କଟକ ଅଫିସ, ୩୦।୯: କଟକ ଜିଲା ଡ୍ରେନେଜ ଡିଭିଜନ ପକ୍ଷରୁ ୨୦୨୧-୨୨ ଆର୍ଥତ୍କ ବର୍ଷରେ ଟାଙ୍ଗି-ଚୌଦ୍ୱାର, ବାଙ୍କୀ, ବଡ଼ମ୍ବା, ଆଠଗଡ଼ ଆଦି ଅଞ୍ଚଳରେ ଡ୍ରେନେଜ ବ୍ୟବସ୍ଥା ବିପର୍ଯ୍ୟସ୍ତ ଅବସ୍ଥାରେ ରହିଛି। ବହୁ ଅଞ୍ଚଳରେ ଜଳ ନିଷ୍କାସନ ଠିକ୍ ଭାବରେ ହୋଇ ନ ପାରି ହଜାରହଜାର ଏକର ଜମିରେ ପାଣି ଜମି ରହୁଛି। ଏପରି କି ସାଲେପୁର, ଆଠଗଡ଼, ବାଙ୍କୀ, ବଡ଼ମ୍ବା, ଆଦି ଅଞ୍ଚଳରେ ଡ୍ରେନେଜ ବ୍ୟବସ୍ଥାରେ ତ୍ରୁଟି ଯୋଗୁ ଜନସାଧାରଣ ବହୁ ଅସୁବିଧାର ସମ୍ମୁଖୀନ ହେଉଥିବାରୁ ଅଭିଯୋଗ ହୋଇଆସୁଛି। ଡ୍ରେନେଜ ବ୍ୟବସ୍ଥାର ଉନ୍ନତୀକରଣ ପାଇଁ ୩୦ କୋଟି ୬୮ ଲକ୍ଷ ୯୨ହଜାର ଟଙ୍କାର ଏକ ଅଟକଳ ପ୍ରସ୍ତୁତ କରାଯାଇ ରାଜ୍ୟ ସରକାରଙ୍କ ନିକଟକୁ ପଠାଯାଇଛି। ଯଦି ଏହି ଅର୍ଥ ମଞ୍ଜୁର ହୁଏ, ତେବେ ଖୁବ୍ଶୀଘ୍ର କାର୍ଯ୍ୟ ଆରମ୍ଭ ହେବ ବୋଲି ବିଭାଗୀୟ ସୂତ୍ରରୁ ଜଣାଯାଇଛି। ହେଲେ ଏହାକୁ କେବେ ମଞ୍ଜୁରୀ ମିଳୁଛି ଏବଂ ଡ୍ରେନେଜ ବ୍ୟବସ୍ଥା ସୁଧୁରୁଛି ତାକୁ
ନେଇ ଜିଲାବାସୀ ଅପେକ୍ଷାରେ ରହିଛନ୍ତି।
ଗତ ବର୍ଷ ଟାଙ୍ଗି-ଚୈାଦ୍ୱାରର ଗୁଆଳି ଡ୍ରେନେଜ କଟ୍, କଡେଇ ଡ୍ରେନେଜ କଟ୍, ଭୁୟାଁ ଜୋର ନାଳ, ବାଙ୍କୀ ବ୍ଲକର ବିଷ୍ଣୁପୁର ଲିଙ୍କ୍ ଡ୍ରେନ, ୮.୫୦ କି.ମି ରଣନଦୀ ଲିଙ୍କ୍ ଡ୍ରେନ, ବଡ଼ମ୍ବା ବ୍ଲକର ପର୍ବତିଆ ନାଳ, ସାରନାଳ ଆଠଗଡ଼ ବ୍ଲକର କିଆ ଗହିରା ନାଳ, ବେକବନ୍ଧ, ଚୋରା ଭଉଁରିଆ ଜୋର, ସାରକୋଳି, ପିଠାଖିଆ ଯୋର ଓ ବରକୋଟିଆ ଯୋରର ଉନ୍ନତୀକରଣ ପାଇଁ ଏଷ୍ଟିମେଟ ପ୍ରସ୍ତୁତ କରାଯାଇ ରାଜ୍ୟ ସରକାରଙ୍କ ନିକଟକୁ ପଠାଯାଇଛି। ହେଲେ ଅର୍ଥର ଅନୁଦାନ ନ ଥିବାରୁ ଉନ୍ନୟନ ମୂଳକ କାର୍ଯ୍ୟ ସମ୍ପନ୍ନ ହୋଇପାରୁ ନାହିଁ। ସେହିପରି ଯଦିଓ ବୈଷୟିକ ପରାମର୍ଶଦାତା କମିଟି ଦ୍ୱାରା କଟକ ସଦର ଅଞ୍ଚଳର ଶୁକପାଇକା ଡ୍ରେନେଜ ଚ୍ୟାନେଲ ପାଇଁ ୪,୪୦୩.୭୧ ଲକ୍ଷ ଟଙ୍କାର ବ୍ୟୟ ବରାଦ କରାଯାଇଛି, ମାତ୍ର ଅନୁଦାନ ଅଭାବରୁ କାର୍ଯ୍ୟ ଆରମ୍ଭ କରାଯାଇ ନାହିଁ। ଏ ସମ୍ପର୍କରେ ଡ୍ରେନେଜ ଡିଭିଜନର ମୁଖ୍ୟ ଯନ୍ତ୍ରୀ ବାଲେଶ୍ୱରନାଥ ସାହୁଙ୍କୁ ପଚାରିବାରେ କଟକ ସଦର, ସାଲେପୁର, ଆଠଗଡ, ବାଙ୍କୀ, ବଡ଼ମ୍ବା ଆଦି ଅଞ୍ଚଳର ଥିବା ପ୍ରସ୍ତାବିତ ପ୍ରକଳ୍ପ ଉପରେ ଗୁରୁତ୍ୱ ଦିଆଯାଉଛି ବୋଲି କହିଥିଲେ। ସେହିପରି ନିର୍ବାହୀ ଯନ୍ତ୍ରୀ ମନୋଜ କୁମାର ବେହେରାଙ୍କୁ ପଚାରିବାରେ ଅନୁଦାନ ମିଳିଲେ ଖୁବ୍ ଶୀଘ୍ର
କାର୍ଯ୍ୟ ଆରମ୍ଭ ହେବ ବୋଲି କହିଛନ୍ତି ା
