ଖଇରା,୧୯/୧୨(ଉତ୍କଳବନ୍ଧୁ ପଣ୍ଡା): ବାଲେଶ୍ବର ଜିଲା ସୋର ରେଞ୍ଜ ଅଧିନ ଖଇରା ଅଞ୍ଚଳରେ ଏକ ଦନ୍ତାହାତୀ ଗୁରୁବାର ରାତିସାରା ଆତଙ୍କ ଖେଳାଇଛି । କୁପାରୀ ଓ ଔପଦା ବନ ବିଭାଗର କର୍ମଚାରୀ ମାନେ ଜଙ୍ଗଲକୁ ଫେରାଇବାକୁ ଉଦ୍ୟମ ଜାରି ରଖିଥିଲେ ହେଁ ଗ୍ରାମବାସୀଙ୍କ ହୋ ହାଲ୍ଲାରେ ହାତୀଟି ଭୟଭୀତ ହୋଇ ଏ ଗାଁରୁ ସେ ଗାଁରେ ପଶୁ ଥିବାରୁ ସାଧାରଣ ଲୋକେ ମଧ୍ୟ ଭୟାତୁର ଅବସ୍ଥାରେ ଅଛନ୍ତି ।
ପ୍ରଥମେ ଗୁରୁବାର ସଂଧ୍ୟାରେ ୨ଟି ହାତୀ ଖାଦ୍ୟ ଅନ୍ବେଶଣରେ ଶାରିଶୁଆ ପାହାଡର ବଗେଇପୁର ଗ୍ରାମକୁ ପଶି ଆସିଥିଲେ । ସେଠାରୁ ଗୋଟେ ଫେରି ଯାଇଥିବା ବେଳେ ଅନ୍ୟଟି କଳମଚୁଆ ଗ୍ରାମର ଦୈତାରୀ ନାୟକଙ୍କ ବାଡିରେ ପଶି ରହିଥିଲା । ବନବିଭାଗ ଗୋଡାଇବା ପରେ ଏହି ଦନ୍ତାହାତୀଟି ପଟ୍ଟାଗଡିଆ,କାଳିଆଗଡିଆ କୁପାରୀ ଦେଇ ସକାଳ ହେବା ବେଳକୁ ନଟାପଡା ଓ ବଟେଶ୍ବର ଓ କଣ୍ଟାପଡା ଗ୍ରାମରେ ପହଞ୍ଚି ଯାଇଥିଲା ।
ମହତିପୁର ଠାରୁ ସୁଣ୍ଢିରା ରାସ୍ତା ଦେଇ ଯାଉଥିବା ବେଳେ ସୁଣ୍ଢିରା ଗ୍ରାମର ସୁରେନ୍ଦ୍ର ଦାସ(୬୫)ହାତୀ କୁ ଦେଖି ଦୌଡି ପଳାଇ ଯାଉଥିବା ସମୟରେ ହାତୀଟି ତାଙ୍କୁ କଚାଡି ମାରିଦେଇଥିଲା । ଏବେ ହାତୀଟି ନୂଆସାହି ଗ୍ରାମ ନିକଟରେ ଥିବା ବେଳେ ବନ ବିଭାଗ ଗ୍ରାମବାସୀଙ୍କୁ ହୋହାଲ୍ଲା ନକରିବାକୁ ଅନୁରୋଧ କରିଛନ୍ତି ।
