ଭୁବନେଶ୍ୱର,୨୮ା୧(ବ୍ୟୁରୋ): ଜାନୁୟାରୀ ଶେଷ ହୋଇନି। ଶୀତ ଗାଏବ। ବିନା ପଙ୍ଖାରେ ଆଉ ଶୋଇବା ସମ୍ଭବ ହେଉନାହିଁ। ଗତ ୩/୪ ଦିନ ଭିତରେ ଦିନ ତାପମାତ୍ରା ୪ରୁ ୫ ଡିଗ୍ରୀ ସେଲ୍ସିୟସ ଉପରକୁ ଉଠିଯାଇଛି। ମିଳିଥିବା ସୂଚନା ଅନୁଯାୟୀ ବାଲେଶ୍ୱରରେ ସର୍ବୋଚ୍ଚ ତାପମାତ୍ରାରେ ୫.୬ ଡିଗ୍ରୀ ସେଲ୍ସିୟସ ବୃଦ୍ଧି ପାଇଥିବା ବେଳେ ସମ୍ବଲପୁର ୫.୫, ଅନୁଗୋଳ ୪.୮, ଝାରସୁଗୁଡ଼ା ୪.୮, ପାରାଦୀପ ୪.୬, କେନ୍ଦୁଝର ୪.୩, ଭୁବନେଶ୍ୱର ୪.୨, ଚାନ୍ଦବାଲି ୪.୧ ଏବଂ ଫୁଲବାଣୀରେ ୪ ଡିଗ୍ରୀ ସେଲ୍ସିୟସ ବଢ଼ିଯାଇଛି। ଶୁକ୍ରବାର ବୌଦ୍ଧରେ ସର୍ବାଧିକ ତାପମାତ୍ରା ୩୫ ଡିଗ୍ରୀ ସେଲ୍ସିୟସ ରେକର୍ଡ କରାଯାଇଥିବା ବେଳେ ତାଳଚେର ୩୪.୪, ଗୋପାଳପୁର ୩୩.୮, ଝାରସୁଗୁଡ଼ା ୩୩.୬ ଏବଂ ନବରଙ୍ଗପୁରରେ ସର୍ବୋଚ୍ଚ ତାପମାତ୍ରା ୩୩ ଡିଗ୍ରୀ ସେଲ୍ସିୟସ ରେକର୍ଡ କରାଯାଇଛି। ଦକ୍ଷିଣ ପଶ୍ଚିମ ଦିଗରୁ ବାୟୁ ପ୍ରବାହିତ ହେବା ସହ ସମୁଦ୍ରରୁ ଆସୁଥିବା ଜଳୀୟ ବାଷ୍ପ ହଠାତ୍ ବନ୍ଦ ହୋଇ ଯାଇଛି। ଏହାର ପ୍ରଭାବରେ ହଠାତ୍ ଗରମ ବଢ଼ିଯାଇଛି। ତେବେ ଗରମ ବଢ଼ିଯାଇଥିବାରୁ ଆସନ୍ତା ୩୦ ଓ ୩୧ରେ ରାଜ୍ୟରେ ବର୍ଷାର ସମ୍ଭାବନା ରହିଛି।
