ନୂଆଦିଲ୍ଲୀ,୨୩।୨ : ଦିଲ୍ଲୀର ଏକ୍ସାଇଜ ସ୍କାମ ମାମଲାରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ(ଇଡି) ଗୁରୁବାର ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ବ୍ୟକ୍ତିଗତ ସଚିବ(ପିଏ)ଙ୍କୁ ଡକାଇଛନ୍ତି। ଏକ୍ସାଇଜ ସ୍କାମ ସମ୍ପର୍କରେ ଇଡି ପିଏଙ୍କୁ ପଚରାଉଚରା କରିବେ।
ମନୀଷ ସିସୋଡିଆ, ସତ୍ୟେନ୍ଦ୍ର ଜୈନଙ୍କୁ ମଧ୍ୟ ଏହି ପ୍ରସଙ୍ଗରେ ପଚରାଉଚରା କରାଯାଇଛି। ସିବିଆଇ ଏହି ମାମଲାର ଯାଞ୍ଚ କରୁଛି।
ଜାନୁଆରୀରେ ଏନଫୋର୍ସମେଣ୍ଟ ଡାଇରେକ୍ଟୋରେଟ (ଇଡି) ଅଭିଯୁକ୍ତ ଏକ୍ସାଇଜ ପଲିସି ସ୍କାମ ସହ ଜଡିତ ମନି ଲଣ୍ଡରିଂ ମାମଲାରେ ୭ କମ୍ପାନୀ ସହିତ ପାଞ୍ଚ ଜଣଙ୍କ ବିରୋଧରେ ଏକ ସପ୍ଲିମେଣ୍ଟାରୀ ଚାର୍ଜଶିଟ ଦାଖଲ କରିଥିଲେ। ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ନାମ ଇଡି ଦାଖଲ କରିଥିବା ଦ୍ୱିତୀୟ ଚାର୍ଜଶିଟରେ ଅନ୍ତର୍ଭୁକ୍ତ କରାଯାଇ ନାହିଁ। ଏହି ମାମଲାରେ ଦାଖଲ ହୋଇଥିବା ଏଫଆଇଆରରେ ସିସୋଡିଆଙ୍କର ନାମ ରହିଛି।
ରାଉସ ଆଭେନ୍ୟୁ କୋର୍ଟର ସ୍ବତନ୍ତ୍ର ବିଚାରପତି ଏମ.କେ ନାଗପାଲଙ୍କ କୋର୍ଟରେ ଦାଖଲ ହୋଇଥିବା ସପ୍ଲିମେଣ୍ଟାରୀ ଚାର୍ଜଶିଟରେ ବିଜୟ ନାୟାର, ଶରତ ରେଡ୍ଡୀ, ବିନୟ ବାବୁ, ଅଭିଷେକ ବୋନପାଲୀ ଏବଂ ଅମିତ ଆରୋରାଙ୍କୁ ଅଭିଯୁକ୍ତ ଭାବେ ନାମିତ କରାଯାଇଛି। ଏହି ମାମଲାରେ ସିସୋଡିଆଙ୍କ ବିରୋଧରେ ଇଡି ଏପର୍ଯ୍ୟନ୍ତ ଚାର୍ଜଶିଟ ଦାଖଲ କରିନାହାଁନ୍ତି କିନ୍ତୁ ତଦନ୍ତ ଜାରି ରହିଛି ବୋଲି କହିଛନ୍ତି। ଏକ୍ସାଇଜ ପଲିସିରେ ଆର୍ଥିକ ଅନିୟମିତତା ଅଭିଯୋଗ ଆସିବା ପରେ ଏହି ନୀତି ବାତିଲ କରାଯାଇଥିଲା।
ମନି ଲଣ୍ଡରିଂ ଆକ୍ଟର ବିଭିନ୍ନ ବିଭାଗ ଅଧୀନରେ ଇଡି ଏହି ମାମଲାରେ ଦ୍ୱିତୀୟ ଚାର୍ଜଶିଟ ଦାଖଲ କରିଛି। ଗତ ବର୍ଷ ନଭେମ୍ବରରେ ପ୍ରଥମ ଚାର୍ଜଶିଟ ଦାଖଲ କରାଯାଇଥିଲା। ଚାର୍ଜଶିଟରେ ଏପର୍ଯ୍ୟନ୍ତ ଗିରଫ ହୋଇଥିବା ବ୍ୟକ୍ତିଙ୍କ ସମେତ ମୋଟ ୧୨ ଜଣଙ୍କ ନାମ ଦିଆଯାଇଛି। ଏହି ମନି ଲଣ୍ଡରିଂ ମାମଲା ସିବିଆଇ ଏଫଆଇଆର ଉପରେ ଆଧାରିତ।
