ଖୋର୍ଦ୍ଧା ଅଫିସ,୨୯। ୧୦: ଖୋର୍ଦ୍ଧା ସହର ଉପକଣ୍ଠ ଲୋକେଶ୍ୱର ମନ୍ଦିରରେ ପୋଲିସ ଏବଂ ଚାଇଲ୍ଡ ଲାଇନ ମିଳିତ ଭାବେ ଏକ ବାଲ୍ୟବିବାହକୁ ବୁଧବାର ବନ୍ଦ କରିଛନ୍ତି। ଉଦ୍ଧାର ନାବାଳିକାଙ୍କ ବୟସ ୧୬ ବର୍ଷ ହେବ ବୋଲି ପରିବାର ଲୋକେ ଦାବି କରିଥିବା ବେଳେ ଝିଅ ନିଜକୁ ସାବାଳିକା କହୁଥିବାରୁ ଦ୍ୱନ୍ଦ୍ୱ ସୃଷ୍ଟି ହୋଇଛି। ପୋଲିସ ଝିଅକୁ ଚାଇଲ୍ଡ ଲାଇନକୁ ହସ୍ତାନ୍ତରିତ କରିଥିବା ବେଳେ ପୁଅ ଏବଂ ତାଙ୍କ ସମ୍ପର୍କୀୟଙ୍କୁ ଟାଉନ ପୋଲିସ ଥାନାରେ ପଚରାଉଚୁରା କରୁଛି। ଏ ନେଇ ଥାନାଧିକାରୀ ଉମାଶଙ୍କର ସିଂ କୁହନ୍ତି, ନାବାଳିକା ନିଜକୁ ସାବାଳିକା କହୁଥିବାରୁ ପରିବାରକୁ ସାର୍ଟିଫିକେଟ ଆଣିବା ଲାଗି କୁହାଯାଇଛି। ସେହିଭଳି ଚାଇଲ୍ଡ ଲାଇନ କୋଅର୍ଡିନେଟର ରଞ୍ଜିତା ସାମନ୍ତସିଂହାର କୁହନ୍ତି, ଉଦ୍ଧାର ନାବାଳିକାଙ୍କୁ ଏବେ ଓପନ ସେଲ୍ଟରରେ ରଖାଯାଇଥିବାବେଳେ ଗୁରୁବାର ସିଡବ୍ଲ୍ୟୁସିରେ ହାଜିରା କରାଯିବ। ନୟାଗଡ଼ ଅଞ୍ଚଳର ଜଣେ ଝିଅ ଖୋର୍ଦ୍ଧା ସହରର ଜଣେ ପୁଅଙ୍କ ସହ ଫେସବୁକ ଜରିଆରେ ପରିଚୟ ହୋଇ ପରେ ବିବାହ ପାଇଁ ସ୍ଥିର କରିଥିଲେ। ଯୋଜନା ମୁତାବକ, ବୁଧବାର ଅପରାହ୍ନ ୪ଟାରେ ଲୋକେଶ୍ୱର ମନ୍ଦିରରେ ପୁଅଙ୍କ ସମେତ ତାଙ୍କ ପରିବାର ଲୋକ ଓ ଝିଅ ପହଞ୍ଚତ୍ଥିଲେ। ଅନ୍ୟପଟେ ବୁଧବାର ଝିଅ ସକାଳୁ ଘରକୁ ଫେରି ନ ଥିବାରୁ ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି କରି ପାଇ ନ ଥିଲେ। କୌଣସି ସୂତ୍ରରୁ ଭୁବନେଶ୍ୱର ଚାଇଲ୍ଡଲାଇନ ନିକଟରେ ଏହି ବାଲ୍ୟବିବାହ ସମ୍ପର୍କରେ ଖବର ପହଞ୍ଚତ୍ଥିଲା। ସେଠାରୁ ସ୍ଥାନୀୟ ଚାଇଲ୍ଡଲାଇନ ସଦସ୍ୟ ଟାଉନ ପୋଲିସ ସହ ଯୋଗାଯୋଗ କରି ଝିଅ ପରିବାର ଲୋକଙ୍କୁ ଜଣାଇଥିଲେ। ପୋଲିସ ଏବଂ ଚାଇଲ୍ଡ ଲାଇନ ଟିମ୍ ମିଳିତ ଭାବେ ମନ୍ଦିରରେ ଚଢ଼ାଉ କରିଥିଲେ।
