ଭଞ୍ଜନଗର,୨୮।୯(ବାବୁଲା ପ୍ରଧାନ):ଭଞ୍ଜନଗର ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀଙ୍କ ଅଧୀନରେ ଥିବା ଭଞ୍ଜନଗରତ୍-ବଦାଙ୍ଗି ରାଜ୍ୟ ରାଜପଥକୁ ୩ଟି ପର୍ଯ୍ୟାୟରେ କାମ କରାଯାଉଛି । ଏ ବାବଦରେ ୫୬ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟ ଅଟକଳ ରଖାଯାଇଛି । ସେଥିମଧ୍ୟରେ ଗାଲେରୀ-ବଦାଙ୍ଗି ପ୍ରଥମ ପର୍ଯ୍ୟାୟ କାମ ପାଇଁ ୧୭ କୋଟି ୭୯ଲକ୍ଷ ଅନୁମୋଦନ ମିଳିଛି । ଉକ୍ତ କାମର ଚୁକ୍ତି ଅବଧି ସମୟ ଗତବର୍ଷ ଅକ୍ଟୋବର ୨୫ରେ ଶେଷ ହୋଇଛି। କିନ୍ତୁ ବଦାଙ୍ଗି ସମେତ କେତେକ ସ୍ଥାନରେ ଜବରଦଖଲ ଉଚ୍ଛେଦରେ ବିଳମ୍ବ ଯୋଗୁ କାମ ପୂର୍ଣ୍ଣାଙ୍ଗ ହୋଇପାରୁନାହିଁ । ସେହିଭଳି ତିଳିସିଙ୍ଗି ନିକଟସ୍ଥ ପହଣ୍ଡା ଛକରୁ ଗାଲେରୀ ରାଜପଥ କାମ ଦ୍ୱିତୀୟ ପର୍ଯ୍ୟାୟରେ ଚାଲିଛି। ଏ ବାବଦରେ ୨୪ କୋଟି ୪୯ଲକ୍ଷ ଟଙ୍କା ଅନୁମୋଦନ ମିଳିଛି । ଉକ୍ତ କାମର ଚୁକ୍ତି ଅବଧି ଗତ ମେ’ ୧୮ରେ ଶେଷହୋଇଛି। କିନ୍ତୁ କାମ ସରିନଥିବା ଯୋଗୁ ପୁଣି ଚୁକ୍ତି ଅବଧି ଅକ୍ଟୋବର ୩୧ ତାରିଖ ପର୍ଯ୍ୟନ୍ତ ବଢ଼ାଇ ଦିଆଯାଇଛି। ଗାଲେରୀଠାରୁ ସୋରିଷମୁଳି ପର୍ଯ୍ୟନ୍ତ ଅନେକ କାମ ଏବେ ବି ବାକି ଅଛି। ବର୍ଦ୍ଧିତ ଅବଧି ସମୟ ମଧ୍ୟରେ ଠିକାଦାର କାମ ଶେଷ କରିବା ଭଳି ଲାଗୁନାହିଁ। ସେହିଭଳି ତୃତୀୟ ପର୍ଯ୍ୟାୟରେ ଭଞ୍ଜନଗର ଠାରୁ କୋଟିବିରାଡ଼ି ପର୍ଯ୍ୟନ୍ତ କାମ ହେଉଛି। ଉକ୍ତ କାମ ଗତ ଫେବୃୟାରୀ ୨୦ରୁ ଆରମ୍ଭ ହୋଇଥିବା ବେଳେ ଏହା ୨୦୨୪ ଫେବୃୟାରୀ ୧୯ ତାରିଖରେ ସରିବା ଲକ୍ଷ୍ୟ ରଖାଯାଇଛି। କିନ୍ତୁ କାମ ଯେଉଁଭଳି ମନ୍ଥର ଗତିରେ ଚାଲିଛି ନିର୍ଦ୍ଧାରିତ ସମୟ ମଧ୍ୟରେ କାମ ସରିବ ନାହିଁ। ରାସ୍ତା ପ୍ରଶସ୍ତୀକରଣ ସମୟରେ ରାସ୍ତା ମଝିରୁ ବିଦ୍ୟୁତ୍ ଖୁଣ୍ଟକୁୁ ହଟାଇବାକୁ ପଡ଼ୁଛି। ରାସ୍ତା କଡ଼ରେ ଥିବା ଗଛ କଟାଯାଉଛି । ଯେଉଁଠି ଜବରଦଖଲ ଉଚ୍ଛେଦ କରିବାର ଆବଶ୍ୟକତା ପଡ଼ୁଛି ତାହା ମଧ୍ୟ କରାଯାଉଛି । କିନ୍ତୁ ପୂର୍ତ୍ତ ବିଭାଗ ଉକ୍ତ ବିଭାଗ ସମେତ ଠିକାଦାରଙ୍କ ସହ ସମନ୍ବୟ ରଖିବାରେ ବିଫଳ ହେଉଛି । ତେଣୁ କାମ ଗୁଡ଼ିକ ବିଳମ୍ବ ହେଉଛି। ଏଥିସହ ଯନ୍ତ୍ରୀମାନେ କାମକୁ ନିୟମିତ ତଦାରଖ କରୁ ନ ଥିବା ଅଭିଯୋଗ ହେଉଛି। ଅନେକ ସମୟରେ ବିଭାଗୀୟ କର୍ମଚାରୀମାନେ କାର୍ଯ୍ୟସ୍ଥଳରେ ଅନୁପସ୍ଥିତ ରହୁଛନ୍ତି। ଏତେ ବଡ଼ ବଡ଼ ପ୍ରକଳ୍ପ କାର୍ଯ୍ୟ ଚାଲୁଥିବା ବେଳେ କର୍ମଚାରୀମାନଙ୍କ ଅନୁପସ୍ଥିତି ଯୋଗୁ କେତେକ ସ୍ଥାନରେ କାମ ନିମ୍ନମାନର ହେଉଥିବା ଅଭିଯୋଗ ହେଉଛି । ତେଣୁ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟିଦେଇ ତୁରନ୍ତ ଆବଶ୍ୟକ ପଦକ୍ଷେପ ନେବାପାଇଁ ସାଧାରଣରେ ଦାବି ହୋଇଛି। ଏନେଇ ପୂର୍ତ୍ତ ବିଭାଗ ଅଧୀକ୍ଷଣଯନ୍ତ୍ରୀ ଆଶିଷ କୁମାର ନାୟକଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, କାମଗୁଡ଼ିକ କିଭଳି ତୁରନ୍ତ ସରିବ ସେଥିପାଇଁ ପଦକ୍ଷେପ ନିଆଯାଉଛି। ସେହିପରି ଭଞ୍ଜନଗର ଠାରୁ କୋଟିବିରାଡ଼ି ରାସ୍ତା ପାଇଁ ୧୩ କୋଟି ୯୫ଲକ୍ଷ ଟଙ୍କା ଅନୁଦାନ ମିଳିଥିବା ଜଣାପଡ଼ିଛି।
