ଦିରର ରତ୍ନଭଣ୍ଡାର ସୁରକ୍ଷାକୁ ନେଇ ମହାରାଜା ଗଜପତି ଦିବ୍ୟସିଂହ ଦେବ ପ୍ରଶ୍ନ ଉଠାଇବା ପରେ ବିଭିନ୍ନ ମହଲରେ ଏହାକୁ ନେଇ କ୍ଷୋଭ ବଢ଼ିଛି। ସବୁ ବର୍ଗର ଲୋକେ ଗଜପତିଙ୍କ ସହ ସ୍ବର ମିଳାଉଛନ୍ତି। ବିରୋଧୀ ନେତାଙ୍କଠାରୁ ଆରମ୍ଭ କରି ଶ୍ରୀମନ୍ଦିର ସେବାୟତ ପର୍ଯ୍ୟନ୍ତ ସମସ୍ତେ ଏକ ସ୍ବରରେ ରତ୍ନଭଣ୍ଡାର ସମ୍ପର୍କରେ ସରକାର ମୁହଁ ଖୋଲନ୍ତୁ ବୋଲି ଦାବି କରୁଛନ୍ତି। ଏପରିକି ସରକାରୀ ଦଳର ବିଧାୟକ ମଧ୍ୟ ରତ୍ନଭଣ୍ଡାର ଖୋଲି ମରାମତି କରିବା ସହ ରତ୍ନ ଅଳଙ୍କାର ଗଣନା କରିବା ଦାବିରେ ସମର୍ଥନ କରିଛନ୍ତି। ବିଧାୟକ ସୌମ୍ୟରଞ୍ଜନ ପଟ୍ଟନାୟକ କହିଛନ୍ତି, ଶରୀର ପ୍ରଭାବିତ ହେଲେ ତାହାର ମରାମତି ଆବଶ୍ୟକ ହେଉଛି। ରତ୍ନଭଣ୍ଡାର ସ୍ଥିତି ଦୁର୍ବଳ ଥିବା କଥା ଯଦି ଆଦ୍ୟ ସେବକ ଗଜପତି କହୁଛନ୍ତି ତେବେ ସରକାରଙ୍କ ଉପରେ ଚାପ ପକାନ୍ତୁ। ଜନ ପ୍ରତିନିଧି ହିସାବରେ ଆମେ ସ୍ବର ଉତ୍ତୋଳନ କରିବୁ। ସେହିଭଳି ବିରୋଧୀ ଦଳ ଉପନେତା ବିଷ୍ଣୁଚରଣ ସେଠୀ ରତ୍ନଭଣ୍ଡାର ପ୍ରସଙ୍ଗରେ ଦୁର୍ନୀତି ହୋଇଥିବା ଅଭିଯୋଗ ଆଣିଛନ୍ତି। ସେ କହିଛନ୍ତି, ରତ୍ନଭଣ୍ଡାରରେ କିଛି ହେର୍ଫେର ହୋଇଛି। ସେଥିପାଇଁ ସରକାର ଶ୍ରୀମନ୍ଦିର ରତ୍ନଭଣ୍ଡାର ଖୋଲିବା ବଦଳରେ ଭିନ୍ନ ଭିନ୍ନ ସମୟରେ ଭିନ୍ନ ଭିନ୍ନ ବାହାନା କରି ମୁଖ୍ୟ ପ୍ରସଙ୍ଗକୁ ଟାଳୁଛନ୍ତି। ଏଣୁ ରାଜ୍ୟ ସରକାର ରତ୍ନଭଣ୍ଡାର ପ୍ରସଙ୍ଗରେ ପାରଦର୍ଶିତା ଅବଲମ୍ବନ କରନ୍ତୁ ଓ ରତ୍ନଭଣ୍ଡାର ଖୋଲନ୍ତୁ। କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା କହିଛନ୍ତି, ଦଳମତ ନିର୍ବିଶେଷରେ ଓଡ଼ିଶାବାସୀଙ୍କ ଏହା ଦାବି ଯେ, ସରକାର ରତ୍ନଭଣ୍ଡାର ଖୋଲି ରତ୍ନ ଅଳଙ୍କାରର ଗଣନା କରନ୍ତୁ। ଭିତର ରନତ୍ ଭଣ୍ଡାରରେ କେଉଁ ରତ୍ନ ରହିଛି ଓ କେଉଁ ରତ୍ନ ନାହିଁ ତାହାର ହିସାବ କରାଯାଉ।
ଶେଷଥର ପାଇଁ ଗତ ୨୦୧୮ ଏପ୍ରିଲରେ ୧୭ଜଣିଆ ଟିମ୍ ରତ୍ନଭଣ୍ଡାର ସ୍ଥିତି ଯାଞ୍ଚ ପାଇଁ ଶ୍ରୀମନ୍ଦିର ଭିତରକୁ ଯାଇଥିଲେ। ତେବେ ଚାବି ନ ମିଳିବାରୁ ଭିତରଭଣ୍ଡାର ଖୋଲାଯାଇପାରିଲା ନାହିଁ। ବାହାର ଭଣ୍ଡାର ଘରୁ ଲାଇଟ ପକାଇ ଭିତର ଭଣ୍ଡାର ଦେଖିବାରୁ ଭିତର ରତ୍ନଭଣ୍ଡାର ବିମ୍ରେ ଲୁହାରଡ୍ ଦେଖାଯାଉଥିଲା, ପାଣି ଗଳି କାନ୍ଥ ଓଦା ହୋଇଥିବା, କାନ୍ଥ ଫାଟିଥିବା ଭଳି ସୂଚନା ସମ୍ପୃକ୍ତ ୧୭ ଜଣିଆ କମିଟି ଜଣାଇଥିଲେ। ସେହିଭଳି ରତ୍ନଭଣ୍ଡାର ମରାମତି ଆବଶ୍ୟକ କରୁଥିବା ମଧ୍ୟ ୧୭ଜଣିଆ ଯାଞ୍ଚ କମିଟି ରିପୋର୍ଟରେ ସ୍ପଷ୍ଟ କରାଯାଇଥିଲା। ଏହି ଘଟଣାକୁ ୪ବର୍ଷ ପୂରିଥିଲେ ମଧ୍ୟ ସରକାର ରତ୍ନଭଣ୍ଡାର ମରାମତି ଉପରେ ଧ୍ୟାନ ଦେଉନାହାନ୍ତି। ଭଣ୍ଡାର ମେକାପ ନାରାୟଣ ମେକାପ କହିଛନ୍ତି, ୧୭ଜଣିଆ କମିଟି ଫେରିବା ପରେ ଏ ନେଇ ରିପୋର୍ଟ ପ୍ରଦାନ କରିଥିଲେ। ଭିତରେ ପାଣି ଗଳୁଛି ଏଣୁ ମରାମତି କରାଯାଉ ବୋଲି କହିଥିଲୁ। ଗଜପତି ମହାରାଜା ରତ୍ନଭଣ୍ଡାର ଖୋଲିବା ଓ ମରାମତି କରିବା ପାଇଁ ଦାବି କରିବା ପରେ ସରକାର ଅଣଦେଖା କରିବା ଉଚିତ୍ ନୁହେଁ। ଅନ୍ୟପକ୍ଷରେ ଜଗନ୍ନାଥ ସଂସ୍କୃତି ଗବେଷକ ଡ. ସୁରେନ୍ଦ୍ର ମିଶ୍ର କହିଛନ୍ତି, ରତ୍ନଭଣ୍ଡାର କୁହେଳିକା ହଟୁ। ଗଜପତିଙ୍କ ଇଚ୍ଛା ପରେ ରତ୍ନଭଣ୍ଡାର ଖୋଲି ମରାମତି କରାଯାଉ। ଅନେକ ରହସ୍ୟ ଉନ୍ମୋଚନ ହେବ।
