ଭୁବନେଶ୍ୱର,୧୫।୪(ବ୍ୟୁରୋ): କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ(ଏସ୍ଟିଏଫ୍) ମଙ୍ଗଳବାର ଭୁବନେଶ୍ୱରରୁ ଦୁଇ ଆନ୍ତଃରାଜ୍ୟ ନିଶା ମାଫିଆଙ୍କୁ ଗିରଫ କରିବା ସହ ସେମାନଙ୍କଠାରୁ ୨୦୨ ଗ୍ରାମର ନିଷେଧ ନିଶାଦ୍ରବ୍ୟ ‘କୋକେନ’ ଜବତ କରିଥିଲା। ତେବେ କୋକେନ କାରବାର ଧରାପଡ଼ିବା ଓଡ଼ିଶାରେ ପ୍ରଥମ ଘଟଣା ହୋଇଥିବାବେଳେ ଏହାକୁ ନେଇ ଏବେ କ୍ରାଇମ୍ବ୍ରାଞ୍ଚର ଚିନ୍ତା ବଢ଼ିଛି। ପୂର୍ବରୁ ବ୍ରାଉନସୁଗାର, ଗଞ୍ଜେଇ ଆଦି ବେଆଇନ ନିଶାଦ୍ରବ୍ୟ କାରବାର ରୋକିବାରେ ସଫଳ ହୋଇ ନ ଥିବା ଓଡ଼ିଶା ପୋଲିସ ଓ କ୍ରାଇମ୍ବ୍ରାଞ୍ଚ ପାଇଁ ବିଦେଶୀ କୋକେନ ଆଉଏକ ଚ୍ୟାଲେଞ୍ଜ ସୃଷ୍ଟି କରିଛି। ତେଣୁ ଜେଲରେ ଥିବା ରାଜସ୍ଥାନର ୨ ଅଭିଯୁକ୍ତ ରବି ସିଂ ଓ ସନ୍ନି କୁମାରଙ୍କୁ ରିମାଣ୍ଡରେ ଆଣିବାକୁ ଯୋଜନା ରଖିଛି ଏସ୍ଟିଏଫ୍। କୋକେନ କାରବାରରେ ରବି ଓ ସନ୍ନିଙ୍କ ବିଦେଶ ଲିଙ୍କ୍ ରହିଥିବାରୁ ଗୁରୁତ୍ୱ ଆହୁରି ବଢ଼ିଯାଇଛି। ଏଥିସହ ଭୁବନେଶ୍ୱରର ବଡ଼ ବଡ଼ ହୋଟେଲ ଓ ହାଟ ବଜାରରେ ଏହି କାରବାର ଚାଲିଥିବା ସନ୍ଦେହ କରାଯାଉଛି। କାରଣ ସନ୍ନି ଭୁବନେଶ୍ୱର ସାଲିଆସାହିର ତାରିଣୀ ବସ୍ତିରେ ରହିବା ସହ ୟୁନିଟ୍-୨ ମାର୍କେଟ ବିଲ୍ଡିଂରେ ଚୁଡ଼ି ଓ କସ୍ମେଟିକ୍ସ ଦୋକାନ କରିଥିବା ଏସ୍ଟିଏଫ୍ ଜାଣିବାକୁ ପାଇଛି। କିନ୍ତୁ ସ୍ଥାୟୀ ନା ଅସ୍ଥାୟୀ ତାହା ଜଣାପଡି ନାହିଁ। ତେବେ ଏହା ଏକ ପ୍ରମୁଖ ମାର୍କେଟ ହୋଇଥିବାରୁ ସାରା ରାଜ୍ୟରୁ ବିଭିନ୍ନ ବର୍ଗର ଲୋକ ଓ ବ୍ୟବସାୟୀ ଏଠାକୁ ଆସିଥାନ୍ତି। ତେଣୁ ସେ ତାଙ୍କ ଦୋକାନରେ ଚୁଡ଼ି ବେପାର ଆଳରେ କୋକେନ ଭଳି ନିଶା କାରବାର କରୁଥିଲେ କି? ଏହି ର଼୍ୟାକେଟ କେବଳ ରାଜଧାନୀରେ ନା ଅନ୍ୟ ଜିଲାକୁ ବ୍ୟାପିଛି? ଏହା ପଛରେ ଆଉକିଏ ସଂପୃକ୍ତ ଅଛନ୍ତି? ରାଜଧାନୀରେ ଏହା କେବେଠୁ ଚାଲିଥିଲା? ସେହିଭଳି ଡିଲର ଓ ଗ୍ରାହକଙ୍କ ସମ୍ପର୍କରେ ଖୋଳତାଡ କରିବାକୁ ଉଦ୍ୟମ ଆରମ୍ଭ ହୋଇଛି। ସନ୍ନିଙ୍କ ସହ ରବିଙ୍କୁ ମଧ୍ୟ ଏସ୍ଟିଏଫ୍ ୫ ଦିନିଆ ରିମାଣ୍ଡରେ ଆଣିବା ଲାଗି କୋର୍ଟରେ ଆବେଦନ କରିଛି। କିନ୍ତୁ ଗୁରୁବାର, ଶୁକ୍ରବାର ବନ୍ଦ ରହିଥିବାରୁ କୋର୍ଟ ଶନିବାର ଅନୁମତି ଦେଇପାରନ୍ତି। ସେପଟେ ଏହି ଦୁଇ ଅଭିଯୁକ୍ତ ପଞ୍ଜାବ ଓ ଦିଲ୍ଲୀରେ କୋକେନ ବେପାର କରୁଥିବାବେଳେ ସନ୍ନି ଓଡ଼ିଶା ର଼୍ୟାକେଟର ମୁଖ୍ୟ କାର୍ପଟଦାର ବୋଲି କୁହାଯାଉଛି।
ଏସ୍ଟିଏଫ୍ର ସୂଚନା ଅନୁଯାୟୀ, କୋକେନ୍ ବିଶେଷକରି ଉତ୍ତର ଆମେରିକା ଓ ବ୍ରାଜିଲ୍ରୁ ଉପତ୍ାଦନ ହୁଏ। ସେଠାରୁ ଚୋରାଚାଲାଣ ହୋଇ ଭାରତ ଆସେ। ଏହାପରେ ଦିଲ୍ଲୀ ଓ ମୁମ୍ବାଇର ପ୍ରତିଷ୍ଠିତ ବ୍ୟକ୍ତିବିଶେଷ ଓ ଯୁବପିଢ଼ି ଏହି ନିଶାକୁ ନିଜ ଶରୀରକୁ ନିଅନ୍ତି। ଏହାର ଅନ୍ତର୍ଜାତୀୟ ବଜାର ମୂଲ୍ୟ ୧୦୦ ଗ୍ରାମ୍କୁ ୧୦ରୁ ୧୫ ଲକ୍ଷ ହୋଇଥିବାବେଳେ ଭାରତରେ ଏହା ୨୦ ଲକ୍ଷରୁ ଊର୍ଦ୍ଧ୍ୱ ଟଙ୍କାରେ ବିକ୍ରି ହୁଏ। ତେବେ ଗତ ସୋମବାର ଅଭିଯୁକ୍ତ ରବି କୋକେନ ଧରି ଟ୍ରେନ୍ରେ ଭୁବନେଶ୍ୱରରେ ପହଞ୍ଚତ୍ ଏକ ହୋଟେଲରେ ରାତ୍ରିଯାପନ କରିଥିଲେ। ମଙ୍ଗଳବାର ଉକ୍ତ କୋକେନକୁ ବିକ୍ରି କରିବା ଲାଗି ସନ୍ନିଙ୍କ ସହ ଜାଭିୟର ଛକ ନିକଟରେ ଛିଡ଼ା ହୋଇ ଓଡ଼ିଶାର ଡିଲର୍ଙ୍କୁ ଅପେକ୍ଷା କରିଥିଲେ। ଏହି ସମୟରେ ଏସ୍ଟିଏଫ୍ ଟିମ୍ ଉଭୟଙ୍କୁ କାବୁ କରିଥିଲା।
