ନୂଆଦିଲ୍ଲୀ, ୩।୯ : ଶିକ୍ଷା ଓ ବିକାଶକୁ ନେଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବଂ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମାଙ୍କ ମଧ୍ୟରେ ଟୁଇଟର ଯୁୁଦ୍ଧ ଜାରି ରହିଛି। ଗତ କିଛି ଦିନ ହେବ ଉଭୟ ରାଜ୍ୟର ନେତା ପରସ୍ପର ବିରୋଧରେ ଆରୋପ ପ୍ରତ୍ୟାରୋପ କରିବାରେ ଲାଗିଛନ୍ତି। ଏହି କ୍ରମରେ ହେମନ୍ତ ବିଶ୍ୱ ସାରମା ପୁଣି ଥରେ ଟୁଇଟରରେ ଅରବିନ୍ଦ କେଜରିୱାଲଙ୍କୁ ଏକ ଭିଡିଓ ଶେୟାର କରିଛନ୍ତି।
ହିମନ୍ତ ଶନିବାର କେଜରିୱାଲଙ୍କୁ ଉଦ୍ଦେଶ୍ୟରେ ୪୦ ସେକେଣ୍ଡର ଏକ ଭିଡ଼ିଓ ଟ୍ୟାଗ କରିଛନ୍ତି। ଆସାମରେ ଶିକ୍ଷା କ୍ଷେତ୍ରରେ ତାଙ୍କ ସରକାର କରିଥିବା କାର୍ଯ୍ୟ ବିଶେଷ କରି ଚା ବଗିଚା ଲୋକଙ୍କ ଉପରେ ଏହି ଭିଡ଼ିଓ ପର୍ଯ୍ୟବେସିତ।
ସେ କହିଛନ୍ତି ଆମେ ଚୁପଚାପ କାମ କରିବାକୁ ପସନ୍ଦ କରୁ। ଏହି ଶିକ୍ଷାବର୍ଷରେ ଆମେ ଚା ବଗିଚା ଶ୍ରମିକମାନଙ୍କ ପିଲାମାନଙ୍କ ପାଇଁ ୧୦୦ ଟି ମାଧ୍ୟମିକ ବିଦ୍ୟାଳୟ ନିର୍ମାଣ କରିଛୁ। ଆଉ ୧୦୦ ଟି ବିଦ୍ୟାଳୟ କାମ ପାଇପଲାଇନରେ ଅଛି। ଆସାମର ଦୁର୍ଗମ ଅଞ୍ଚଳରେ ଶିକ୍ଷା ଭିତ୍ତିଭୂମି ଉପରେ ଭିଡ଼ିଓରେ ଦେଖିବାକୁ ମିଳୁଛି।
ଏହାପୂର୍ବରୁ ଶୁକ୍ରବାର କେଜରିୱାଲଙ୍କୁ ହିମନ୍ତ ଟୁଇଟରରେ କହିଥିଲେ ଯେ ଉତ୍କର୍ଷତା ପ୍ରତି ଆମର ପ୍ରତିବଦ୍ଧତା ସର୍ବୋଚ୍ଚ। ଆମେ କରୁ କିନ୍ତୁ ଗର୍ବ କରୁନାହୁଁ। ଦିଲ୍ଲୀ ତୁଳନାରେ ଏକ ଛୋଟ ରାଜ୍ୟ ହୋଇଥିଲେ ମଧ୍ୟ ଆସାମରେ ୨୧ ଟି ଅତ୍ୟାଧୁନିକ ମେଡିକାଲ କଲେଜ ଡାକ୍ତରଖାନା ନିର୍ମାଣ କାର୍ଯ୍ୟ ହାତକୁ ନିଆଯାଇଛି। ୬ଟିର କାମ ଶେଷ ହୋଇଛି। ୩ଟିର ନିର୍ମାଣ ଚଳିତ ବର୍ଷ ସମାପ୍ତ ହେବ।
ସରମା ଶେୟାର କରିଥିବା ଏହି ଭିଡିଓ ଦାବି କରିଛନ୍ତି ଯେ ଆସାମରେ ଏକ ଶକ୍ତିଶାଳୀ ବିଦ୍ୟାଳୟ ଶିକ୍ଷା ବ୍ୟବସ୍ଥା ରହିଛି, ଯେଉଁଥିରେ ଦୁଇ ଲକ୍ଷରୁ ଅଧିକ ଶିକ୍ଷକ ୪୪,୫୨୧ ସରକାରୀ ବିଦ୍ୟାଳୟରେ ୬୫ ଲକ୍ଷରୁ ଅଧିକ ଛାତ୍ରୀଛାତ୍ରଙ୍କୁ ଶିକ୍ଷାଦାନ କରୁଛନ୍ତି। ଏଥିରେ କୁହାଯାଇଛି ଯେ ମୋଟ ୧.୧୮ଲକ୍ଷ ମଧ୍ୟାହ୍ନ ଭୋଜନ କର୍ମଚାରୀଙ୍କୁ ମଧ୍ୟ ରାଜ୍ୟ ସରକାର ନିଯୁକ୍ତି ଦେଇଛନ୍ତି। ଏହି ଭିଡିଓରେ କୁହାଯାଇଛି ଯେ ଏହି ଏକାଡେମିକ ଅଧିବେଶନରେ ଚା ବଗିଚା କର୍ମଚାରୀଙ୍କ ପିଲାମାନଙ୍କ ପାଇଁ ୧୦୦ ଟି ମାଧ୍ୟମିକ ବିଦ୍ୟାଳୟ ଖୋଲାଯାଇଥିବାବେଳେ ଅନ୍ୟ ୧୦୦ଟି ବିଦ୍ୟାଳୟ ଏବଂ ୧୦ ଟି କଲେଜ ପ୍ରକଳ୍ପ ପ୍ରସ୍ତୁତି ପର୍ଯ୍ୟାୟରେ ରହିଛି ବୋଲି ହିମନ୍ତ କହିଛନ୍ତି।
