ଭୁବନେଶ୍ୱର,୧୮।୪ (ବ୍ୟୁରୋ): ରାଜଧାନୀ ଭୁବନେଶ୍ୱରକୁ ସ୍ବଚ୍ଛ, ସବୁଜ, ସୁନ୍ଦର କରି ଗଢିତୋଳିବା ପାଇଁ ବିଏମ୍ସି ପକ୍ଷରୁ ବିଭିନ୍ନ ପଦକ୍ଷେପ ନିଆଯାଉଛି। ସ୍ମାର୍ଟ ସିଟିକୁ ଯେପରି ବାହ୍ୟ ମଳମୁକ୍ତ ଅଞ୍ଚଳ କରାଯାଇ ପାରିବ ସେଥିପାଇଁ ଇ-ଟଏଲେଟ୍ର ବ୍ୟବସ୍ଥା ରହିଛି। ଏଥିସହ ବାହାରେ ମଳତ୍ୟାଗ କଲେ ଜରିମାନା ଦଣ୍ଡ ରହିଛି। ମାତ୍ର ସଚେତନତା ଅଭାବ ଓ ପରିଚାଳନାଗତ ତ୍ରୁଟି କାରଣରୁ ଏହା ଲୋକଙ୍କ ବ୍ୟବହାରରେ ଲାଗୁନାହିଁ। ଫଳରେ ଅଧିକାଂଶ ଇ-ଟଏଲେଟ୍ ଅଚଳାବସ୍ଥାରେ ପଡ଼ି ରହିଛି। ଇ-ଟଏଲେଟ ଭଳି ସହରରେ ଗୋଷ୍ଠୀ ଶୌଚାଳୟ, ହାଇବ୍ରିଡ୍ ଟଏଲେଟ୍, ପବ୍ଲିକ୍ ଟଏଲେଟ୍ ଏବଂ ବାୟୋ ଟଏଲେଟ୍ ଆଦି ୨ଶହରୁ ଊର୍ଦ୍ଧ୍ୱ ଟଏଲେଟ୍ ନିର୍ମାଣ କରାଯାଇଥିଲେ ବି ଲୋକମାନେ ବାହାରେ ମଳତ୍ୟାଗ ଓ ପରିସ୍ରା କରୁଛନ୍ତି। ଏହାଦ୍ୱାରା ସହରର ସୌନ୍ଦର୍ଯ୍ୟ ନଷ୍ଟ ହେବା ସହ ଅପରିଷ୍କାର ପରିବେଶ ସୃଷ୍ଟି ହେଉଛି।
୨୦୧୮ରେ ସ୍ମାର୍ଟସିଟି ମିଶନରେ ଇ-ଟଏଲେଟ୍ ପ୍ରକଳ୍ପ ଆରମ୍ଭ ହୋଇଥିଲା। ୫କୋଟି ୭୬ଲକ୍ଷ ଟଙ୍କା ବ୍ୟୟରେ ସହରର ୩୦ ସ୍ଥାନରେ ଉଭୟ ମହିଳା ଓ ପୁରୁଷଙ୍କ ପାଇଁ ୬୦ ଟଏଲେଟ୍ ୟୁନିଟ୍ ନିର୍ମାଣ କରାଯିବାକୁ ସ୍ଥିର ହୋଇଥିଲା। ବିଏମ୍ସି ଓ ବିଏସ୍ସିଏଲ୍ ପକ୍ଷରୁ ସ୍ଥାନ ଚିହ୍ନଟ କରାଯାଇଥିଲା। ମାତ୍ର ୪ବର୍ଷ ପରେ ବି ସମସ୍ତ ଇ-ଟଏଲେଟ୍ ନିର୍ମାଣ ହୋଇପାରିନାହିଁ। ସହରର ୨୨ଟି ସ୍ଥାନରେ ଇ-ଟଏଲେଟ୍ ନିର୍ମାଣ ସରିଥିବାବେଳେ ଆହୁରି ୮ଟି ସ୍ଥାନରେ ବାକି ରହିଛି। ବର୍ତ୍ତମାନ ବାପୁଜୀ ନଗର, ରବୀନ୍ଦ୍ର ମଣ୍ଡପ ନିକଟ, କଳିଙ୍ଗ ଷ୍ଟାଡିୟମ ଗେଟ୍-୮, ଖଣ୍ଡଗିରି, ଶିରିପୁର ଛକ, ୟୁନିଟ୍-୯, ଜୟଦେବ ବିହାର, ଅଶୋକ ନଗର, ସିଟି ମହିଳା ମହାବିଦ୍ୟାଳୟ ସମେତ ଫରେଷ୍ଟ ପାର୍କ, ଆଇଜି ପାର୍କ, ମଧୁସୂଦନ ପାର୍କ ଆଦି ବିଭିନ୍ନ ସ୍ଥାନରେ ଏହା ନିର୍ମାଣ କରାଯାଇଛି। ହେଲେ ଏଥିମଧ୍ୟରୁ ଅଧିକାଂଶ କାର୍ଯ୍ୟକ୍ଷମ ହୋଇ ନ ଥିବାବେଳେ ଆଉ କିଛି ସ୍ଥାନରେ ବିଭିନ୍ନ ସମସ୍ୟା ଯୋଗୁ ତାହା ବ୍ୟବହାରଯୋଗ୍ୟ ହୋଇପାରୁନାହିଁ। କେଉଁ ଇ-ଟଏଲେଟ୍ର ଡୋର୍ ଖୋଲୁ ନାହିଁ ତ ପୁଣି ଆଉ କେଉଁଠି ପାଣି ରହୁନି କି ନିୟମିତ ସଫା କରାଯାଉ ନ ଥିବା ଅଭିଯୋଗ ହେଉଛି।
ଭୁବନେଶ୍ୱରରେ ଷ୍ଟିଲରେ ନିର୍ମିତ ମଡ୍ୟୁଲାର ଇ-ଟଏଲେଟ ସ୍ଥାପନ କରାଯାଉଛି। ଏଥିମଧ୍ୟରୁ କେତେକ ସମ୍ପୂର୍ଣ୍ଣ ଅଟୋମେଟିକ୍ ଥିବାବେଳେ ଆଉ କେତେକ ସେମି ଅଟୋମେଟିକ ରହିଛି। ଏଥିରେ ସେନ୍ସର ଲାଗିଛି, ଫଳରେ ଟଏଲେଟ୍ ସମୟରେ ଆପେ ପାଣି ଆସିବ ଓ ଆପେ ବନ୍ଦ ହୋଇଯିବ। ସେହିପରି ବ୍ୟବହାର ପୂର୍ବରୁ ଫ୍ଲୋର୍ ଅଟୋମେଟିକ୍ ଭାବେ ସଫା ହୋଇଯିବ। ମାତ୍ର ରକ୍ଷଣାବେକ୍ଷଣ ଅଭାବରୁ ଅଧିକାଂଶ ଟଏଲେଟରେ ସେନ୍ସର କାମ କରୁନି। ସେହିପରି ଟଏଲେଟ ବ୍ୟବହାର ସମୟରେ ନାଲି ଲାଇଟ୍ ଜଳିବା କଥା, କିନ୍ତୁ ଅନେକ ସମୟରେ କେହି ନ ଥାଇ ବି ନାଲି ଲାଇଟ୍ ଜଳିରହୁଛି ଏବଂ ଡୋର୍ ଖୋଲୁନି। ଲୋକେ ବହୁ ସମୟ ଧରି ଅପେକ୍ଷା କରି ଫେରୁଥିବା ଦେଖିବାକୁ ମିଳୁଛି। ଆଉ ଅନେକ ସମୟରେ ସୁଇଚ୍ ମାରି ବହୁ ସମୟ ଅପେକ୍ଷା କରିବା ସତ୍ତ୍ବେ ବି ଡୋର ଖୋଲୁନି। ଏହାଦ୍ବାରା ଲୋକଙ୍କ ଜରୁରୀ ସମୟରେ ଏହା କାମରେ ଆସୁନି।
ଏ ସମ୍ପର୍କରେ ବିଏମ୍ସି ଡେପୁଟି କମିଶନର (ପରିମଳ) ଶୁଭେନ୍ଦୁ ସାହୁ କହିଛନ୍ତି, ଅଧିକାଂଶ ଟଏଲେଟ୍ କାମ କରୁଛି। ନିର୍ମାଣକାରୀ ସଂସ୍ଥାକୁ ଆନୁଆଲ ମେଣ୍ଟେନାନ୍ସ କଣ୍ଟ୍ରାକ୍ଟ (ଏଏମ୍ସି) ଦେଇଦେଲେ ସେମାନେ ଅଚଳ ଥିବା ଟଏଲେଟ୍ଗୁଡିକୁ ସଜାଡିବେ। ୨୦୧୯ରେ ଘରୋଇ ସଂସ୍ଥା ସହିତ ଚୁକ୍ତି ଶେଷ ହେବାପରେ ଆଉ ନବୀକରଣ ହୋଇନାହିଁ। ତେଣୁ କିଛିଟା ସ୍ଥାନରେ ଏଭଳି ସ୍ଥିତି ଦେଖିବାକୁ ମିଳୁଛି। ଖୁବ୍ଶୀଘ୍ର ଏଏମ୍ସି ଦିଆଯିବ। ତେବେ ବିଏମ୍ସି ପକ୍ଷରୁ କିଛି ସ୍ଥାନରେ ଏହି ଶୌଚାଳୟ ୟୁନିଟ୍ ଚଳାଇବା ପାଇଁ ବ୍ୟକ୍ତିମାନଙ୍କୁ ନିୟୋଜିତ କରାଯାଇଥିବା ସେ କହିଛନ୍ତି।
