ନୂଆଗାଁ,୧୪।୧୦ (ଧନେଶ୍ୱର ସାହୁ): ନୟାଗଡ଼ ଜିଲା ନୂଆଗାଁ ବ୍ଲକ ମାଳିସାହି ପଞ୍ଚାୟତର ଗୁଡୁପାଙ୍ଗି ଗ୍ରାମବାସୀଙ୍କୁ ପ୍ରଶାସନ ଅଣଦେଖା କରୁଛି। ଦୀର୍ଘ ୮ ମାସ ହେଲା ପାନୀୟ ଜଳ ଯୋଗାଣ ବନ୍ଦ ରହିଛି। ସେଥିପ୍ରତି ପ୍ରଶାସନ କିମ୍ବା ଜନପ୍ରତିନିଧି ଦୃଷ୍ଟି ଦେଉ ନ ଥିବା ଅଭିଯୋଗ ହେଉଛି। ଏପରିକି ମାଳିସାହି ପଞ୍ଚାୟତର ୪ଟି ଓ୍ବାର୍ଡକୁ ନେଇ ଗଠିତ ଗୁଡୁପାଙ୍ଗି ଗ୍ରାମରେ କୌଣସି ଉନ୍ନୟନମୂଳକ କାର୍ଯ୍ୟ କରାଯାଉନାହିଁ। ଓ୍ବାର୍ଡର କୌଣସି ହିତାଧିକାରୀଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ସାମିଲ କରାଯାଇ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି।
ମାଳିସାହି ପଞ୍ଚାୟତର ୪ଟି ଓ୍ବାର୍ଡ ( ୪,୫,୬,୭)ର ୩ ଶହ ପରିବାରର ପ୍ରାୟ ୨୨୦୦ ଜନସଂଖ୍ୟାଙ୍କୁ ନେଇ ଗୁଡୁପାଙ୍ଗି ଗ୍ରାମ ଗଠିତ। ସେମାନଙ୍କ ବ୍ୟବହାର ନିମନ୍ତେ ୫ ଟି ନଳକୂଅ ଓ ୨ ଗୋଟି ଖୋଲା କୂଅ ରହିଛି। ସେଥିରୁ ପାଣି ବ୍ୟବହାର କରିବା ଫଳରେ ଗ୍ରାମରେ ଝାଡାବାନ୍ତି ରୋଗ ବ୍ୟାପିବା ସହ ଶରତ ନାୟକ, ବାଲୁଙ୍କେଶ୍ୱର ନାୟକ, ଦାଶରଥି ପରିଡା, ପରମାନନ୍ଦ ସାହୁ, ରବି ବେହେରା, ହଜାରୀ ନାୟକଙ୍କ ସମେତ ଅନେକ ଲୋକ କିଡନୀ ରୋଗରେ ମୃତ୍ୟୁ ହୋଇଛି। ଝାଡାବାନ୍ତି ବ୍ୟାପିବା ସମୟରେ ସ୍ବାସ୍ଥ୍ୟ ବିଭାଗର ଏକ ଟିମ୍ ଗୁଡୁପାଙ୍ଗିରେ କ୍ୟାମ୍ପ କରିବା ସହ ସ୍ବାସ୍ଥ୍ୟ ସମସ୍ୟା ପ୍ରତି ଧ୍ୟାନ ଦେଇଥିଲେ। ନଳକୂଅଗୁଡିକର ପାଣି ବ୍ୟବହାର କରି ସ୍ବାସ୍ଥ୍ୟ ଖରାପ ହେଉଛି। ତେଣୁ ଉକ୍ତ ନଳକୂଅ ବ୍ୟବହାର ଯୋଗ୍ୟ ନୁହେଁ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ ଘୋଷଣା କରାଯାଇଥିଲା। ବର୍ତ୍ତମାନ ସେଥିମଧ୍ୟରୁ ୩ଟି ନଳକୂଅ ଚାଲୁଥିବା ବେଳେ ସେଥିରୁ ଫ୍ଲୋରାଇଡ୍ଯୁକ୍ତ ଲୁହାଗୁଣ୍ଡ ମିଶ୍ରିତ ପାଣି ବାହାରୁଛି। ଖୋଲା କୂଅ ମଧ୍ୟରୁ ଗୋଟିଏ କୂଅ ଲୋକଙ୍କ ବ୍ୟବହାର ଯୋଗ୍ୟ ରହିଛି। ତାହା ପୁଣି ଖରାଦିନେ ଶୁଖିଯାଏ। ଉକ୍ତ ଜଳ ଉତ୍ସ ଗୁଡ଼ିକରୁ ପାଣି ବ୍ୟବହାର କରି ବର୍ତ୍ତମାନ ମଧ୍ୟ ଅନେକ ଲୋକ କିଡନୀ ରୋଗରେ ଆକ୍ରାନ୍ତ ହୋଇଛନ୍ତି। ଏପରିସ୍ଥିତିରେ ଗୁଡୁପାଙ୍ଗି ଗ୍ରାମକୁ ଜଳ ଯୋଗାଣ ପାଇଁ ବ୍ୟବସ୍ଥା କରାଯାଇ ପାଇପ୍ ଯୋଗେ ପାଣି ଯୋଗାଇ ଦିଆଯାଉଥିଲା। କିନ୍ତୁ ଦୀର୍ଘ ୮ମାସ ହେଲା ଜଳଯୋଗାଣ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ଫଳରେ ଗୋଟିଏ ଖୋଲା କୂଅ ଓ ଗାଁର ଅନତି ଦୂରରେ ଥିବା ନଦୀର ଚୁଆ ପାଣି ଗ୍ରାମବାସୀଙ୍କ ଜୀବନ ରଖିଛି ବୋଲି ଗ୍ରାମବାସୀ କହିଛନ୍ତି। ତେବେ ଜଳ ସମସ୍ୟା ନେଇ ପ୍ରଶାସନ ଓ ସ୍ଥାନୀୟ ଲୋକ ପ୍ରତିନିଧିଙ୍କୁ ଅବଗତ କରାଯାଇଥିଲେ ମଧ୍ୟ କୌଣସି ସୁଫଳ ମିଳୁନି ବୋଲି ଗ୍ରାମବାସୀ କହୁଛନ୍ତି। ସେହିପରି ପଞ୍ଚାୟତ ନିର୍ବାଚନ ପରେ ୪ଟି ଓ୍ବାର୍ଡକୁ ପ୍ରଶାସନ ଅଣଦେଖା କରୁଛି। ପଞ୍ଚାୟତର ମୋଟ ୪୨ଜଣଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ସାମିଲ କରାଯାଇଥିଲେ ମଧ୍ୟ ଉକ୍ତ ଓ୍ବାର୍ଡଗୁଡିକର କୌଣସି ଲୋକଙ୍କୁ ସାମିଲ କରାଯାଇନାହିଁ। ଓ୍ବାର୍ଡଗୁଡିକରେ କୌଣସି ଉନ୍ନତିମୂଳକ କାର୍ଯ୍ୟ କରାଯାଉନାହିଁ। ପାନୀୟ ଜଳ ଯୋଗାଣରେ ବାବଦରେ ଆରଡବ୍ଳୁଏସ୍ଏସ୍ କନିଷ୍ଠ ଯନ୍ତ୍ରୀ ଲିପ୍ସା ମହାନ୍ତିଙ୍କୁ ପଚାରିବାରେ ପାଣି ପମ୍ପରେ ବିଦ୍ୟୁତ ତ୍ରୁଟି ଥିବା ଯୋଗୁ ମୋଟର ପମ୍ପ ଚାଲୁ ନାହିଁ। ତାହାକୁ ସଜାଡିବା ପାଇଁ ବିଦ୍ୟୁତ୍ ବିଭାଗକୁ ଜଣାଇଛୁ ବୋଲି ସେ କହିଛନ୍ତି।
