ଦିଗପହଣ୍ଡି,୧୯ା୧୦(ଅଶେଷ ନାଥ ମିଶ୍ର)ଦିଗପହଣ୍ଡିି ସ୍ଥିତ ଘୋଡ଼ାହାଡ଼ ପାଣି ପଞ୍ଚାୟତ ଶୀର୍ଷ କମିଟି କାର୍ଯ୍ୟାଳୟ ସଭା ଗୃହରେ ବୁଧବାର ପାଣି ପଞ୍ଚାୟତ ଶୀର୍ଷ କମିଟି ପକ୍ଷରୁ ଏକ ପରିବର୍ଦ୍ଧିତ ଅଳଲୋଚନା ସଭା ଅନୁଷ୍ଠିତ ହୋଇଯାଇଛି। ପାଣି ପଞ୍ଚାୟତ ଶୀର୍ଷ କମିଟି ସଭାପତି ରମେଶ ଚନ୍ଦ୍ର ପାତ୍ରଙ୍କ ଅଧ୍ୟକ୍ଷତାରେ ଆଲୋଚନା ସଭାରେ ଦିଗପହଣ୍ଡି ଘୋଡାହଡ ଜଳସେଚନ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ଇଂ . ଏ ଗୋପାଳ ରାଓ, ସହକାରୀ ଯନ୍ତ୍ରୀ ଇଂ. ସୁଶାନ୍ତ ମହାପାତ୍ର, ଇଂ. ନିରଞ୍ଜନ ସାହୁ, ଇଂ.କ୍ଷୀରୋଦ ବେହେରା, ଶୀର୍ଷ କମିଟି ସମ୍ପାଦକ କୀର୍ତ୍ତିଚନ୍ଦ୍ର ଗୌଡ ଓ କୋଷାଧ୍ୟକ୍ଷ ରାମନାଥ ବିଷୋୟୀଙ୍କ ସମେତ ୨୧ ପାଣି ପଞ୍ଚାୟତ କମିଟିର କାର୍ଯ୍ୟକର୍ତ୍ତା ଓ ସଦସ୍ୟ ବୃନ୍ଦ ଉପସ୍ଥିତ ଥିଲେ। ଘୋଡାହାଡ଼ ଡ୍ୟାମର ଜଳଧାରଣ କ୍ଷମତା ୧୧୭.୮୦ ମିଟର ରହିଥିବା ବେଳେ ଚଳିତ ବର୍ଷ ବର୍ଷା ଅଭାବ କାରଣରୁ ଡ୍ୟାମର ଜଳସ୍ତର କ୍ରମଶଃ ହ୍ରାସ ପାଇ ବୁଧବାର ଅପରାହ୍ନ ସୁଦ୍ଧା ୧୦୯.୩୫ ମିଟରରେ ପହଞ୍ଚିଛି। ଯାହାକି ଏହି ଡ୍ୟାମର ଜଳରାଶି ଉପରେ ନିର୍ଭର କରୁଥିବା ଦିଗପହଣ୍ଡି ଓ ସାନଖେମୁଣ୍ଡି ବ୍ଲକ ଅଞ୍ଚଳର ବହୁ ଚାଷ ଜମି ପ୍ରଭାବିତ ହୋଇଥିବା ଜଣାପଡିଛି। ଏପରିକି ଡ୍ୟାମରୁ ଚଳିତ ବର୍ଷ ଖରିଫ ଧାନ ଚାଷ ନିମନ୍ତେ କେନାଲ ଯୋଗେ ଡ୍ୟାମରୁ ପାଣି ଛଡ଼ା କାର୍ଯ୍ୟ ଚାଲୁ ରହିଛି। ଏଭଳି ସ୍ଥିତିରେ ଡ୍ୟାମରୁ ଆଉ ମାତ୍ର ୫ ଦିନ ପାଣି ଛଡାଯିବାକୁ ସଭାରେ ନିଷ୍ପତ୍ତି ନିଆଯାଇଛି। ଆବଶ୍ୟକ ବର୍ଷା ନହେଲେ ଚଳିତ ବର୍ଷ ମରୁଡି ହେବା ନେଇ ଘୋଡାହାଡ଼ ସେଚାଞ୍ଚଳର ସମସ୍ତ ପାଣି ପଞ୍ଚାୟତ କମିଟି ସଦସ୍ୟଙ୍କ ମଧ୍ୟରେ ଉଦବେଗ ପ୍ରକାଶ ପାଇବା ସହ ପାଣି ସରିବା ଯାଏ ଡ୍ୟାମରୁ କେନାଲ ଯୋଗେ ଜଳଯୋଗାଣ କରାଯିବା ନିମନ୍ତେ ସଭାରେ ସର୍ବସମ୍ମତ ପ୍ରସ୍ତାବ ଗୃହୀତ କରାଯାଇଥିଲା। ଏପରିକି ଘୋଡାହାଡ଼ ସେଚାଞ୍ଚଳ ଅଧିନରେ ଥିବା ସମସ୍ତ ଅଚଳ ଉଠା ଜଳସେଚନ ପ୍ରକଳ୍ପ ଗୁଡ଼ିକୁ ଜରୁରୀକାଳୀନ ଭିତ୍ତିରେ ଜଳସମ୍ପଦ ବିଭାଗ ଦ୍ୱାରା ମରାମତି କରାଯାଇ ଜଳସେଚନ ବ୍ୟବସ୍ଥାକୁ ତ୍ୱରାନ୍ବିତ କରିବାକୁ ସଭାରେ ପ୍ରସ୍ତାବ ଆଗତ କରାଯାଇଥିଲା। ସେହିପରି ଦିଗପହଣ୍ଡି ଅଞ୍ଚଳକୁ ସମ୍ପୂର୍ଣ୍ଣ ମରୁଡି ଘୋଷଣା ନିମନ୍ତେ ଆଗାମୀ ଦିନରେ ରାଜ୍ୟ ସରକାରଙ୍କ ଉଦ୍ଦେଶ୍ୟରେ ପାଣି ପଞ୍ଚାୟତ ଶୀର୍ଷ କମିଟି ପକ୍ଷରୁ ଦାବିପତ୍ର ପ୍ରଦାନ କରିବା ପାଇଁ ନିଷ୍ପତ୍ତି ନିଆଯାଇଛି।
