ଭୁବନେଶ୍ୱର,୨୨।୧୨(ବ୍ୟୁରୋ): ରୋଗୀଙ୍କୁ ଜରୁରୀକାଳୀନ ସେବା ଯୋଗାଇବା ପାଇଁ ସରକାରଙ୍କ ଦ୍ୱାରା ନିୟୋଜିତ କରାଯାଇଛି ୧୦୮ ଆମ୍ବୁଲାନ୍ସ। ବିଭିନ୍ନ ସମୟରେ ୧୦୮ ଆମ୍ବୁଲାନ୍ସ ପ୍ରଶଂସନୀୟ କାର୍ଯ୍ୟ କରି ପ୍ରଶଂସା ସାଉଁଟିଥିବା ବେଳେ ନିଟକରେ ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ଯାହାକି ସମସ୍ତଙ୍କୁ ବିସ୍ମିତ କରିଛି। ସୋସିଆଲ ମିଡିଆରେ ଭାଇରାଲ ହୋଇଥିବା ଏକ ଭିଡିଓରେ ଦେଖିବାକୁ ମିଳିଛି, ଏକ ୧୦୮ ଆମ୍ବୁଲାନ ରୋଗୀଙ୍କୁ ଧରି ହସ୍ପିଟାଲ ଯାଉଥିଲା। ହେଲେ ହଠାତ୍ ରାସ୍ତା ମଝିରେ ଆମ୍ବୁଲାନଟି ଧିମା ଗତିରେ ଗଡିବାରେ ଲାଗିଥିଲା। ଏହା ସମସ୍ତଙ୍କୁ ଚକିତ କରିଥିଲା। ହେଲେ ରୋଗୀକୁ ନେଇ ଯାଉଥିବା ଉକ୍ତ ୧୦୮ ଆମ୍ବୁଲାନ୍ସ ଚାଳକ ମୋବାଇଲ ଫୋନ୍ରେ ଫିଲ୍ମ ଦେଖି ଗାଡ଼ି ଚଳାଉଥିବା ପରବର୍ତ୍ତୀ ସମୟରେ ଜଣାପଡ଼ିଛି।
୧୦୮ ଆମ୍ବୁଲାନ୍ସ ଚଳାଉଥିବା ସଂସ୍ଥା ‘ଜିକିତା’ ପକ୍ଷରୁ ଘଟଣାର ତଦନ୍ତ ପରେ ଏହି ୧୦୮ ଆମ୍ବୁଲାନ୍ସଟି ବାଲେଶ୍ୱର ଡିଏଚ୍ଏଚ୍ରେ ନିୟୋଜିତ ଥିବା ଜଣାପଡ଼ିଥିଲା। ଚାଳକଙ୍କ ନାମ ସୁଭ୍ରଜ୍ୟୋତି ବେହେରା ବୋଲି ଚିହ୍ନଟ କରାଯାଇଥିଲା। ଜରୁରୀକାଳୀନ ସେବା କ୍ଷେତ୍ରରେ କିଭଳି ଖାମ୍ଖିଆଲି ଗାଡ଼ି ଚାଳନା କରାଯାଇ ପାରିଲା ଏନେଇ ଚାଳକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି। ଚାଳକଙ୍କୁ ସେବାରୁ ଅବ୍ୟାହତି ଦିଆଯିବା ସହ ପରବର୍ତ୍ତୀ ସମୟରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିକିତା ପକ୍ଷରୁ କୁହାଯାଇଛି।
