ଭୁବନେଶ୍ୱର, ୨୯।୭ (ତପନ ସ୍ବାଇଁ): ଓଡ଼ିଶାରେ ହକିର ବିକାଶ ଲକ୍ଷ୍ୟରେ ଆଉ ଏକ ପଦକ୍ଷେପ ସ୍ବରୂପ ରାଜ୍ୟ ସରକାରଙ୍କ କ୍ରୀଡ଼ା ଓ ଯୁବସେବା ବିଭାଗ, ହକି ଆସୋସିଏଶନ ଅଫ୍ ଓଡ଼ିଶା ଏବଂ ନାଭାଲ ଟାଟା ଏଚ୍ପିସିର ମିଳିତ ଆନୁକୂଲ୍ୟରେ କଳିଙ୍ଗ ଷ୍ଟାଡିୟମରେ ସ୍ବତନ୍ତ୍ର ଡ୍ରାଗ୍ଫ୍ଲିକ୍ ଟ୍ରେନିଂ କ୍ୟାମ୍ପ ଶୁକ୍ରବାର ଆରମ୍ଭ ହୋଇଛି। ଅଗଷ୍ଟ ୩ ପର୍ଯ୍ୟନ୍ତ ଚାଲିବାକୁଥିବା ଏହି କ୍ୟାମ୍ପକୁ ହକି ଅଲିମ୍ପିଆନ ରୂପିନ୍ଦରପାଲ ସିଂ ପରିଚାଳନା କରୁଛନ୍ତି। ପାନ୍ପୋଷ ସ୍ପୋଟର୍ସ ହଷ୍ଟେଲ, ହକି ହାଇପରଫର୍ମାନ୍ସ ସେଣ୍ଟର ଓ ସାଇ ସୁନ୍ଦରଗଡ଼ର କ୍ୟାଡେଟମାନେ ଏହି କ୍ୟାମ୍ପରୁ ଉପକୃତ ହୋଇପାରିବେ। ରାଜ୍ୟର ଡ୍ରାଗ୍ଫ୍ଲିକରଙ୍କ ପାଇଁ ଏହା ଏକ ସୁବର୍ଣ୍ଣ ସୁଯୋଗ କହିଲେ ଅତ୍ୟୁକ୍ତି ହେବନାହିଁ।
”ଏହି କ୍ୟାମ୍ପର ଆୟୋଜନ ଏକ ଉତ୍ତମ ପଦକ୍ଷେପ। ଓଡ଼ିଶାର ଯୁବ ଖେଳାଳିଙ୍କ ମଧ୍ୟରେ ମୁଁ ମୋର ଜ୍ଞାନ, ଦକ୍ଷତା ଏବଂ ଅଭିଜ୍ଞତା ବାଣ୍ଟିବା ପାଇଁ ଏହା ମାଧ୍ୟମରେ ସୁଯୋଗ ପାଇଛି। ଏହି କ୍ୟାମ୍ପରେ ଯଦିଓ ଡ୍ରାଗ୍ଫ୍ଲିକ୍ ଉପରେ ଫୋକସ କରାଯାଉଛି ତେବେ ଗେମ୍ର ବୈଷୟିକ, ଶାରୀରିକ ଓ ମାନସିକ ଦିଗ ଉପରେ ମଧ୍ୟ ଧ୍ୟାନ ଦିଆଯାଉଛି“ ବୋଲି ରୂପିନ୍ଦର ପ୍ରକାଶ କରିଛନ୍ତି। ମୁଁ ପୂର୍ବରୁ ୨୦୨୦ରେ ଭୁବନେଶ୍ୱର ଆସିଥିଲି। ଖେଳାଳିଙ୍କ ପାଇଁ ସୁବିଧା ସୁଯୋଗକୁ ବିଚାରକୁ ନେଲେ ଏହା ମଧ୍ୟରେ ଏଠାରେ ଅନେକ ପରିବର୍ତ୍ତନ ହୋଇଯାଇଛି। କ୍ରୀଡ଼ା ବିଜ୍ଞାନ, ପୁଷ୍ଟି ଏବଂ ମନସ୍ତତ୍ତ୍ୱକୁ ଦୃଷ୍ଟିରେ ରଖାଯାଇ ହକି ପ୍ରୋଗ୍ରାମ ଆୟୋଜନ କରାଯାଉଛି। ହକି ହେଉ କିମ୍ବା ଅନ୍ୟ କିଛି କ୍ରୀଡ଼ା, ଓଡ଼ିଶା ଯେ ବିଶ୍ୱରେ ଅନ୍ୟତମ ଶ୍ରେଷ୍ଠ ରାଜ୍ୟ ଏଥିରେ ଦ୍ୱିମତ ନାହିଁ ବୋଲି ରୂପିନ୍ଦର କହିଛନ୍ତି।
ସିନିୟର, ଜୁନିୟର ଓ ସବ୍ଜୁନିୟର ବର୍ଗରେ ଏହି କ୍ୟାମ୍ପରେ ଭାଗ ନେଇଥିବା ଉଦୀୟମାନ ୩୧ ଖେଳାଳିଙ୍କୁ ୮ଟି ଗ୍ରୁପ୍ରେ ବିଭକ୍ତ କରାଯାଇଛି। କ୍ୟାମ୍ପରେ ଟ୍ରେନିଂ ସହିତ ବିଭିନ୍ନ ଟେକ୍ନିକ୍ ଏବଂ ଶାରୀରିକ ପରୀକ୍ଷାର ଭିଡିଓ ବିଶ୍ଳେଷଣ କରାଯିବ ଏବଂ ଫିଟ୍ନେସ ସ୍ତର ବଢ଼ାଇବା ପାଇଁ ଜିମ୍ର ବ୍ୟବହାର କରାଯିବ। ଏହା ବ୍ୟତୀତ ଖେଳାଳିଙ୍କ ସର୍ବାଙ୍ଗିନ ଉନ୍ନତି ପାଇଁ ଏହି କାର୍ଯ୍ୟକ୍ରମରେ ମନସ୍ତାତ୍ତ୍ୱିକ ପରୀକ୍ଷା କରାଯିବ ା ଫଳରେ ସେମାନେ ଉଚ୍ଚ-ଚାପଯୁକ୍ତ ମ୍ୟାଚ ପରିସ୍ଥିତିରେ ଆତ୍ମବିଶ୍ୱାସର ସହ ଖେଳ ଉପରେ ଫୋକସ କରିପାରିବେ। ଆସନ୍ତା ଅଗଷ୍ଟରେ ଷ୍ଟ୍ରାଇକରଙ୍କ ପାଇଁ ଅନୁରୂପ ଏକ କ୍ୟାମ୍ପ କରାଯିବାର କାର୍ଯ୍ୟକ୍ରମ ରହିଛି। ତାରକା ମହିଳା ହକି ଖେଳାଳି ରାଣୀ ରାମପାଲ ଉକ୍ତ କ୍ୟାମ୍ପ ପରିଚାଳନା କରିବେ।
