କଟକ ଅଫିସ,୧୫ା୧୦: ବହୁଚର୍ଚ୍ଚିତ ବ୍ଲାକ୍ମେଲର ଅର୍ଚ୍ଚନା ନାଗ ମାମଲା ଏବେ ହାଇକୋର୍ଟରେ ପହଞ୍ଚତ୍ଛି। ପୋଲିସ ତଦନ୍ତ ଆଗେଇ ପାରୁ ନ ଥିବାରୁ ମାମଲାର ତଦନ୍ତ ଭାର କେନ୍ଦ୍ର ସରକାରଙ୍କ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)କୁ ଦେବା ପାଇଁ ହାଇକୋର୍ଟ ନିର୍ଦ୍ଦେଶ ଦେବାକୁ ପ୍ରାର୍ଥନା କରାଯାଇଛି। ଭାରତୀୟ ବିକାଶ ପରିଷଦ ପକ୍ଷରୁ ଶୁକ୍ରବାର ଏ ସମ୍ପର୍କିତ ଜନସ୍ବାର୍ଥ ମାମଲା ରୁଜୁ କରାଯାଇ ଏହି ନିବେଦନ କରାଯାଇଛି। ଏଥିରେ ଇଡି ନିର୍ଦ୍ଦେଶକ, କେନ୍ଦ୍ର ଅର୍ଥ ସଚିବ, ଓଡିଶା ସରକାରଙ୍କ ମୁଖ୍ୟ ଶାସନ ସଚିବ, ଗୃହ ସଚିବ, ପୋଲିସ ମହାନିର୍ଦ୍ଦେଶକ, ଖଣ୍ଡଗିରି ଓ ନୟାପଲ୍ଲୀ ଥାନା ଆଇଆଇସିଙ୍କୁ ପକ୍ଷଭୁକ୍ତ କରାଯାଇଛି।
ଆବେଦନରେ ଦର୍ଶାଯାଇଛି , କଳାହାଣ୍ଡି ଜିଲା ଲାଞ୍ଜିଗଡ଼ର ଏକ ଗରିବ ପରିବାରରୁ ଆସି ଭୁବନେଶ୍ୱରରେ ବିଳାସପୂର୍ଣ୍ଣ ଜୀବନ ବିତାଉଥିଲେ ଅର୍ଚ୍ଚନା ନାଗ। ବିବାହିତା ମହିଳା ହୋଇଥିଲେ ମଧ୍ୟ ନିଜେ ଯୌନ କାର୍ଯ୍ୟରେ ଜଡ଼ିତ ହେବା ସହ ଦିଲ୍ଲୀ, ମୁମ୍ବାଇ, କୋଲକାତାରୁ ଦେହଜୀବୀ ଆଣି ନିଜ ଘର ଓ ହୋଟେଲରେ ଯୌନ କାର୍ଯ୍ୟରେ ସାମିଲ କରାଉଥିଲେ। ଅନ୍ତରଙ୍ଗ ମୁହୂର୍ତ୍ତର ଫଟୋ ଉଠାଇ ବ୍ଲାକ୍ମେଲ କରି ରାଜନେତା, ବ୍ୟବସାୟୀ, ପୋଲିସ ଅଧିକାରୀ, ପ୍ରଶାସନିକ ଅଧିକାରୀ, ରେଳ ଅଧିକାରୀ, ସିନେମା ପ୍ରଯୋଜକ, ବିଲଡର ଓ ଅନ୍ୟାନ୍ୟ ଧନଶାଳୀ ବ୍ୟକ୍ତିଙ୍କଠାରୁ କୋଟି କୋଟି ଟଙ୍କା ଠକି ନେଉଥିଲେ। ୨୦୧୬ରେ ପ୍ରଥମେ ଖଣ୍ଡଗିରି ଥାନା ଅଞ୍ଚଳର ଏକ ଭଡ଼ା ଘରେ ରହି ବିଉଟି ପାର୍ଲରରେ କାର୍ଯ୍ୟ କରିଥିଲେ। ସେହି ସମୟରେ ଘର ମାଲିକଙ୍କୁ ସେକ୍ସ ଜାଲରେ ଫସାଇ ମୋଟା ଅଙ୍କର ଅର୍ଥ ଦାବି କରିଥିଲେ। ପରବର୍ତ୍ତୀ ସମୟରେ ଅନ୍ୟମାନଙ୍କୁ ଫସାଇ ପ୍ରଚୁର ଅର୍ଥ ରୋଜଗାର କରିଥିଲେ। ସେହି ଅର୍ଥରେ ସେ ଭୁବନେଶ୍ୱର ସତ୍ୟ ବିହାରରେ ରାଜକୀୟ ପ୍ରାସାଦ, ଫାର୍ମ ହାଉସ, ପୁରୁଣା କାର ଶୋରୁମ, ଗାଁରେ ସରକାରୀ ଜମିରେ ବିରାଟ ଅଟାଳିକା, କୋଟି କୋଟି ଟଙ୍କାର ସୁନା ଓ ହୀରା ଅଳଙ୍କାର, ଦାମୀଦାମୀ କାର ଆଦି କରିପାରିଛନ୍ତି। ତାଙ୍କ କଳା ସାମ୍ରାଜ୍ୟରେ ଶାସକ ଦଳର ମନ୍ତ୍ରୀ, ପୂର୍ବତନ ମନ୍ତ୍ରୀ, ବିଧାୟକ, ପୋଲିସ ଉଚ୍ଚ ଅଧିକାରୀ, ପ୍ରଭାବଶାଳୀ ଆଇଏଏସ୍, ସୁନା ବ୍ୟବସାୟୀ, ବିଲଡର ଓ ଅନ୍ୟ ପ୍ରଭାବଶାଳୀ ବ୍ୟକ୍ତି ଜଡ଼ିତ ଥିବାବେଳେ କୋଟି କୋଟି ଟଙ୍କାର ଆର୍ଥିକ କାରବାର ହୋଇଛି। ଥାନାରେ ଅର୍ଚ୍ଚନା ସମେତ ଅନ୍ୟମାନଙ୍କ ନାମରେ ମାମଲା ରୁଜୁ ହୋଇଛି। ଅର୍ଚ୍ଚନାଙ୍କୁ ଖଣ୍ଡଗିରି ପୋଲିସ ଗିରଫ କରି ଜେଲ ପଠାଇଥିଲେ ବି ତଦନ୍ତ ଆଗେଇ ପାରିନାହିଁ। ରାଜ୍ୟ ପୋଲିସ ମାମଲାର ତଦନ୍ତ ଠିକ ଭାବେ କରିପାରିବେ ନାହିଁ। ଓଡ଼ିଶା ଭଳି ଏକ ଗରିବ ରାଜ୍ୟରେ ଲୋକେ ସ୍ବାସ୍ଥ୍ୟ, ଶିକ୍ଷା, ବାସଗୃହ ଓ ଖାଦ୍ୟ ନ ପାଇ ଭୋକ ଉପାସରେ ମୃତ୍ୟୁବରଣ କରୁଥିବାବେଳେ ସେମାନଙ୍କ ଟଙ୍କାରେ ନେତା, ମନ୍ତ୍ରୀ, ଅଫିସର ଯୌନ କାମନା ମେଣ୍ଟାଉଛନ୍ତି। ତେଣୁ ଇଡି ଦ୍ୱାରା ମାମଲାର ତଦନ୍ତ କରି ଦୃଢ଼ କାର୍ଯ୍ୟାନୁଷ୍ଠାନ ସହ ଅର୍ଚ୍ଚନାଙ୍କ ସମସ୍ତ ସମ୍ପତ୍ତି ବାଜ୍ୟାପ୍ତି କରି ସରକାରୀ ତହବିଲରେ ମିଶାଇବା ପାଇଁ ନିବେଦନ କରାଯାଇଛି। ଆବେଦନକାରୀଙ୍କ ପକ୍ଷରୁ ଆଇନଜୀବୀ ଗୋପାଳ ପ୍ରସାଦ ଜେନା ମାମଲା ପରିଚାଳନା କରୁଛନ୍ତି।
