ଅପାରଗତାରୁ ଇ-ସେବା ଫେଲ୍‌

ଭୁବନେଶ୍ୱର,୧୯ା୧୨(ବ୍ୟୁରୋ): ସବୁ କାର୍ଯ୍ୟ ଡିଜିଟାଲରେ ହେବ। ଲୋକମାନଙ୍କୁ ବାରମ୍ବାର ଅଫିସ ଦୌଡ଼ିବାକୁ ପଡ଼ିବ ନାହିଁ। ରାଜ୍ୟର ସମସ୍ତ ସହରାଞ୍ଚଳରେ ଲୋକମାନେ ଇ-ସେବା ପାଇପାରିବେ। ଜନ୍ମ ମୃତ୍ୟୁ ପଞ୍ଜୀକରଣଠାରୁ ଆରମ୍ଭ କରି ହୋଲ୍‌ଡିଂ ଟ୍ୟାକ୍ସ, ସମ୍ପତ୍ତି ଟିକସ, ପ୍ରମାଣପତ୍ର ଏବଂ ବିଭିନ୍ନ ପ୍ରକାର ଜନସେବା ୱେବ୍‌ ପ୍ଲାଟ୍‌ଫର୍ମ ଜରିଆରେ ଯୋଗାଇ ଦିଆଯିବ ବୋଲି ଲକ୍ଷ୍ୟ ରଖାଯାଇଥିଲା। ତେବେ ଅଧିକାରୀଙ୍କ ଅପାରଗତା ଯୋଗୁ ଇ-ଗଭର୍ନାନ୍ସ ପ୍ରକଳ୍ପ ଫେଲ୍‌ ମାରିଛି। ସହରବାସୀଙ୍କୁ ଇ-ସେବା ତ ମିଳିଲା ନାହିଁ ଏହି କାର୍ଯ୍ୟ ପାଇଁ ରାଜ୍ୟ ସରକାର ଖର୍ଚ୍ଚ କରିଥିବା ୪.୦୭ କୋଟି ଟଙ୍କା ପାଣିରେ ପଡ଼ିଛି। କେବଳ ସେତିକି ନୁହେଁ, କେନ୍ଦ୍ର ସରକାର ଏ ବାବଦରେ ଯୋଗାଇ ଦେବାକୁ ଥିବା ୮.୬୩ କୋଟି ଟଙ୍କା ମଧ୍ୟ ରାଜ୍ୟକୁ ହରାଇବାକୁ ପଡ଼ିଛି। ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ଏହି ଅପାରଗତାକୁ କମ୍ପ୍‌ଟ୍ରୋଲର ଆଣ୍ଡ ଅଡିଟର ଜେନେରାଲ(ସିଏଜି) ପଦାରେ ପକାଇଛନ୍ତି।
ସିଏଜି ନିଜ ରିପୋର୍ଟରେ ଉଲ୍ଲେଖ କରିଛନ୍ତି ଯେ ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରଣାଳୟ ପକ୍ଷରୁ ୨୦୦୫ରେ ଜବାହରଲାଲ ନେହେରୁ ଜାତୀୟ ସହରାଞ୍ଚଳ ନବୀକରଣ ମିଶନ (ଜେଏନ୍‌ଏନ୍‌ୟୁଆର୍‌ଏମ୍‌) ଅଧୀନରେ ୨୦୦୫ରେ ଇ-ଗଭର୍ନାନ୍ସ ଉପରେ ନ୍ୟାଶନାଲ ମିଶନ ମୋଡ୍‌ ପ୍ରୋଜେକ୍ଟ (ଏନ୍‌ଏମ୍‌ଏମ୍‌ପି) ଆରମ୍ଭ କରାଯାଇଥିଲା। ଏହାର ମୁଖ୍ୟ ଉଦ୍ଦେଶ୍ୟ ଥିଲା ୱେବ୍‌ ପ୍ଲାଟ୍‌ଫର୍ମ ଜରିଆରେ ସହରବାସିନ୍ଦାଙ୍କୁ ବିଭିନ୍ନପ୍ରକାର ମାୈଳିକ ଜନସେବା ଯୋଗାଇ ଦେବା। ଏଥିରେ କେନ୍ଦ୍ର ଓ ରାଜ୍ୟ ସରକାର ମିଳିତ ଭାବେ ୮୦:୨୦ ଅନୁପାତରେ ଖର୍ଚ୍ଚ ବହନ କରିବେ। ଏନ୍‌ଏମ୍‌ଏମ୍‌ପି ଗାଇଡ୍‌ଲାଇନ ଅନୁସାରେ ରାଜ୍ୟ ସରକାର ଉଭୟ ରାଜ୍ୟ ଓ ସହରାଞ୍ଚଳ ଇ-ଗଭର୍ନାନ୍ସ ପାଇଁ ଜଣେ ପରାମର୍ଶଦାତା ନିଯୁକ୍ତି କରିବେ। ପରାମର୍ଶଦାତା ବିସ୍ତୃତ ପ୍ରକଳ୍ପ ରିପୋର୍ଟ(ଡିିପିଆର) ପ୍ରସ୍ତୁତ କରିବା, ରିକ୍ୟୁଏଷ୍ଟ ଫର ପ୍ରପୋଜାଲ(ଆର୍‌ଏଫ୍‌ପି), ସଫ୍ଟୱେର ଡେଭଲପର ଚୟନ ପ୍ରକ୍ରିିୟା ସହିତ ସିଷ୍ଟମ ଚାଲୁ ହେବା ଯାଏ ତଦାରଖ କରିବେ ବୋଲି ସ୍ଥିର ହୋଇଥିଲା। ଓଡ଼ିଶା ସରକାର ୨୦୧୨ ଜାନୁୟାରୀ ୧୮ରେ ମେସର୍ସ ୱିପ୍ରୋ ଲିମିଟେଡକୁ ପରାମର୍ଶଦାତା ଭାବେ ନିଯୁକ୍ତ କରିଥିଲେ। ପ୍ରଥମେ ଭୁବନେଶ୍ୱର ଓ ପୁରୀରେ ଏନ୍‌ଏମ୍‌ଏମ୍‌ପି କାର୍ଯ୍ୟକାରୀ କରିବା ପାଇଁ ରାଜ୍ୟ ସରକାର ନିଷ୍ପତ୍ତି ନେଇଥିଲେ। ଭୁବନେଶ୍ୱର ପାଇଁ ୧୨.୯୮ କୋଟି ଏବଂ ପୁରୀ ସହର ପାଇଁ ୧.୦୪ କୋଟି ଟଙ୍କାକୁ ମିଶାଇ ମୋଟ ୧୪.୦୨ କୋଟି ଟଙ୍କା ପ୍ରକଳ୍ପ ମୂଲ୍ୟର ପ୍ରସ୍ତାବକୁ କେନ୍ଦ୍ର ନଗର ଉନ୍ନୟନ ମନ୍ତ୍ରଣାଳୟ ଅନୁମୋଦନ କରିଥିଲା। ୨୦୧୨ ଅକ୍ଟୋବରରେ କେନ୍ଦ୍ର ସରକାର ପ୍ରଥମ କିସ୍ତି ହିସାବରେ ୨.୬ କୋଟି ଟଙ୍କା ପ୍ରଦାନ କରିଥିଲେ। ୨୦୧୨ ଡିସେମ୍ବରରେ ରାଜ୍ୟ ସରକାର ନିଜ ଅଂଶଧନ ବାବଦରେ ୬୫ ଲକ୍ଷ ଟଙ୍କା ପ୍ରଦାନ କରିଥିଲେ। ପରାମର୍ଶଦାତା ୱିପ୍ରୋ ଚୁକ୍ତିନାମା ଅନୁସାରେ ଦୁଇ ସହରରେ ୨.୬ କୋଟି ଟଙ୍କାରେ ପ୍ରକଳ୍ପ କାର୍ଯ୍ୟକାରୀ କରିବା ପାଇଁ ଉତ୍ତରଦାୟୀ । ୨୦୧୪ରେ ପ୍ରକଳ୍ପ ଶେଷ ହେବାକୁ ସମୟ ଧାର୍ଯ୍ୟ ହୋଇଥିଲା। ମାତ୍ର ୱିପ୍ରୋ ନିର୍ଦ୍ଧାରିତ ସମୟସୀମା ମଧ୍ୟରେ ପ୍ରକଳ୍ପ କାର୍ଯ୍ୟ ଶେଷ କରିପାରି ନ ଥିଲା। ୱିପ୍ରୋ ଚୁକ୍ତିନାମାକୁ ୨୦୧୫ ଜାନୁୟାରୀ ୧୬ ଯାଏ ବୃଦ୍ଧି କରାଯାଇଥିଲା। କେବଳ ସେତିକି ନୁହେଁ, ଚୁକ୍ତିନାମା ସହିତ ୬୦ ଲକ୍ଷ ଟଙ୍କାର ପ୍ରକଳ୍ପ ମୂଲ୍ୟ ମଧ୍ୟ ବଢ଼ାଇ ଦିଆଯାଇଥିଲା। ୨୦୧୭ ଡିସେମ୍ବର ୩୧ ସୁଦ୍ଧା ଚୁକ୍ତିନାମା ଶେଷ ହୋଇଥିବାରୁ ୩.୨ କୋଟି ବର୍ଦ୍ଧିତ ଚୁକ୍ତିନାମା ମଧ୍ୟରୁ ୨୦୧୩ ଜାନୁୟାରୀରୁ ୨୦୧୭ ମେ’ ମାସ ମଧ୍ୟରେ ଡିପିଆର ପ୍ରସ୍ତୁତି ଏବଂ ପ୍ରକଳ୍ପ ପରିଚାଳନା ମୂଲ୍ୟ ବାବଦରେ ୱିପ୍ରୋକୁ ୨.୬୩ କୋଟି ଟଙ୍କା ପ୍ରଦାନ କରାଯାଇଥିଲା। ସିଏଜି ଅଡିଟରୁ ଜାଣିବାକୁ ପାଇଲେ ଯେ ରାଜ୍ୟ ନଗର ଉନ୍ନୟନ ବିଭାଗ ୨୦୨୦ ମାର୍ଚ୍ଚ ସୁଦ୍ଧା ପ୍ରକଳ୍ପ ପାଇଁ ପ୍ରାରମ୍ଭିକ ୪.୦୭ କୋଟି ଖର୍ଚ୍ଚ କରିଥିଲେ ମଧ୍ୟ ତାହା ବେକାର ହୋଇଥିଲା। ପ୍ରକଳ୍ପର ବ୍ଲ୍ୟୁପ୍ରିିଣ୍ଟ ପ୍ରସ୍ତୁତ କରିବା ଓ ଡେଭଲପର ଚୟନରେ ବିଳମ୍ବ ଏବଂ ତ୍ରୁଟି ଯୋଗୁ ପ୍ରକଳ୍ପ କାର୍ଯ୍ୟକାରୀ ହୋଇ ପାରି ନ ଥିଲା। ଓପିଡବ୍ଲ୍ୟୁଡି କୋଡ୍‌ ଅନୁଯାୟୀ ଯଦି ଏଲ୍‌-୧ ବିଡର ଚୟନ ପରେ ଚୁକ୍ତିନାମା ପାଇଁ ନ ଆସନ୍ତି ତେବେ ଏଲ୍‌-୨ ବିଡରଙ୍କ ସହିତ ଚୁକ୍ତିନାମା କରାଯିବ। ନଚେତ୍‌ ଟେଣ୍ଡର ବାତିଲ କରାଯିବ। ଦେଖାଯାଇଥିଲା ଯେ ରାଜ୍ୟ ନଗର ଉନ୍ନୟନ ବିଭାଗ ଏକ ସଫ୍ଟଓ୍ବେର ଡେଭଲପର ଚୟନ ପାଇଁ ୨୦୧୩ ଫେବୃୟାରୀ ୬ରେ ଆର୍‌ଏଫ୍‌ପି ଜାରି କରିଥିଲା। ଓ୍ବିପ୍ରୋ ସହ ଚୁକ୍ତିନାମା ଅନୁଯାୟୀ ଆର୍‌ଏଫ୍‌ପି ଚୂଡ଼ାନ୍ତ ପାଇଁ ୬୦ ଦିନ ସମୟ ଧାର୍ଯ୍ୟ କରାଯାଇଥିବାବେଳେ ତାହାକୁ ୩୮୪ ଦିନକୁ ଗଡ଼ାଇ ଦିଆଯାଇଥିଲା। ଅନ୍ୟ ପକ୍ଷରେ ଏଲ୍‌-୧ ବିଡରକୁ ବିଭାଗ ପ୍ରତ୍ୟାଖ୍ୟାନ କରିବା ପରେ ଏଲ୍‌-୨ ବିଡରକୁ କାର୍ଯ୍ୟ ନ ଦେଇ ଟେଣ୍ଡରକୁ ବାତିଲ କରାଯାଇଥିଲା। ୨୦୧୩ ଡିସେମ୍ବର ୧୮ରେ ନଗର ଉନ୍ନୟନ ବିଭାଗ ଆଉ ଏକ ଟେଣ୍ଡର ଜାରି କରିଥିଲା। ଏଥିରେ ମାତ୍ର ଜଣେ ବିଡର ଅଂଶଗ୍ରହଣ କରିବାରୁ ଉକ୍ତ ଟେଣ୍ଡରକୁ ବାତିଲ କରାଯାଇଥିଲା। ଇତିମଧ୍ୟରେ କେନ୍ଦ୍ରୀୟ ଯୋଜନା ଜେଏନ୍‌ଏନ୍‌ୟୁଆରଏମ୍‌ର ଅବଧି ଶେଷ ହୋଇଯାଇଥିଲା। ସଫ୍ଟୱେର ବିକାଶ କରିବା ପୂର୍ବରୁ ଏସ୍‌ଆରଏସ୍‌ ଚୂଡ଼ାନ୍ତ ନ ହେବା ଏବଂ ସଫ୍ଟୱେର ଡେଭଲପର ଚୟନରେ ବିଳମ୍ବ ହେତୁ ଏନ୍‌ଏମ୍‌ଏମ୍‌ପି ସଫଳତାର ସହିତ କାର୍ଯ୍ୟକାରୀ ହୋଇପାରିଲା ନାହିଁ। ଫଳରେ ଏହି ପ୍ରକଳ୍ପ ପାଇଁ ବ୍ୟୟ କରାଯାଇଥିବା ୪.୦୭ କୋଟି ଟଙ୍କା ପାଣିରେ ପଡ଼ିବା ସହ ୮.୬୩ କୋଟି ଟଙ୍କାର କେନ୍ଦ୍ରୀୟ ସହାୟତା ରାଜ୍ୟକୁ ହରାଇବାକୁ ପଡ଼ିଲା ବୋଲି ସିଏଜି ତାଙ୍କ ରିପୋର୍ଟରେ ଉଲ୍ଲେଖ କରିଛନ୍ତି।


Enter your email to get our daily news in your inbox.

All Right Reserved By Dharitri.Com

ତାତି ଛୁଇଁଲା ୪୦

ଭୁବନେଶ୍ୱର,୨୯।୩: ଚଳିତବର୍ଷ ପ୍ରଥମ ଥର ପାଇଁ ରାଜ୍ୟରେ ୪୦ ଡ଼ିଗ୍ରୀ ଛୁଇଁଲା ତାତି। ଟିଟଲାଗଡ, ବଲାଙ୍ଗିର, ବୌଦ୍ଧ, ଭବାନୀପାଟଣା ଓ ନୟାଗଡରେ ତାପମାତ୍ରା ୪୦ ଡ଼ିଗ୍ରୀ...

ପ୍ରତି ନିର୍ବାଚନରେ ବଢିଚାଲିଛି ଖର୍ଚ୍ଚ ସୀମା, ଲୋକ ସଭା ନିର୍ବାଚନରେ ଏତେ ଲକ୍ଷ ଟଙ୍କା ଖର୍ଚ୍ଚ କରନ୍ତି ପ୍ରାର୍ଥୀ

ନୂଆଦିଲ୍ଲୀ,୨୯।୩: ଲୋକ ସଭା ନିର୍ବାଚନ ୨୦୨୪ର ସମସ୍ତ ପ୍ରକ୍ରିୟା ଆରମ୍ଭ ହୋଇସାରିଛି। ନିର୍ବାଚନ ପ୍ରକ୍ରିୟା ମଧ୍ୟରେ ନିର୍ବାଚନ କମିଶନରଙ୍କ ଦାୟିତ୍ୱ ରହିଥାଏ କି କ୍ଷମତାସୀନ ଦଳ...

ଆଜି ଗୁଡ୍‌ ଫ୍ରାଇଡେ: ବାଇବେଲ ପାଠକରି ସାମୂହିକ ପ୍ରାର୍ଥନା କଲେ ଶ୍ରଦ୍ଧାଳୁ

ଦାରିଙ୍ଗବାଡି,୨୯।୩ (ଅରୁଣ ସାହୁ ): ଆଜି ଗୁଡ୍‌ ଫ୍ରାଇଡେ। ଏହାକୁ ଶ୍ରଦ୍ଧାଳୁମାନେ ରୀତିନୀତି ଅନୁସାରେ ପାଳନ କରିଛନ୍ତି। ଯିଶୁଖ୍ରୀଷ୍ଟଙ୍କୁ ଆଜିର ଦିନରେ କାଲବରୀ ନାମକ ଏକ...

ବିଜେଡି-ଭାଜପା-କଂଗ୍ରେସକୁ ମୟୂରଭଞ୍ଜରେ ଟକ୍କର ଦେବ ଏହି ଦଳ, ଘୋଷଣା କଲା ପ୍ରାର୍ଥୀ

ମୟୂରଭଞ୍ଜ,୨୯।୩: ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଶିବୁ ସୋରେନଙ୍କ ଝିଅ ପୁଣିଥରେ ଚଳିତ ନିର୍ବାଚନରେ ମଇଦାନକୁ ଓହ୍ଲାଇଛନ୍ତି। ଝାଡ଼ଖଣ୍ଡ ମୁକ୍ତି ମୋର୍ଚ୍ଚା(JMM) ଶିବୁ ସୋରେନଙ୍କ ଝିଅ ଅଞ୍ଜନି...

ପୈତୃକ ଗାଁରୁ ପ୍ରଚାର ମଇଦାନକୁ ଓହ୍ଲାଇଲେ ପ୍ରଦୀପ

ବରଗଡ଼,୨୯।୩(ପ୍ରେମାନନ୍ଦ ଖମାରୀ): ବରଗଡ଼ ଲୋକସଭା ଆସନ ପାଇଁ ଭାଜପା ପ୍ରଦୀପ ପୁରୋହିତଙ୍କୁ ପ୍ରାର୍ଥୀ କରିଛି। ବରଗଡ଼ ଲୋକସଭା କ୍ଷେତ୍ର ଅଧୀନ ବିଜେପୁର ନିର୍ବାଚନ ମଣ୍ଡଳି ପୈତୃକ...

ନବବିବାହିତ ଯୁବକଙ୍କୁ ଗଳାକାଟି ହତ୍ୟା

ଗଜପତି,୨୯।୩(ଗିରିଧାରୀ ପରିଛା): ଗଜପତି ଜିଲା ଗୋସାଣି ବ୍ଲକ ଗୁରାଣ୍ଡି ଥାନା ଅଧୀନ ତୋଟାଗୁମ୍ବୁଡା ଗାଁରେ ଏକ ଅଘଟଣ ଘଟିଛି। ଜଣେ ନବବିବାହିତ ଯୁବକଙ୍କୁ ଗଳାକାଟି ଅତି...

ମୁଖ୍ୟମନ୍ତ୍ରୀଙ୍କୁ ଭେଟି ଆଶୀର୍ବାଦ କାମନା କଲେ ଦେବେଶ ଆଚାର୍ଯ୍ୟ

ବରଗଡ଼,୨୯ା୩(ପ୍ରେମାନନ୍ଦ ଖମାରୀ): ବରଗଡ଼ ବିଧାନସଭା ନିର୍ବାଚନ ମଣ୍ଡଳୀ ପାଇଁ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କ୍ରମାଗତ ତୃତୀୟଥର ପାଇଁ ଦେବେଶ ଆଚାର୍ଯ୍ୟଙ୍କ ନାମ...

ଗୁଡ୍‌ ଫ୍ରାଇଡେରେ ପ୍ରାର୍ଥନା କରି ନିର୍ବାଚନ ପ୍ରଚାର ଆରମ୍ଭ କଲେ ଦିଲୀପ ତିର୍କୀ

ସୁନ୍ଦରଗଡ,୨୭ା୩(ଜୟ ନାରାୟଣ ମେଣ୍ଡୁଳି): ଚର୍ଚ୍ଚରେ ପ୍ରାର୍ଥନା କରି ପ୍ରଚାର ଆରମ୍ଭ କରିଛନ୍ତି ବିଜେଡି ଲୋକସଭା ପ୍ରାର୍ଥୀ ଦିଲୀପ ତିର୍କୀ। ପ୍ରାର୍ଥୀ ଘୋଷଣା ହେବା ପରେ ଶୁକ୍ରବାର...

Advertisement

ଧରିତ୍ରୀ କାର୍ଟୁନ

Archives
Model This Week

ପିଲାଙ୍କ ଧରିତ୍ରୀ

Why Dharitri