ମୋରଡ଼ା,୨୪।୮(ଡି.ଏନ୍.ଏ.): ମୟୂରଭଞ୍ଜ ଜିଲା ମୋରଡ଼ା ବ୍ଲକରେ ହାତୀ ଉପଦ୍ରବ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ତେବେ ବନବିଭାଗ ଏହାକୁ ରୋକିବାରେ ଅସଫଳ ହେଉଥିବା ମଧ୍ୟ ଲୋକେ ଅଭିଯୋଗ କରୁଛନ୍ତି। ହାତୀ ଆକ୍ରମଣରେ ପୁଣି ଦୁଇଜଣଙ୍କ ମୃତ୍ୟୁ ଘଟଛି ।
ସୂଚନା ଅନୁଯାୟୀ, ମଙ୍ଗଳବାର ବିଳମ୍ବିତ ରାତିରେ ବ୍ଲକ ଅଧୀନ ଡାଙ୍ଗରବିଲା ଗ୍ରାମର ଶ୍ରୀମତ ହାଁସଦା(୪୦) ଘରେ ଶୋଇଥିବା ବେଳେ ଏକ ଚାରିଟିକିଆ ହାତୀପଲ ଆସି ଦଳିଦେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ଖବରପାଇ ବନବିଭାଗ କର୍ମଚାରୀ ଓ ମୋରଡ଼ା ପୋଲିସ ପହଞ୍ଚି ମୃତଦେହ ଜବତ କରି ତଦନ୍ତ ପାଇଁ ବାରିପଦାସ୍ଥିତ ପିଆର୍ଏମ୍ ମେଡିକାଲ କଲେଜ ଆଣ୍ଡ ହସ୍ପିଟାଲକୁ ପଠାଇଛନ୍ତି।
ସେହିପରି ବ୍ଲକର ବେତନଟୀ ରେଞ୍ଜ ଅଧୀନ ଅସନବଣି ଜଙ୍ଗଲରେ ମଧ୍ୟ ହାତୀ ଆକ୍ରମଣରେ ଜଣଙ୍କ ମୃତ୍ୟୁ ଘଟଛି । ଦୁର୍ଗାପୁର ପଞ୍ଚାୟତର ସଙ୍ଗାଡ଼ିହି ଗ୍ରାମର ଧନଞ୍ଜୟ ହାଁସଦା ମଙ୍ଗଳବାର ଅପରାହ୍ନରେ ସାଙ୍ଗସହ ଜଙ୍ଗଲକୁ ଯାଇଥିଲେ। ସେମାନେ ହାତୀ ହାବୁଡ଼ରେ ପଡିବାରୁ ସାଙ୍ଗ ଦୌଡ଼ି ପଳାଇଯାଇଥିବା ବେଳେ ଧନଞ୍ଜୟ ସା ସୁଦ୍ଧା ଘରକୁ ନ ଫେରିବାରୁ ଗ୍ରାମବାସୀ ଓ ପରିବାର ଲୋକେ ରାତିସାରା ଖୋଜାଖୋଜି କରିଥିଲେ। ତେବେ ବୁଧବାର ଗ୍ରାମବାସୀ ଜଙ୍ଗଲ ଭିତରେ ତାଙ୍କର ମୃତଦେହ ପାଇବା ପରେ ବନବିଭାଗକୁ ଖବର ଦେଇଥିଲେ। ଗ୍ରାମବାସୀଙ୍କ କହିବା ମୁତାବକ, ଦୁଇଟି ହାତୀ ଦଳି ଦେବାରୁ ଧନଞ୍ଜୟଙ୍କ ମୃତ୍ୟୁ ଘଟିଛି। ଘଟଣାସ୍ଥଳରେ ବନବିଭାଗ କର୍ମଚାରୀ ପହଞ୍ଚିିଥିବା ଜଣାପଡିଛ। ସେଠାରେ ଉତ୍ତେଜନା ଦେଖିବାକୁ ମିଳିଥିଲା।
