ଭୁବନେଶ୍ୱର, ୨।୪ (ବ୍ୟୁରୋ): କୋଲକାତାସ୍ଥିତ ଭାରିଏବ୍ଲ ଏନର୍ଜି ସାଇକ୍ଲୋଟ୍ରନ୍ ସେଣ୍ଟର (ଭିଇସିସି)ଠାରେ ବୈଜ୍ଞାନିକ ଭାବେ କାର୍ଯ୍ୟରତ ଡ. ଯଯାତି କେଶରୀ ନାୟକଙ୍କୁ ଚଳିତ ବର୍ଷ ‘ଆଉଟ୍ଷ୍ଟାଣ୍ଡିଂ ରିଭିଓ୍ବର’ ସମ୍ମାନ ମିଳିଛି। ୟୁକେ ବ୍ରିଷ୍ଟଲସ୍ଥିତ ଇନ୍ଷ୍ଟିଚ୍ୟୁଟ୍ ଅଫ୍ ଫିଜିକ୍ସ (ଆଇଓପି) ସାଇନ୍ସ ପକ୍ଷରୁ ଡ. ନାୟକଙ୍କୁ ଏହି ସମ୍ମାନ ପ୍ରଦାନ କରାଯାଇଛି। ଆମେରିକା, ସ୍ପେନ୍, ଫ୍ରାନ୍ସ, ଜାପାନ୍, ଇଟାଲୀ, ଗ୍ରୀସ୍ ଏବଂ ଜର୍ମାନୀ ସମେତ ବିଶ୍ୱସ୍ତରରେ ୧୦ଜଣଙ୍କୁ ମନୋନୀତ କରାଯାଇଥିବାବେଳେ ଭାରତରୁ ଡ. ନାୟକ ଏହି ଅନ୍ତର୍ଜାତୀୟ ସମ୍ମାନ ପାଇବାର ଗୌରବଲାଭ କରିଛନ୍ତି। ନ୍ୟୁକ୍ଲିୟର ଆଣ୍ଡ୍ ପାର୍ଟିକିଲ୍ ଫିଜିକ୍ସ ଉପରେ ପ୍ରକାଶ ପାଉଥିବା ଗବେଷଣାତ୍ମକ ପତ୍ରିକା ‘ଜର୍ନାଲ ଅଫ୍ ଫିଜିକ୍ସ୍ ଜି’ରେ ସମୀକ୍ଷା କ୍ଷେତ୍ରରେ ଡ. ନାୟକଙ୍କ ଶ୍ରେଷ୍ଠ ଅବଦାନ ପାଇଁ ତାଙ୍କୁ ଏହି ସମ୍ମାନରେ ସମ୍ମାନିତ କରାଯାଇଛି।
କେନ୍ଦୁଝର ଜିଲା ଶାଳଣିଆ ପଞ୍ଚାୟତର ମନୋହରପୁର ନିବାସୀ ଗଣେଶ୍ୱର ନାୟକ ଓ ନିରୁପମା ନାୟକଙ୍କ ଜ୍ୟେଷ୍ଠପୁତ୍ର ହେଉଛନ୍ତି ଡ. ନାୟକ। ଡଅଁର ଉଚ୍ଚବିଦ୍ୟାଳୟରୁ ମାଟ୍ରିକ୍ ପାସ୍ କରିବା ପରେ ଭଦ୍ରକ ମହାବିଦ୍ୟାଳୟରେ ସ୍ନାତକ ଏବଂ ରେଭେନ୍ଶା ମହାବିଦ୍ୟାଳୟରୁ ସ୍ନାତକୋତ୍ତର ଉତ୍ତୀର୍ଣ୍ଣ ହୋଇଥିଲେ। ଏହାପରେ ଭାଭା ପାରମାଣବିକ ଗବେଷଣା କେନ୍ଦ୍ରରେ ବୈଜ୍ଞାନିକ ଭାବେ ଗବେଷଣା ଜୀବନ ଆରମ୍ଭ କରିଥିଲେ।
