ମୁମ୍ବାଇ, ୧୩।୯ : ଉଦ୍ଧବ ଠାକରେଙ୍କ ନେତୃତ୍ୱରେ ଶିବସେନା ପୁଣି ଥରେ କେନ୍ଦ୍ରର ଭାଜପା ନେତୃତ୍ୱାଧିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କୁ ଟାର୍ଗେଟ କରିଛି। ମଙ୍ଗଳବାର ଶିବସେନା ରାହୁଲ ଗାନ୍ଧୀଙ୍କ ଭାରତ ଯୋଡ ଯାତ୍ରାକୁ ପ୍ରଶଂସା କରିବା ସହ ଭାଜପା ସରକାରଙ୍କ ଏକଛତ୍ରବାଦୀ ଶାସନଠାରୁ କଂଗ୍ରେସର ବଂଶବାଦ ଶାସନ ଭଲ ବୋଲି କହିଛନ୍ତି।
ରାହୁଲ ଗାନ୍ଧୀଙ୍କ ପୋଷାକକୁ ଟାର୍ଗେଟ କରିବା ପରିବର୍ତ୍ତେ ଭାଜପା ତାଙ୍କ ଦ୍ୱାରା ଉଠାଯାଇଥିବା ପ୍ରଶ୍ନର ଉତ୍ତର ଦେବା ଉଚିତ ବୋଲି ଶିବସେନା ମୁଖପତ୍ର ସାମନାର ସମ୍ପାଦକୀୟରେ ପ୍ରକାଶିତ ଲେଖାରେ ଉଲ୍ଲେଖ କରାଯାଇଛି। ସେ କିପରି ପୋଷାକ ପିନ୍ଧନ୍ତି ଏବଂ ସେ କଣ ଖାଉଛନ୍ତି’ ଭଳି ଗୁରୁତ୍ୱହୀନ ପ୍ରସଙ୍ଗ ଭାଜପା ଉଠାଉଛି।
ଭାରତ ଯୋଡ ଯାତ୍ରା ସମୟରେ ଉଠାଯାଇଥିବା ପ୍ରଶ୍ନର ଯୋଗ୍ୟତା ରହିଛି ଏବଂ ସେମାନେ ଭାଜପାକୁ ଚୁପ କରି ଦେଇଛନ୍ତି।
ସମ୍ପାଦକୀୟରେ କୁହାଯାଇଛି ରାହୁଲ ଗାନ୍ଧୀଙ୍କ ଗସ୍ତ ବେରୋଜଗାର, କୃଷକ, ଶ୍ରମିକ ଏବଂ କ୍ଷୁଦ୍ର ଏବଂ ମଧ୍ୟମ ବ୍ୟବସାୟ ସହ ଜଡିତ ପ୍ରସଙ୍ଗ ଉଠାଉଥିବାରୁ ଲୋକଙ୍କ ଠାରୁ ଭଲ ପ୍ରତିକ୍ରିୟା ମିଳୁଛି। ସୂଚନାଯୋଗ୍ୟ, ନିକଟରେ ଦାମୀ ଟି-ଶର୍ଟ ପିନ୍ଧିଥିବା ନେଇ ଭାଜପା ରାହୁଲଙ୍କୁ ଟାର୍ଗେଟ କରିଥିଲା।
ଏହାର ଜବାବରେ ସାମନା ସମ୍ପାଦକୀୟରେ ଏଭଳି କୁହାଯାଇଛି। ଭାରତ ଯୋଡ ଯାତ୍ରା ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରୁଛି ଏବଂ ଏହା ଯୋଗୁ ଭାଜପାର ପେଟ ଯନ୍ତ୍ରଣା ବଢ଼ିବାରେ ଲାଗିଛି। ରାହୁଲ ଗାନ୍ଧୀଙ୍କ ଗସ୍ତ ଦେଶରେ ଘୃଣାର ପରିବେଶକୁ ଶେଷ କରିବ ବୋଲି ଉଲ୍ଲେଖ କରାଯାଇଛି।
