ବିଞ୍ଝାରପୁର,୧୯ା୧୨(ଡି.ଏନ.ଏ.): ଖରସ୍ରୋତା ନଦୀରେ ଗତବର୍ଷ ବନ୍ୟା ଆସି ବିଞ୍ଝାରପୁର ବ୍ଲକ ଚନ୍ଦ୍ରମୁଁ ପଞ୍ଚାୟତ ମଲ୍ଲିପୁର ଗ୍ରାମର ରାସ୍ତା ଭାଙ୍ଗିଥିଲା। ଇତିମଧ୍ୟରେ ବନ୍ୟାକୁ ବର୍ଷେ ପୂରିଥିଲେ ମଧ୍ୟ ରାସ୍ତା ମରାମତି ହୋଇନାହିଁ। ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଗ୍ରାମାଞ୍ଚଳର ଲୋକଙ୍କ ଗମନାଗମନ ପାଇଁ ପ୍ରତିବର୍ଷ ସରକାର ଲକ୍ଷଲକ୍ଷ ଟଙ୍କା ଖର୍ଚ୍ଚ କରୁଛନ୍ତି। ମାତ୍ର ପ୍ରଶାସନିକ ଅଧିକାରୀଙ୍କ ଇଚ୍ଛାଶକ୍ତିର ଅଭାବ ଯୋଗୁ ସରକାରଙ୍କ ପ୍ରକୃତ ଉଦ୍ଦେଶ୍ୟପୂରଣ ହୋଇପାରୁନି ବୋଲି ଲୋକେ ଅଭିଯୋଗ କରିଛନ୍ତି।
ସୂଚନା ଅନୁସାରେ, ଗ୍ରାମର ଏହି ମୁଖ୍ୟ ରାସ୍ତା ଗ୍ରାମ୍ୟ ଉନ୍ନୟନ ବିଭାଗକୁ ହସ୍ତାନ୍ତର ହେବାପରେ କିଛିବର୍ଷ ପୂର୍ବେ ତାହାକୁ ପକ୍କାରାସ୍ତା କରାଯାଇଥିଲା। ତେବେ ବିଭିନ୍ନ ସାହିକୁ ଯାତାୟାତ ପାଇଁ ଉଦ୍ଦିଷ୍ଟ ରାସ୍ତା ନିର୍ମାଣ ଓ ମରାମତି ବ୍ଲକ ଏବଂ ପଞ୍ଚାୟତ ଅଧୀନରେ ରହିଛି। କିନ୍ତୁ ରାସ୍ତାଟି ମରାମତି ନ ହେବାରୁ ତାହା ମରଣଯନ୍ତା ପାଲଟିଛି। ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ତେଣୁ ରାସ୍ତାକୁ ତୁରନ୍ତ ମରାମତି କରିବାକୁ ଗ୍ରାମର ଆନଦ ମଲ୍ଲିକ, ରବି ମଲ୍ଲିକ, ସନା ମଲ୍ଲିକ, ଶ୍ରୀରଧର ମଲ୍ଲିକ, ମିଥୁନ ଦାସ, ଅମୂଲ୍ୟ ମଲ୍ଲିକ, ଭଜହରି ମଲ୍ଲିକ, ପହଲି ମଲ୍ଲିକ ଓ ନରୋତ୍ତମ ପରିଡ଼ା ପ୍ରମୁଖ ଦାବି କରିଛନ୍ତି।
