ଜୋହାନ୍ସବର୍ଗ,୧୮ା୨(ପି.ଟି.)-ଦକ୍ଷିଣ ଆଫ୍ରିକା ପୂର୍ବତନ ଅଧିନାୟକ ଫାଫ୍ ଡୁ’ପ୍ଲେସି ବୁଧବାର ଟେଷ୍ଟ କ୍ରିକେଟରୁ ଅବସର ଘୋଷଣା କରିଛନ୍ତି। ଏଣିକି ସେ ଖେଳର ଶର୍ଟ ଫର୍ମାଟ ଉପରେ ଧ୍ୟାନ ଦେବେ। ସେ ଅନ୍ତର୍ଜାତୀୟ ଦିନିକିଆ ଖେଳିବା ଜାରି ରଖିବେ। କିନ୍ତୁ ଟି୨୦କୁ ସେ ଅଗ୍ରାଧିକାର ଦେବେ। ୩୬ବର୍ଷୀୟ ଏହି କ୍ରିକେଟର ଇନଷ୍ଟାଗ୍ରାମ୍ରେ ତାଙ୍କ ଅବସର ଘୋଷଣା କରିଛନ୍ତି। ଆସନ୍ତା ଦୁଇ ବର୍ଷ ହେବାକୁ ଥିବା ଟି୨୦ କ୍ରିକେଟରେ ସେ ଭାଗନେବାକୁ ଚାହାନ୍ତି। ଡୁ’ପ୍ଲେସି ୬୯ ଟେଷ୍ଟ ମ୍ୟାଚ ଖେଳି ୪୦.୦୨ ଆଭରେଜରେ ୧୦ ଶତକ ଓ ୨୧ ଅର୍ଦ୍ଧଶତକ ସମେତ ୪୧୬୩ ରନ ସଂଗ୍ରହ କରିଛନ୍ତି। ୨୦୧୬ରେ ଏବି ଡି’ଭିଲର୍ସଙ୍କଠାରୁ ଦକ୍ଷିଣ ଆଫ୍ରିକା ଟେଷ୍ଟ ଓ ଟି୨୦ ଅଧିନାୟକ ଦାୟିତ୍ୱ ଗ୍ରହଣ କରିବା ପରେ ଗତବର୍ଷ ଏହି ପଦବୀରୁ ଓହରିଯାଇଥିଲେ। ଏହି ଡାହାଣହାତୀ ବ୍ୟାଟ୍ସମ୍ୟାନ ତାଙ୍କ ଦେଶ ତରଫରୁ ୧୪୩ ଅନ୍ତର୍ଜାତୀୟ ଦିନିକିଆ ଏବଂ ୫୦ ଟି୨୦ ଖେଳିଛନ୍ତି। ୫୦ ଓଭର କ୍ରିକେଟରେ ତାଙ୍କ ଆଭରେଜ ୪୭ ରହିଥିବାବେଳେ ଟି୨୦ରେ ୩୫.୫ ରହିଛି। ଡୁ’ପ୍ଲେସି କହିଛନ୍ତି ସେ ନିଜ ଦେଶ ତରଫରୁ ସମସ୍ତ ଫର୍ମାଟରେ ଖେଳିବାକୁ ଚାହାନ୍ତି। ମାତ୍ର ତାଙ୍କ ପାଇଁ ଟେଷ୍ଟ କ୍ରିକେଟରୁ ଅବସର ନେବା ସମୟ ଆସି ପହଞ୍ଚତ୍ୟାଇଛି।
