ଖୋର୍ଦ୍ଧା ଅଫିସ,୯।୪: ଖୋର୍ଦ୍ଧା ବନାଞ୍ଚଳରେ ହାତୀଙ୍କ ଦୌରାତ୍ମ୍ୟ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଦୁଇ ଦିନ ପୂର୍ବେ ରାମଚଣ୍ଡୀ ଠାରେ ଏକ ହାତୀ ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ଘଟିଥିବା ବେଳେ ୩ଜଣ ଗୁୁରୁତର ଆହତ ହୋଇଥିଲେ। ଏକ ହାତୀ ବୁଧବାର ବିଳମ୍ବିତ ରାତିରେ ଖୋର୍ଦ୍ଧା ମେଡିକାଲ ପଛ କାଜୁ ଜଙ୍ଗଲକୁ ପଶି ଆସିଥିଲା। ସ୍ଥାନୀୟ ଲୋକଙ୍କଠାରୁ ଖବରପାଇ ଗୁରୁବାର ସକାଳେ ବନ ବିଭାଗର ଏକ ୭ଜଣିଆ ଟିମ୍ ଘଟଣାସ୍ଥଳରେ ପହଞ୍ଚି ହାତୀର ଗତିବିଧି ଉପରେ ନଜର ରଖିଥିଲେ। ହାତୀ ଘଞ୍ଚ ଜଙ୍ଗଲକୁ ପଳାଇ ଯାଇଥିବାରୁ ବନ କର୍ମଚାରୀ ହାତୀକୁ ଠାବ କରିବାରେ ନାକେଦମ ହୋଇଯାଇଥିଲେ। ତେବେ ହାତୀ ପାଦ ଚିହ୍ନ ଦେଖି ହାତୀର ଗତିବିଧି ଉପରେ ଅନୁଧ୍ୟାନ କରିଥିଲେ। କର୍ମଚାରୀମାନେ ସକାଳ ୬ଟା ଠାରୁ ଅପରାହ୍ନ ୪ଟା ପର୍ଯ୍ୟନ୍ତ ଜଙ୍ଗଲ ନିକଟରେ ପଇଁତରା ମାରିଥିଲେ। ମାତ୍ର ହାତୀର କୌଣସି ସନ୍ଧାନ ପାଇ ନ ଥିଲେ। କାଜୁ ଜଙ୍ଗଲରେ ହାତୀ ପଶିିଥିବାରୁ କାଜୁ ସଂଗ୍ରହ ଲାଗି ନ ଯିବା ଲାଗି ବନ କର୍ମଚାରୀ ଡାକବାଜି ଯନ୍ତ୍ରରେ ଲୋକଙ୍କୁ ସଚେତନ କରିଥିଲେ। ଏଥିସହ ଏହି ଅଞ୍ଚଳରେ ଯାତାୟାତ ନ କରିବା ଲାଗି ପରାମର୍ଶ ଦେଇଥିଲେ। ହାତୀକୁ ଦେଖିଲେ ତୁରନ୍ତ ବନ ବିଭାଗକୁ ଜଣାଇବାକୁ କହିଥିଲେ। ଖବର ଲେଖା ହେବା ପର୍ଯ୍ୟନ୍ତ ହାତୀ ମେଡିକାଲ ପଛପଟ କାଜୁ ଜଙ୍ଗଲରେ ରହିଥିବା ଜଣାପଡିଛି। ଏନେଇ ବନ ବିଭାଗର ଜଣେ କର୍ମଚାରୀ କହିଛନ୍ତି, ଏକ ଟିମ୍ ହାତୀର ଗତିବିଧି ଉପରେ ନଜର ରଖିଛନ୍ତି। ରାତି ସୁଦ୍ଧା ହାତୀକୁ ନିକଟ ଜଙ୍ଗଲକୁ ଛଡାଯିବା ବ୍ୟବସ୍ଥା କରାଯିବ। ବାରମ୍ବାର ହାତୀ ମେଡିକାଲ ଏବଂ ସହର ଭିତରକୁ ପଶିି ଆସୁଥିବା ବେଳେ ବନ ବିଭାଗ କେବଳ ଉକ୍ତ ସମୟ ପର୍ଯ୍ୟନ୍ତ ହାତୀଙ୍କ ଗତିବିଧି ଉପରେ ନଜର ରଖୁଛନ୍ତି। ପରବର୍ତ୍ତୀ ସମୟରେ ବନ କର୍ମଚାରୀଙ୍କ ଦେଖା ମିଳୁ ନ ଥିବା ସାଧାରଣରେ ଅଭିଯୋଗ ହୋଇଛି। ହାତୀ-ମଣିଷ ଲଢ଼େଇରେ ଉଭୟଙ୍କ ଜୀବନ ଯାଉଛି। ହାତୀ ନିୟନ୍ତ୍ରଣ ପ୍ରତି ଗୁରୁତ୍ୱ ଦେଉଛୁ। ଲୋକଙ୍କୁ ସଚେତନ କରାଯାଉଛି କହି ବନ ବିଭାଗ ଖସିଯିବାକୁ ଉଦ୍ୟମ କରୁଛି ବୋଲି ପରିବେଶପ୍ରେମୀ ଧନେଶ୍ୱର ବିଧାର କହିଛନ୍ତି।
