ଭୁବନେଶ୍ୱର, ୨୩।୬(ତ୍ରିନାଥ ମହାନ୍ତି): ରାଜଧାନୀର ଝାରପଡ଼ା ସ୍ୱତନ୍ତ୍ର କାରାଗାର ପୁଣିଥରେ ନିଶା କାରବାରକୁ ନେଇ ଚର୍ଚ୍ଚାକୁ ଆସିଛି। ଜେଲ ଭିତରେ ଅତ୍ୟଧିକ ପରିମାଣର ଡ୍ରଗ୍ସ ସେବନ କରିଥିବା ସନ୍ଦେହରେ ୫ ଜଣ କଏଦୀ ଗୁରୁତର ଅସୁସ୍ଥ ହୋଇପଡ଼ିଥିବା ବେଳେ, ସେମାନଙ୍କ ମଧ୍ୟରୁ ୩ ଜଣଙ୍କୁ ଆଇସିୟୁରେ ଭର୍ତ୍ତି କରାଯାଇଛି। ଦୁଇ ଜଣଙ୍କୁ ପରବର୍ତ୍ତୀ ଚିକିତ୍ସା ପାଇଁ ଏମ୍ସ ଭୁବନେଶ୍ୱରକୁ ସ୍ଥାନାନ୍ତର କରାଯାଇଥିବା ସୂଚନା ମିଳିଛି।
ମଙ୍ଗଳବାର ସନ୍ଧ୍ୟାରେ ଜେଲ ଭିତରେ ୫ ଜଣ କଏଦୀ ହଠାତ୍ ବାନ୍ତି କରିବା ସହ ଅଚେତ ହୋଇପଡ଼ିଥିଲେ। ପ୍ରଥମେ ସେମାନଙ୍କୁ ଜେଲ ହସ୍ପିଟାଲରେ ଚିକିତ୍ସା ଦିଆଯାଇଥିଲା। ଅବସ୍ଥା ସଙ୍କଟଜନକ ହେବାରୁ ପରେ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଅସୁସ୍ଥ କଏଦୀଙ୍କ ମଧ୍ୟରେ ଜଣେ ସଜାପ୍ରାପ୍ତ କଏଦୀ ଓ ଅନ୍ୟମାନେ ବିଚାରାଧୀନ ବନ୍ଦୀ ଥିବା ଜଣାପଡ଼ିଛି।
ଘଟଣାର ସୂଚନା ପାଇବା ପରେ ଡିସିପି ଜଗମୋହନ ମୀନା ଓ ଅନ୍ୟ ବରିଷ୍ଠ ପୋଲିସ ଅଧିକାରୀ କ୍ୟାପିଟାଲ ହସ୍ପିଟାଲରେ ପହଞ୍ଚି ପରିସ୍ଥିତିର ସମୀକ୍ଷା କରିଥିଲେ। କୌଣସି ଅପ୍ରୀତିକର ଘଟଣାକୁ ଏଡ଼ାଇବା ପାଇଁ ହସ୍ପିଟାଲ ପରିସରରେ ଅତିରିକ୍ତ ପୋଲିସ ବଳ ମୁତୟନ କରାଯାଇଛି।
ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ, ଜେଲ ପାଚେରୀ ବାହାରୁ ଟେନିସ୍ ବଲ୍ ଭିତରେ ଡ୍ରଗ୍ସ ଓ ଗଞ୍ଜେଇ ଭରି ନିର୍ଦ୍ଦିଷ୍ଟ ସମୟରେ ଭିତରକୁ ଫିଙ୍ଗାଯାଉଛି। ଏହି ବଲ୍ଗୁଡ଼ିକ ପରେ କିଛି ନିର୍ଦ୍ଦିଷ୍ଟ କଏଦୀଙ୍କ ପାଖରେ ପହଞ୍ଚୁଥିବା ଅଭିଯୋଗ ରହିଛି। ମଙ୍ଗଳବାର ସକାଳେ ଏଭଳି ଭାବେ ଜେଲ ଭିତରକୁ ନିଶାଦ୍ରବ୍ୟ ପହଞ୍ଚିଥିବା ଏବଂ ସନ୍ଧ୍ୟାରେ ୫ ଜଣ କଏଦୀ ତାହା ସେବନ କରିଥିବା ଚର୍ଚ୍ଚା ହେଉଛି।
ତେବେ କଏଦୀମାନଙ୍କ ଅସୁସ୍ଥତାର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନଥିବା ବେଳେ, ଘଟଣାର ତଦନ୍ତ ଚାଲିଥିବା କହିଛନ୍ତି ଜେଲ କର୍ତ୍ତୃପକ୍ଷ। ଅନ୍ୟପଟେ, ଜେଲ ଭିତରେ ଚାଲିଥିବା କଥିତ ଡ୍ରଗ୍ସ ରାକେଟର ପର୍ଦ୍ଦାଫାଶ କରିବା ପାଇଁ ସଂପୂର୍ଣ୍ଣ ଓ ନିରପେକ୍ଷ ତଦନ୍ତ ଦାବି କରିଛନ୍ତି ମାନବାଧିକାର କର୍ମୀ।
